Aposel 9:18-35

¹⁸Uniutra a kum utna i elar nama walong na kiripo, i puku pirso gusun arin matano, ra i tamtama melet. I tur ma di baptaiso i.

¹⁹Ra i sa wangon pas, a pinino i dekdek melet. O Sol i kis pas a kabano bung torom a taro na ususer tong o Damaskus.

²⁰Uniutra i turpasi sur in warawai una kum rumu na lotu anun a taro Juda. I warawai un o Iesu lena, i a Nutun o God.

²¹Det rop ra det longoro i, det kisin uni, ma det watungi lena, “Ai! A musano kut ri, ra i umum doko det ra det ser lotu torom o Iesu sapat o Jerusalem. Ra uniri, i wanpat bulung urin, sur in dat pas lako taro ra det ser lotu torom o Iesu, usapat torom a kum lamlabino tene etabor torom o God.”

²²Ma a warawai anun o Sol i dekdek ra i watung a kum utna ra i ulingmulus pasi lena, o Iesu i ut a Karisito. Ma a taro Juda ra det kis tiro o Damaskus det nuknuk doko una nun a wasiso, ma ka det pet lar pasi sur det in balu i.

²³Ra i sa rop a susut na bung, a taro Juda det epak sur det in um doko o Sol.

²⁴Ikut o Sol i sa tasmani lena det epak suri. Una kum mirum ma a waspi, det tamtama una kum matansako ina tamon sur o Sol, sur det in um doko i.

²⁵Ikut, anun a kum nat na ususer, det ben pasi una mirum, ma det ukete pirso i nama rat una papor nin noworo na wat ra di pam bat a tamon nami.

²⁶Ra o Sol i wanpat sapat o Jerusalem, i lari sur in kis torom a taro na ususer, ikut det rop det ngarani kut, ma ka det nurnur uni lena, i kai ara tagun a taro na ususer.

²⁷Ikut o Banabas i ben pasi, ra der wan tomo torom a kum aposel, ma i inanos det lena, “O Sol i sa tama tar a Labino, ma a Labino i wasiso toromi una nun a inawan utong o Damaskus. Tong o Damaskus, i warawai una risan o Iesu ma ke ngara.”

²⁸Uniri, det nurnur maragom uni. Ra o Sol i kis tomo nama kum aposel. I wan tuptupukus sapat o Jerusalem, ra i wasiso una risan a Labino, ma ke ngara.

²⁹I wasiso tomo nama taro Juda ra det wasiso Grik, ma i balu anundet a kum iting, ikut det lari sur det in um doko i.

³⁰Det ra det tar tistisino una nurnur, det longoro i. Ra det beni utong o Sisaria, ra numur det tulu ru i utong o Tasus.

³¹Numur a taro na lotu tong una tulu papor Judia, Galili ma o Samaria, det kis na malmal. Det kis nama urur torom a Labino, ra a Tokodos na Nion i uragot det. Ra a niluluk ina taro na nurnur i labo nanan.

³²Ra o Pita i wan nanan una kum tamon, i wan utkai torom a taro anun o God tong o Lida.

³³Tiro iai, i barato pas ara musano, a risano o Ainias, a pinino i mat, ma i inep kut una bano, elar nama tiwal na kilalo.

³⁴Ra o Pita i watungi tano lena, “Ainias, o Iesu Karisito i sa ulangolango pas ui. Un katutur, ma un pul pas a bam.” Ra uniutra i katutur.

³⁵Numur, det rop ra det kis una ru tamon, o Lida ma o Saron, det tama a musano ra, ma det nukpukus torom a Labino.