Aposelme 2:25-37

²⁵Iau ka role minmina kurumea, pala nae Revit ke bai ka rolengana e te Iesus roma: “‘Iau ka kele Avolau ngamuga nge iau ka kaeme kinung. I ke momo ta kalaunga iau ta baina iau ka sana nga mammalu ka mataunga.

²⁶Minmina na iau ka logumannmanna ba pangamologangau ke ponu ka serenga; ba mirau nge momomasi ba nge momalle Nutu bole.

²⁷Ta One Ae Nutu ko sano la kangamana iau nga malle nga reke mate e momo ngape bavakena, ba bole One ko sano la ulonge Agau Ae One E Tupu ta i bonang.

²⁸One ko papanau iau ka pamau reke loa ta mauling; ba momongang kala nge iau ke la paponung iau ka serenga.’”

²⁹Pita ke role minmina tapu na ke role muni roma, “Kolingau memena, iau nga turupota te miau ka sisiukita ae Revit. I ke mate na keke talue ba o ae i ikolong tale.

³⁰Ava ka i a agau e toe Nutu kaona. Minmina na i ka lonamatana ka taru ora Nutu patokala kia te i roma, i ke la pulinge sivuna te nga tarang ae i ore nga kelangpatali ngarume.

³¹Revit ke kele taru orae Nutu ke la kumangng kia ngarume, minmina na i ke role ta Karais sigingpagangana nga mateng ine role roma, ‘Nutu ke sane kamane nga malle nga reke mate e momo ngape bavakena, ba mirana ke sane bona bole.’

³²“Nutu ke pasigipage Iesus laekia nga mateng ba mangng ka kele ollaeala ka matamangng kanname mannangana.

³³Ba i ke ravupataea ta bavana e pe ba ke tunge Kannu E Tupu te i base inae Nutu a i ae Tamana patokala te i pala. Na oru nginngina ra miau ka kela rea ba longo rea gialgiala mana ka i a tunga ora i kelingia nge mangng.

³⁴Revit muni ke sane lopatae lakailu ta tava, ava i ke role roma, “‘Nutu a i ae Avolau ke role kae Avolaukau roma: “Ngo tara nga bava nga kamau e pe nga malle a alangpaga

³⁵ta nge lele nga kae laeala a iau la ulopisiginge reke baiꞌiu kone ngape nga kaeng sianame.” ’

³⁶“Minmina na Israelme kinung nga loreamatana ka kaomannmannangana roma: Nutu ke pulia Iesus laeala a miau ka katupite nga maiskovu ta i nga giana ngailu nga giame kinung ba ta i ae Karais bole.”

³⁷Na ka ina ragau nginngina ke longo minmina, na pangamologa laeala ke pare lorea mannangana. Minmina na keke ballage Pita kala nga kolingana memena ra ri ra aposel roma, “Kolime, ita kaka la maingamia?”