APOSETOLO EDIA KARA 11:15-30

¹⁵Egu heleva na matamaia, bena Lauma Helaḡa na idia latadiai vada e diho, gunaguna ita latadai e diho heḡereḡerena.

¹⁶Bena Lohiabada ena hereva na helalolaia une, eto “Ioane ese ranu e bapatisolaimui, a lau ese Lauma Helaḡa do baina bapatisolaimui”.

¹⁷Taunabunai, Dirava ese ena harihari ḡauna vada e henidia, ita ese Lohiabada ta abidadama henia negana ai e henida heḡereḡerena lau be daika Dirava baina laoa ahu?

¹⁸Idia ese unu hereva e kamonai, vada asi reḡereḡedia e noho. Bena Dirava e imodaia, eto, Benaini, idau bese taudia danu Dirava ese vada e hahelalodia kerehai, mauri baine henidia helaoreana.

¹⁹Stefano ena mase negana daḡedaḡena ese e hakarohodia taudia na Foenikia bona Kupro bona Antioka vada ela, Iuda taudia mo sivarai namo e harorolai henidia.

²⁰A idia haida be Kupro bona Kurene taudia; bena Antioka ai e kau negana ai idia ese Helene taudia danu e hereva henidia, Lohiabada Iesu Keriso sivaraina namona e harorolai henidia.

²¹Lohiabada imana be Idia latadiai; bena hutuma bada ese edia hereva e abi dae, bona Lohiabada e haḡerea.

²²Ekalesia oreana Ierusalem ai ese haridia e kamonai, bena Banaba e siaia, Antioka bainela.

²³Banaba e gini dae Antioka ai, Dirava ena harihari-bada e itaia, bena e moale bada, bona iboudiai e sisiba henidia, Lohiabada na bae badinaia mai lalodia idoidiai ida.

²⁴Badina be ia na tau namona, Lauma Helaḡa ai bona abidadama ai e honuhonu dae. Una negana ai Lohiabada ibadinana taudia vada e hutuma e laova.

²⁵Bena Banaba e tore isi, Taso ela, Saulo itahuna;

²⁶e davaria, bena Antioka e hakaua lao. Unuseni ai idia raruosi na laḡani ta ekalesia ida e hebouva, bona hutuma e hadibadiava. Una negana ai Iesu ibadinana taudia e nemaidia “Christian”; una hereva na Antioka ai e vara.

²⁷Una negana ai peroveta taudia haida Ierusalem amo ela Antioka.

²⁸Ta ladana be Agabo. Lauma ese e hadibaia dainai ia ese doe badana harina e piua guna, tanobada idoinai baine vara eto. Doe na Klaudio negana ai e vara.

²⁹Taunabunai, Iesu ibadinana taudia iboudiai e lalo hadai, eto idia ta ta ena kohu ena kohu e abi heḡereḡeredia, edia harihari ḡauna bae siaia lao, varavara Iudea ai e nohova edia.

³⁰Unu e kara toma, bena Banaba bona Saulo e siailaidia, ekalesia oreana itataona taudia bae henidia.