APOSETOLO EDIA KARA 10:2-20

²Ia na Dirava ibadinana tauna; ena ruma taudia iboudiai ida Dirava garina e gariva. Ia danu ogoḡami taudia e harihari henidia badabadava; bona nega iboudiai Dirava e ḡuriava.

³Dina gelona ta ai vada e mata hanai, Dirava ena aneru ta e itaia, ienai e kau, ladana e hatoa, eto, Korenelio e!

⁴Bena ia ese aneru e raraia tao mai garina ida, eto, Lohiabada e, dahaka? Aneru ma eto, Emu ḡuriḡuri bona emu harihari ḡaudia danu Dirava vairanai vada e dae, bona ia ese e lalo taomu.

⁵Harihari memero haida lopa ba siaidia lao, Simona, ladana ta be Petro, bae ha vavea.

⁶Ia na Simona, boromakau kopidia iseudia tauna, dekena ai e nohomu; ena ruma na kone ai.

⁷E hereva henia aneruna ese e rakatania; bena ia ese ena hesiai memerodia rarua e boiridia, bona tuari tauna ta danu, Dirava ibadinana bona nega idoinai Korenelio isiaina e lao heniva tauna.

⁸Hereva idoidiai ia ese e hamaorolaidia, bena e siaidia, lopa ela.

⁹Kerukeru, idia na dounu dala ai, hanua vada e kahikahi. Dina tubua ai, Petro be ruma guhina ai e dae kau, ḡuriḡuri totona.

¹⁰Bena e hitoloa; baine aniani eto. To idia e nanaduva ai, ia vada e mata hanai;

¹¹guba e itaia, e parara, bona ḡau ta, dabua bada-hereana na heto, daigunina hani vada e tua dobi;

¹²Ialonai be mauri ḡaudia loḡora iboudiai, e rakamu gaudia, e raumu ḡaudia, bona atai ai e rohomu manudia, iboudiai e uda.

¹³Bena ere ta ienai e kau; eto, Petro e, a tore isi, avaladia, bavani.

¹⁴Petro e haere, eto, Lohiabada e, lasi vaitani; ḡau dikadia bona mai helaḡadia na asina animu ema bona hari.

¹⁵Ere ma e kau, eto, Dirava ese vada e haḡoevadia ḡaudia na basioto didika.

¹⁶Hatoi unu e kara toma, bena ḡauna na guba ai e abia dae lou.

¹⁷Petro ese mata hanaina ai e itaia ḡauna anina e daradaralaiava ai, Korenelio ena hesiai taudia e kau, Simona ena ruma e tahua, ema bona iduara ai e gini.

¹⁸E boiboi, eto, Simona, e nemaia Petro, na iniseni ai e nohomu eiava?

¹⁹Petro na mata hanaina ai e itaia ḡauna dounu e laloava ai, Lauma ese e hamaoroa, eto, Tatau tatoi e tahumumu;

²⁰a tore isi, a diho, idia ida baola, basio daradara; badina be lau ese vada na siaidia.