APOSETOLO EDIA KARA 10:11-27

¹¹Bona ia itaia, guba ia kehoa, bona gau ta, dabua bada herea bamona, iena daiguni 4 dekena amo ia diho mai tanobada dekenai.

¹²Inai gau lalonai be mauri gaudia idauidau ibounai idia noho, raka gaudia, gaigai bamona gaudia, bona ataiai idia roho manudia danu.

¹³Bona gado ta ia dekenai ia hereva, ia gwau, “Petero e, oi toreisi, oi alaia oi ania.”

¹⁴To Petero ia gwau, “Lohiabada e, lasi momokani, badina lau be miro gaudia bona mai helaga gaudia lau ania diba lasi.”

¹⁵Gado ese ma Petero dekenai ia hereva lou, ia gwau, “Dirava ese ia hagoevaia vadaeni gaudia, oi gwauraia lasi miro.”

¹⁶Nega toi inai bamona ia vara murinai, inai dabua badana ia daekau lou haraga, guba dekenai.

¹⁷Bona Petero ia laloa momo inai mata hanai ena anina be dahaka. Inai bamona ia laloa noho neganai, Korenelio ena hesiai taudia idia mai, Simona ena ruma idia tahua, bona idia gini noho iduara dekenai.

¹⁸Idia boiboi, idia gwau, “Simona, ena ladana ta be Petero ia noho iniseni o lasi?”

¹⁹Petero be unai mata hanai dekenai ia itaia gaudia ia laloa noho nega lalonai, Lauma ese ia dekenai ia gwau, “Tatau toi idia tahua oi.

²⁰Oi toreisi, oi diho, idia danu oi lao, oi daradara lasi, badina be lau ese idia lau siaia.”

²¹Petero ia diho tatau toi dekenai, bona ia gwau, “Umui tahua tauna be lau, dahaka totona umui mai?”

²²Idia haere, idia gwau, “Korenelio, tuari taudia edia kapena, ia be kara maoromaoro bona Dirava dekenai gari tauna. Iuda taudia ibounai idia gwau ia be tau namona. Aneru helagana ta ese Dirava ena hereva Korenelio dekenai ia hamaoroa, ia gwau, ‘Oi ese Petero do oi boiria mai oiemu ruma dekenai, bona iena hereva do oi kamonai.’ ”

²³Vadaeni, Petero ese unai tau toiosi ia hakaua vareai iena ruma lalonai, unai hanuaboi unuseni idia mahuta. Dabai Petero ia toreisi, idia danu ia lao, bona varavara haida Iopa dekena amo ia danu idia lao.

²⁴Kerukeru Kaisarea hanua dekenai idia ginidae. Korenelio ese iena ruma dekenai Petero ena ginidae ia naria noho, bona iena varavara, bona iena turana korikori taudia ia boiria, idia hebou noho.

²⁵Petero ia raka vareai noho neganai, Korenelio ese ia danu idia hedavari, bona Petero ena aena badinai ia moru diho, ia tomadiho henia.

²⁶To Petero ese ia veria isi, ia gwau, “Oi toreisi, lau danu taunimanima.”

²⁷Bona ia raka vareai, Korenelio danu ia herevahereva, bona hebou taudia momo ia davaridia.