Aposer 14:3-24

³Indeiptin Porsi Banabas ihit Aikoniam aptei orhor watahpei hat patim Hanipyah ohe meng oh pot inpari. Poriptin Hanipyah oh ite bes teinong hanip dire na imtin hatin da pinggio mat angopri. Imtiporhan ama kuuhan ihir wamara am hapti Ite ma Got oh orhe damdapat orhor dirnong yah nahapatmur ma naporiya meng moh arpin meng naporiya ma hapat dahangopari.

⁴Dahapti gahan ama ap mutuh ihir yot da hapti kat han ihir Got ohe meng pot pisapti han yot ite danong hangopari; kat han ihir Juda bap ire danong hangopari.

⁵Hatperhan gahan Juda bap be han ma hat pati hano kamoheim hat pati hano Juda na hat pati hano ihir ihitnong imara kweisi sutiprohemur gosham ama meng wanin matpa oh.

⁶Wanin matperhan ihit ama danong am hapti among mandama Rikonia mongnong susa Ristra apteisi Derbe apteisi ama aptei yotnong pipari.

⁷Susa ama aptei pati kuuhan ihirnongsi; ama aptei ohe kakduup pati kuuhan ihirnongsi Got orhe yah meng oh pot inpari.

⁸Ristra ap mutuh oh tit han tit sup uh buh yiwitsi orhor itip han tit patin Por oh meng am matipri.

⁹Meng por am deipat wandeioh ama buh yiwitsi han oh tongnom mengnong amrat pat hangopri. Amrat pathan Por oh ohnong kin dung por ohe danong awandeioh ohe da oh Got oh nohnong yah nahatin hatin hanwa dahah hangopri.

¹⁰Ihat dahat pathan Por oh ohnong kasip mengtei Go yah hama tandeim sonmur potipri. Potporhan oh arpin pung rim tandeima kuuhan ire kintei oh yah hat orhor tandeim sangopri.

¹¹Ihat tandeim yah hat saporhan kuuhan ihir Por ohe ma indeinong oh wamara Rikonia iraire mengtei Dire ma ripti apsup ihiroh hanip yot hatin hat dire mutuhnong wandayamuro akit mengtei ringopari.

¹²Ripti Banabas ohnong dire got Sus ma poripti han oh mama ohmur pongopari. Por ohnonghe Ohri mengripat hano rim dire got Hemas ma poripti han oh mohmur pongopari. Iham ite win oh ama win yot oh angopari.

¹³Imat win atperhan tit got Sus ohe ap yawar oh ama ap mutuh ohe manggap pe oh patin ohoh ihan ama ap yawar ohe hanat bok han oh sahapti han orhein tit daro irat gwe nang tei wih matin tan oh daro hapat poprisa ap mutuh ohe gwatei duup oh sara Gin sahapti han moh suma ite danong armi matpero goshangopari.

¹⁴Gigoshatperhan ihit amrama Epe. Ditnong Got orhor hatin naham armi nahatperim ihya moho daham itaite watah oh daharmat sara kapkap susa kuuhan ire mutuh oh tandeima

¹⁵Hanip gur kianorim nute danong hatperim ihapti. Nuhutra hanip diradir basda. Hanip tap bap diradirmur. Gin nuhut gurnong guragure na napanggeitin han erer ohe danong ma hat pati da moh mandama eimat patru patepra Got orhe danong hat paten ohe yah meng oh napotinmat mama apripti ohmur. Ama ihat patru patepra Got orhor aw tano mong tano tom hruo mong tan tei mama darpatip han erero oh ama Got orhorwi erer oh gonsi gon darpatip Got ohmur.

¹⁶Ama erer gonsi darpatip Got orhor iraire dawi hat ha patengwe daham wanahat napaptesuhmur.

¹⁷Imat wanahat napaptesuh orhor orhornong Oh ihat pat hanhe daham am hatin ohe da oh na remama orhe yah erer ma naprisuh ohe dap tei oh namgisuhmur. Imat ma namgisuh oh aw teimdapat tom pamdira mong moh gapa mar den tohan pa nadam deio den yah mat orhor napiro amam hat indin ohe da oh napiro ama ohe dap tei oh orhe da oh namgit napaptesuhmur potpari.

¹⁸Potperhan kuuhan ihirdapat ite danong ham armi matin ohe da ohsi kakduup amkatpa orhor ihitdapat ite meng ohsi ire ihya danong amkatpamur.

¹⁹Gahan Antiok aptei hano Aikoniam aptei hano ama aptei ohe Juda hat pati bap kat han ihir aprisa Por ohe danong ham meng ma amrapti ohe danong amkara iraire danong hatin ohe danong deingopari. Matperhan ihir arpin Por ohe danong mandama iraire danong hangopari. Iraire danong hapti kwei dara kweisi Por ohnong sungopari. Supti Gin sein hah ma hapat dahapti pramat pisusa ap mutuh ohe borpe oh sara mandangopari.

²⁰Imat mandatperhan Jisas ohe danong hapti han ihir aprisa ohe sein duup oh tarmutpari. Tarmutperhan oh masasa irair it Antiok ap mutuhnong pipari. Susa timatiri. Kimsidapat Porsi; Banabas ihit Derbe apteinong pipari.

²¹Porsi Banapas ihit Derbe apteinong susa ihirnong meng oh poriptin kuuhan han ruumsan ihirhe meng oh amrapti Jisas ohwi inahatin hatin han ma hapat daham orhe danong hangopari. Hatperhan ihit it Ristrao Aikoniamo Antioko ama aptei aptei oh meng pot pihipari.

²²Meng pot ma pihipa oh Gur Jisas orhe danong mama hat pati oh ama danong orhorwi kasip hat orhorwi patenmur. Got ohe napapindin teinong ma sapri oh ruumsup nahat napaptin orhor saprimur. Ihat ruumsup nahat napaptin orhor sapri ohoh ihan Jisas orhe danong hat pati da oh kasip hat patenmur poripti Jisas orhe danong ma hat pati ire danong akasip mat pihipari.

²³Ihama ihit aptei aptei ama Jisas orhe nita sios bap ihirnonghe kat han ihirnong Mama han gur wasman ohnong panggeit pisashenmur por kis mat pihipari. Imat kis deipti irair Gin dir Got ohe danong hatinmat kakun den na diprohemur gigoshapti den na dama Got ohe danongwi ham ohsi mengiro hatpari. Ihama Hanipyah gorhe danong hat pati han maihirnong gorhor wamat paptenmur por orhe bes teinong mat pihipari.

²⁴Porsi; Banabas ihit ihat ire danong akasip mat pisusa gahan ihit Pisidia mong mutuh oh susa Pampiria mong teinong kotpari.