APOSETOLO EDIA KARA 10:20-37

²⁰Oi toreisi, oi diho, idia danu oi lao, oi daradara lasi, badina be lau ese idia lau siaia.”

²¹Petero ia diho tatau toi dekenai, bona ia gwau, “Umui tahua tauna be lau, dahaka totona umui mai?”

²²Idia haere, idia gwau, “Korenelio, tuari taudia edia kapena, ia be kara maoromaoro bona Dirava dekenai gari tauna. Iuda taudia ibounai idia gwau ia be tau namona. Aneru helagana ta ese Dirava ena hereva Korenelio dekenai ia hamaoroa, ia gwau, ‘Oi ese Petero do oi boiria mai oiemu ruma dekenai, bona iena hereva do oi kamonai.’ ”

²³Vadaeni, Petero ese unai tau toiosi ia hakaua vareai iena ruma lalonai, unai hanuaboi unuseni idia mahuta. Dabai Petero ia toreisi, idia danu ia lao, bona varavara haida Iopa dekena amo ia danu idia lao.

²⁴Kerukeru Kaisarea hanua dekenai idia ginidae. Korenelio ese iena ruma dekenai Petero ena ginidae ia naria noho, bona iena varavara, bona iena turana korikori taudia ia boiria, idia hebou noho.

²⁵Petero ia raka vareai noho neganai, Korenelio ese ia danu idia hedavari, bona Petero ena aena badinai ia moru diho, ia tomadiho henia.

²⁶To Petero ese ia veria isi, ia gwau, “Oi toreisi, lau danu taunimanima.”

²⁷Bona ia raka vareai, Korenelio danu ia herevahereva, bona hebou taudia momo ia davaridia.

²⁸Vadaeni Petero ese idia dekenai ia hereva, ia gwau, “Umui diba Iuda taudia be idau bese taudia danu idia noho hebou o vadivadi hebou be mai taravatu. To Dirava ese lau dekenai ia hadibaia, tau ta lau gwauraia lasi ia be miro o dika.

²⁹Unai dainai umui boiboi neganai, mai laloa namo lau mai, lau noho siri lasi. Bona hari lau nanadaia, badina dahaka umui boiboi lau dekenai?”

³⁰Korenelio ia gwau, “Dina 4 ia lao vadaeni, adorahi 3 okaloka bamona egu ruma lalonai lau guriguri noho, inai hari hora bamona. Bona tau ta lauegu vairana dekenai ia gini, iena dabua be kurokuro momokani.

³¹Ia gwau, ‘Korenelio e, oiemu guriguri be Dirava ese ia kamonai vadaeni, bona oiemu harihari gaudia be Dirava ese ia laloa noho.

³²Unai dainai hereva oi siaia lao Iopa dekenai, Simona, ena ladana Petero oi boiria. Ia be Simona, boromakau kopina gaukara tauna ena ruma dekenai ia noho, kone dekenai.’

³³Vadaeni karaharaga hereva lau siaia oi dekenai, bona oi mai dainai lau tanikiu henia. Hari ai ibounai be Dirava ena vairanai iniseni ai hebou, gau ibounai Dirava ia hadibaia oi dekenai, do ai kamonai totona.”

³⁴Vadaeni Petero ese iena hereva ia matamaia, ia gwau, “Hari lau diba momokani Dirava ese taunimanima edia toana ia laloa lasi.

³⁵To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.

³⁶Dirava ese iena hereva ia siaia Israela taudia dekenai umui diba vadaeni. Ia ese maino ena Sivarai Namona ia gwauraia Iesu Keriso dekena amo, taunimanima ibounai edia Lohiabada. Inai Iesu ese ita bona Dirava huanai maino dalana ia karaia vadaeni.

³⁷Umui diba danu, unai hereva Galilea dekenai idia gwauraia hamatamaia, ia lao bona Iudea kahana ibounai, Ioane ese ia harorolaia bapatiso murinai.