Aposel 9:28-38

²⁸Ma eme Sol udu hawe oro edek ili eme bolo Jerusalem atiye sahou nyarahan nyarahan ta nyara Laban.

²⁹Iy asehek sahou ma hawe andres oro lau badu Juwis nane asehek boho Grik, arile oro anya kadai iy kimek.

³⁰Eme iri lau ta Jises ado doh anuhun badeh, iri kuhi Sol ili Sesariya ma suni iy iu ili kon Tasus.

³¹Ano iri lau ta budon handru badu loboho Judiya, Galili hawe Samariya sekesek handru ta iri babwese isi ja bwe. Iri badeh, abadok ma ales boto-on na boto-on ta Malawin Ndrabun. Ma eme, kane iri i sola ma iri anoh Kindrei, eme ma iri atudun iy.

³²Udu bolo tekedek ta Pita ili eme bolo kon munyak doh badeh, ma iy ili selesen oro lau ta Kindrei an kon Lida.

³³Iy ili badeh, ndruni ndramak ari nyaran Aneyas, badan mari imek. Iy in le bada sau andrei jaha ma ndru la-uh.

³⁴Eme Pita tiye i ta Aneyas anya, “Jises Krais ndramesekei ou ndramwenen. Ou suri ou, ma ou lukumwi kin tam.” Eme, se nawin bwe, iy suri iy eme loken.

³⁵Eme iri lau manyah ado Lida hawe Saron anyolom badeh, ma iri atehei budon tiri handru i ta Laban.

³⁶Ya udu kon Jopa badeh, badih ari nyaran Tabita (i boho Grik badeh, aloh iy Dokas). Iy badeh, badih ari ta in hamon ta Kindrei. Eme na len mari, iy amekes kandriyen mwasin i tiri lau, ma iy aseben iri lau, tiri lakou bwe.

³⁷Na len doh badeh, iy ibo sik ma iy imek. Ya eme iri anyuwi iy, ma nyahani iy udu bolo asiu loken.

³⁸Lida doh badeh, udu mirihik ta Jopa. Ya eme oro lau ta Jises anuhun Pita badeh, udu Lida. Eme oro suni uru lau la-uh badeh, ala andrek iy anya, “Ou ame suwi.”