APOSELENA YULU 17:19-33

¹⁹Lapala baa nyepala lanyuo pao kote soo wato lao karenge akali Areopakasa lenge dupwa kareyami dokona papala, Emba mana pii enenge letene doko aki pii lao simwali yaka, leyami.

²⁰Emba pii namwa see nangende minyuo epo namwana kale dokona palyakapisa dokome pii renge doko akinde letene lao simwali yaka, leyami.

²¹(Yuu Atenesa range dupwape nanesa wambu dokona palenge dupwape nakama peparae pii enenge wakale wakale rae maiyuo koto pyuo kareyami.)

²²Dopa pyuo kareyaminyipa Pole Areopakasa akali peteyaminyi sukusa dokona karapala dopa leya. Atenesa akali dupwa, nakama imambunya yulu dokona poraiyuo suu pyaokondali pyuo karaminyi lao kandelyo.

²³Dokona lao kata epo dokopa bange wakale wakale ketae pyambuo yako lao karaminyi dupwa kando papipunupa imambu mupwa mende karo pilyamo lao kana ratendena bange reto mainginde dokona pepa pyasi palipyamo kandapu. Doko imambu mupwa mende kingi see nalyamano dokona suu pyao dake pilyamano lao pyao reteyaminyi kandapu. Dokona suu pyao kando see napala ketae pyambuo yako lao karamipyasa dokoko nambame nakama kingi polo langilyu.

²⁴Anatu baa isa yuu dokope bange dokona silyamo dupwa peparaepe pyuo wasiyamo dokoko yake panda dokonape isa yuu dapwanape Kamongo ingyuo karamo dokome imambu anda akalimi piyami dupwana kara nange.

²⁵Dopa pyuo karamo dokona lao baa mende aeya napyande isa wambu dupwame kingimi baa isaro pyuo kararami ingya nalyamo. Dokona suu pyao baa rangeme akali peparae lee karenge rengepe ŋeeŋae singi rengepe bange peparaepe joo karenge.

²⁶Akali rara yuu muu dupwana karaminyi dupwa peparae baame rara mendakindena paka lakyapala liti pinyi peyarapu karena leya. Baameoko nakama ee kana akipare kararami laope yuu liti anjukunya kararami laope rangeme rombo palyingi.

²⁷Isa wambumi baa koto kando soo gisamwali yaka lapala angi kando nyerami lao rombo palyapa piya. Dokona ingyuo baame namwa nanesale karelyande daa.

²⁸Dokona lao, Baame kyawa minyapyamopa namwa romo romo pyuo papyuo, mona palipyamopa lete karamano. Nakamana kenane pingi akali lapome dopa leyami, Namwa banya para pyasi ingyuo karamano.

²⁹Namwa Anatunya para pyao nyisi karamano dokona suu pyao akalimi kana golo dee kulingi kanape kana wakalepe nyepala kingi suu pingipi mora petenge dokome Anatu yale ingyuo wasiyamilyamo lao suu pyaa namanale.

³⁰Namwa kamenge see nao kareyama gii dupwana Anatumi mata joo kae napala akali yuu muu peparaena karaminyi dupwa kondo kandapala nakamana koo dupwa yaki nyuo suu pingi enenge suu pyao karalapape lao karamo.

³¹Dokonako ingyuo akali mende rombo palyiyamo doko renge paliramopa yulu rolae pinginya renge dokome isa wambunya yulu dupwana lao rolara yuu gii baa dopa pira doko rombo palyapeya. Wambu peparaeme dopa piralyamo lao soo gisinya lao akali doko kumuo paleyamopa minyalyuo nyiya leya.

³²Dokopa mendali lopo epeya leyamo doko sepala lapome giyalya giyana piyami. Lapome giyalya giyana piyaminyipape lapome pii dokona dee kamba simwali yaka, leyami.

³³Dopa pyuo piyasa Pole baa dokona kaepala peya.