APOSELENA YULU 21:17-27

¹⁷Jerusaleme dokona epeyamano dokopa Kurisene yangonge dupwame namwa rae maiyuo yako lao nyiyami.

¹⁸Dokona yangama dokopa Pole namwa pipya role pyao Jemesa kareyamo dokona peyama. Rapu akali dupwa peparae dokona kareyamipya.

¹⁹Dokopa Poleme nakama yako lapala Anatumi renge kuiyuo karo baa keta Juu daa rara wakale dupwa nyiso yulu andake piyamo dupwana pakana palyuo lamaiya.

²⁰Lamaiyamo pii doko sepala nakamame Anatu lakandeyami. Lakandapala nakamame baa dopa lamaiyami. Juu wambu karaminyi dupwana ama malu Yesu suu pyao karaminyi kande. Nakama peparaeme Mawa Pii dupwa kandokondali pyuo minyuo karenge.

²¹Emba yulu piinyi dupwa lasi pii simi. Juu wambu lapo dae yaki nyepala rara wakale dupwana rukuraka pyuo karaminyi dupwa kando embame Mosesena Lowa yaki nyepala nakamana wane dupwana yanenge awali lao pyakepanyi nemba nana lao mana lamainyi doko simi.

²²Dokona ingyuo apa pimane? Emba ipilyamo lao seramilyamo.

²³Dokona namwame emba langiramanuli pyuo pilase. Namwana akali kisima dusipame mende pirama lao mawa palyapala karaminyi.

²⁴Embame nakama pipa Juu wambunya yulu dokona pinginyili pyuo piri. Doko akali kisima dusipa kyawasi roko poo pyao parama lao mena malu pyao kiso maiyuo kana andake nembarami dokona emba nyiso role pyao pipala kana andake nembakamaiyalase. Dokome wambu peparaeme emba dopa pyuo karene lao sepala mee kanya piso lamilyamo lao sepala emba range Mawa Pii palengenyili pyuo pyuo karengelamo lao soo gisarami.

²⁵Soo gisaraminyipape Juu daa rara wakale Yesu kapa ingingi lao suu pyapala mona maipala karaminyi dupwa kando pepa pase mende maiyama dokona dopa lao suu pyalu pyao pilyamano lao pyao maiyama. Imambu suu pyao mena pyao kiso maingi minju dupwape ranjamape bange pendoko minyuo kondelyaminyipa kumungi nengepe kepo pingipi yulu dusipa kaeyalu kaeyo kaena lao pepa pyao maiyama, leyami.

²⁶Dokopa Poleme akali dupwa nyepala yangama dokopa baa dupwa pipa role pyao Juu wambunya yulu dokona poo pyasi ingyuo karalana pinginde yulu dokona kanda soo piya. Pipala tembole anda pao Poleme purisi lamaiyuo yuu lapo epo paramopa yulu poo pingi dokona pyuo otaramano yuu gii dokopa namwana lao mendaki mendaki lao mena pyao kiso Anatu maiyakarami leya.

²⁷Leyaminyi doko suu pyao yuu yanda ipingi repeta epo peyamo dokopa Juu wambu yuu Esia range lapome Pole tembole anda dokona kareyamo kandapala wambu rukuraka pyuo kareyami dupwa nembo nembo pipala baa minyareyami.