Aposelme 2:12-30

¹²Na keke palibalaglaga rea ka loreapungana ba kalinglo ngareangana roma, “Taru ke lele ikia ba ka puna mina ngaetai?”

¹³Ava palu nge ri keke baipagalising kerea roma, “Keke inue uain raumana.”

¹⁴Nae Pita ke meisi kala nge Pana Tangulelu Ba Kena na i ke kura kaligi ta maluame roma, “Miau ra kolingau memena ra Iura ba miau kinung raka momo ngallo ngae Ierusalem. Ngaka longo nasai te iau, ta iau ka la turunge ollaekia e lele nakai puna minmina:

¹⁵Ra kokorai ke sane ke inu base ina miau ka role. Ka kae matana a lima ba tugulu gialgiala mana ka sinro!

¹⁶Ke sana minmina. Ava ke pala na agau e toe Nutu kaona ae Ioel ke pamologa ta ollaekia roma:

¹⁷“Nutu ke role roma, ‘Nga momong gunguna, na iau ka la kengalinge Kannu ae iau nga ragau kinung. Na goe rae miau ra panung ba na ra bale keke la pulingmalagange pangamologa a kanau ta ragau, ba goe rae miau ra ri ra taulai keke la kelange kelanga rae Nutu pakosining rea ki, bae Nutu ke la pakenongminge ravollalau kamiau memena reke papisigi tapu.

¹⁸Ba muni, nga barangalele ra kanau ra panung ba na ra bale bole, iau ka la kengalinge Kannu ae iau nge ri ka kae nginngina, na ri keke la pulingmalagange pangamologa a kanau ta ragau.

¹⁹Ba iau ka la kosining ka oru reke bollalau ngailu nga tava, ba killa reke bollalau ngape nga mogalo, toto ba poi ba sia kaina reke bollalau.

²⁰Kae e momo nga tava ke la kamongpiliu, na nga i a osuguna, ba inna nga i a toto pala nga kae laeala e bollau raumana ore nga Avolau atungngana.

²¹Bae Avolau ke la ravunglelenge ragau kinung reke kiu te i.’”

²²Nae Pita ke role bole roma, “Miau re ngae Israel ngaka longo nasai! Ka inae Iesus e ngae Nasaret kumkuma ka kumangng reke bollalau, ba oru reke gingging, ba killa reke bollalau ngaliua nge miau, na kumangngana nginngina keke pakosining miau roma Nutu ke baꞌe. Miau ka lomiaumatana tapu ka oru nginngina.

²³Bae Nutu ke pulia lona tapu ta i ulonge Iesus nga kamamiaume. Ba i ke potopita ngallo nge i muni ba ka lonamatana pala tapu ka oru ra miau ka la kumangng ki nge Iesus. Minmina na miau kaka bupage ragau reke sosoali lorea. Na ri keke balia e mate ka katungpita ngareangana kia nga maiskovu.

²⁴Avae Nutu ke pasigipage nga mateng. Mateng ka sana kana gingginga ta kamongpitange, minmina na i ke ravulelea nga mateng samangpitangana kia.

²⁵Iau ka role minmina kurumea, pala nae Revit ke bai ka rolengana e te Iesus roma: “‘Iau ka kele Avolau ngamuga nge iau ka kaeme kinung. I ke momo ta kalaunga iau ta baina iau ka sana nga mammalu ka mataunga.

²⁶Minmina na iau ka logumannmanna ba pangamologangau ke ponu ka serenga; ba mirau nge momomasi ba nge momalle Nutu bole.

²⁷Ta One Ae Nutu ko sano la kangamana iau nga malle nga reke mate e momo ngape bavakena, ba bole One ko sano la ulonge Agau Ae One E Tupu ta i bonang.

²⁸One ko papanau iau ka pamau reke loa ta mauling; ba momongang kala nge iau ke la paponung iau ka serenga.’”

²⁹Pita ke role minmina tapu na ke role muni roma, “Kolingau memena, iau nga turupota te miau ka sisiukita ae Revit. I ke mate na keke talue ba o ae i ikolong tale.

³⁰Ava ka i a agau e toe Nutu kaona. Minmina na i ka lonamatana ka taru ora Nutu patokala kia te i roma, i ke la pulinge sivuna te nga tarang ae i ore nga kelangpatali ngarume.