APOSELENA YULU 13:16-31

¹⁶Dokopa Pole roya karapala banya kingi minya yapala dopa leya. Isaraele akali dupwape Anatu kando pakao petaminyi dupwape nakama selapape.

¹⁷Isaraele wambu dupwana Anatu baame namwana rakange kyawa dupwa nyuo rombo palyiya. Rombo palyapala nakama yuu Isipi dokona mee karala paenge ingyuo kareyami dokopa rara andake karena lao wai kisiya. Enakana baa porayapala nakama Isipi dokona neta lanyuo peya.

¹⁸Lanyuo papala nakama ee kana akalisa kisima ingyuowale yuu muiyane dokona kareyaminyipa baame nakama sakao sakao pyuo minyuo kareya.

¹⁹Dopa pyuo karapala rara wakale yanda ipingi yuu Kenane dokona kareyami dusipa baame pyao ralipala yuu nakamana dusipa Isaraele wambu dupwa nyulu nyuo nyinya lao maiya.

²⁰Maiyamopa ee kana akalisa kisima daako akalisa malu mee wakasa (450) kareyami. Enakana akali lapo rombo palyapala nakamana jasi akali ingyuo rapu pyuo karena lapo pyakamiya.

²¹Enakana doko nakama kiŋi akali mende rombo palyakana leyaminyi dokopa Anatumi Sole baa Kisana ikinyingi Benjamenena rara akali doko rombo palyakamiya. Baa ee kana akalisa kisima kiŋi ingyuo pyuo kareya.

²²Kareyamopa Anatumi baa pyakuiyuo nembapala Dapiti baa kiŋi yulu pyuo karena lao rombo palyiya. Palyiyamo dokopa baasa kando dopa leya. Dapiti Jesena ikinyingi baa nambapa mona mendaki palyapyasa kyanyi kandelyo. Namba laro dokonako palyuo pyuo karara leya.

²³Enakana akali dokona para pyasi kareyami dokona mende Yesu lenge baame Isaraelena Lete Wai Pyao Nyingi akali karena lao baa rombo palyakaro leyamuli pyuo rombo palyakaya.

²⁴Yesu baa epapa nayamopa Jone baa Isaraele wambu dupwa peparae suu pingi enenge palyapala bapitisimo nyelapape, lao boo pyao lamaiyuo kareya.

²⁵Jone banya yulu lumwa pyuo karo dokopa dopa leya. Namba apiyakale lao apa lao suu pilyamipi? Namba Koraisa daa. Mende enakana epelyamo doko nambame koo ingyuo karo dokome banya kimbu suu lyolo doko polarono kapa ingya nalyamo leya.

²⁶Yangonemoo, Aporakamena para pyasi dupwana ikinyingi dupwape wambu menge Anatu kando pakao petaminyi dupwape selapa. Namwa lete wai pyao parami lao Anatumi waili pii doko jilyamo leya.

²⁷Jerusaleme wambu dupwape nakamana rapu pingi dupwa pipya nakamame baa dopa pyuondelyamo lao soo rola napala Anatunya poropeta akali dupwana pii pyasi palamo doko koro petenge dupwana peparae yaka lapa pingi pii doko soo gisa napalape pii doko leyamuli pyuo piyami.

²⁸Dokopa renge mendena baa kumara ingya nayamopa nakamame Pailate baame pyao kumakana lapyali yaka lao piso siyami.

²⁹Dokopa baasa kando dopa pyuo palira dopa pyuo pirami lao Anatunya pii pyasi paleyamuli pyuo nakamame pyuo otapala isa mamando baa yukwaro paleyamo dokona baa neta nyepala malu andana palyiyami.

³⁰Palyiyaminyipape baa kumuo paleyamopa Anatumi lete nyiya.

³¹Lete nyiyamopa wamba wambu yuu Galili karo baa role pyao pao Jerusaleme dokona epeyami dupwa baame range kandena lao maro lapa piya. Baa kandeyami dupwame epapu Isaraele wambu dupwa kando baa piyamo dupwa lamaiyuo rolo karaminyi.