APOSELENA YULU 5:20-41

²⁰Wambu dupwa enenge ingyuo lete kararami lao tembole anda dokona boo pyao lamaiyuo karala pupwape leya.

²¹Pii doko sepala nakama neta musi musi gii pyakaeyamo dokopa tembole anda dokona kolando papala mana lamaiyuo kareyami. Yangama dokopa purisi akali mupwa dokomoo baa role pyao karo suu pingi mendakinya palyuo kareyami dupwape nakama sukusa sukusa pipala Juu akali wato lenge duwpa peparae wato lamana lao epena leyami. Lapala aposele dupwa karapusi anda dokona kararami lao suu pyapala nyela pena leyami.

²²Leyaminyi dokopa yanda singi dupwa papala karapusi anda dokona aposele dupwa pana nayaminyipa kandeyami. Kandapala lambuo papala dopa leyami.

²³Karapusi anda dokona kii porai mende palipyamopa yanda singi anda kambu repeta rapu pyuo karenge dusipa mee rapu pyuo karaminyipa anda kambu doko kii upi laro karapyamopa doko lumbwapala kandamwano dokopa nakama pisi naminyi kandamwa, leyami.

²⁴Dokopa yanda singi tembole anda rapu pyuo karenge dupwana mupwa dokomoo purisi akali mupwa dusipape pii doko sepala aposele dupwa apa pipala pumi lao saka napala yulu doko rengya apa pirandena pipya leyami.

²⁵Dokopa akali mendeme epapala nakama dopa lamaiya. Wamba karapusi anda dokona pyambwami akali dupwa epapu dakepa tembole anda dokona wambu dupwa mana lamaiyuo karaminyi, leya.

²⁶Dopa leyamo dokopa yanda singi mupwa doko yanda singi lapo dupwa opetae role pyao papala aposele dupwa nyepala lanyuo epeyami. Nyepala dokopa namwa mee wambu dupwame kana dokome pyasaraminyi lao pakapala yanda singi dupwame aposele dupwa pyaa nao elya kalo lanyuo epeyami.

²⁷Lanyuo epapala wato andake lenge akali dupwana lenge kambu siyamo dokona pisiyami. Pisiyaminyi dokopa purisi akali mupwa wakasa baame nakama piso soo dopa lamaiya.

²⁸Namwame nakama Yesunya kingi lao mana laa nalapape langyuokondali piyama kande. Piyamanopape nakama nakamana mana pii doko Jerusaleme dokona lao kapa kapa pipala akali dokona ranjama doko namwa keta sinya lao karaminyi leya.

²⁹Dopa leyamo dokopa Pitape aposele dupwa opetaepeme isingi dopa pyuo leyami. Isa akalinya pii dupwa see napala Anatu laramuli pyuo kararama ingilyamo.

³⁰Nakamame isa mamando dokona Yesu pyao palyiyami doko namwana rakange kyawa dupwame suu pyao kareyami Anatu dokomeko baa minyalyuo nyiya lyakande.

³¹Minyalyuo nyepala Anatumi banya kingi rolaerename baa mupwa ingyuo karena lapala Isaraele wambu dupwa nakama mona enenge palyalapa, koo dupwa nyuo kame sakasi sera lao karo busu pyuo baa Lete Wai Pyao Nyingi ingyuo karena leya Anatumi.

³²Yulu doko namwa kandapala epapu lao rolelyamano. Namwa iki laa nalyamano. Anatumi wambu dupwa baa letamuli pyuo karenge dupwa Imambu Poo Pyasi maingi dokome opetaeko yulu dokona lao rolenge, leyami aposele dupwame.

³³Dopa leyaminyi pii doko sepala nakamame aposele dupwa kando imbumi kumapala pyamwali lao suu pyao peteyami.

³⁴Dopa lao peteyaminyipa Parisi akali wato lao peteyami dokona mende banya kingi Gamaliele lengende Mawa Pii mana lenge akali wambu dupwa peparaeme baa lakanda minya minya pyuo kareyami dokome roya karapala disaepole dusipa kamanda karenale lao lanyuo pena leya.

³⁵Lapala akali peteyami dupwa lamaiyuo dopa pyuo leya. Isaraele akali dupwa, akali dusipa apa pirama lao suu pyaokondali pyuo piso kando pipwape.

³⁶Wamba dokopa akali Tiutasa lenge baa sipurapala wambu dupwa sinya lao namba akali mupwa lao kareya. Dokopa akali ama malu (400) banya pii sepala baa kareyamo dokona role pyapeta kareyami. Kareyaminyipape wambu menge lapome baa pyao kumakayami. Pyao kumakayaminyi dokopa akali role pyapeta kareyami dupwa bolombalo lao peyami dokopa akali dokona yulu pyakuiya.

³⁷Pyakuiyamopa enakana wambu dupwana kingi pepa piyami yuu gii dokopa akali mende Jutasa lenge yuu Galili range dokome sipurapala wambu lapo banya yulu piyamuli pyuo pimana epena lao suu longo nyiya. Baa opetae piyaminyi kumuya. Kumuyamo dokopa wambu banya yulu nyuo piyaminyi dupwa peparae bolombalo lao rali piyami.

³⁸Dokona suu pyao akali dusipa mee karena lao kandanyi lyakao karo yulu mende pii nalapape. Akali dusipa dopa pirama dopa pirama lao karaminyi renge doko mee isa akalinya yulu ramo doko mee pyakuiyaro palira.

³⁹Doko Anatunya yulu ramo doko nakama meme pinya nembo saka narami ingilyamo. Doko Anatunya yulu ramo doko nakama dae petaminyi dupwa Anatupa lao sisi nyuo kararamisa pira, leya Gamalieleme.

⁴⁰Dopa leyamo dokopa nakama banya pii soo rape rape lao karo aposele dupwa epena lapala pyaroko pyapala Yesunya kingi doko laa nana lao lamaiyuokondali piyami. Dopa pipala mokoyami.

⁴¹Dokopa aposele dupwa wato lenge anda doko yaki nyepala pao dokopa Yesunya kingi dokona reke lao moŋo nyimwasa pilyamo lao suu pyapala ama rae maiyuo anda peyami.