Aposel 8:5-33

⁵Pilip badeh, ili andri bolo kon tinan ari badu loboho Samariya, atiye sahou ili tiri lau ta nyala Jises, ta iy ndramak doh Krais, iy mene Kindrei ndraleheyani iy eme ta aseben taha mari.

⁶Eme na len iri lau anuhun sahou ta Pilip asehek ma anyolom kalem iy amekes badeh, ma iri atehei ndranye iri irih labai ta anuhun sahou iy asehek.

⁷Ma hawe iri malawin ndra-in badeh, anyar ma ame len ta ndramak, ma hawe lau kati iri imek, ma bada iri imek badeh, mara-ei amwenen ja.

⁸Ya iri lahou tinan ta Kindrei eme bolo kon tinan doh badeh, ma bwidi iri lau mara-ei sekesek laba tinan labai.

⁹Ya ndramak ari nyaran Saimon udu kon tinan doh ale badeh, amekes balahak san solo-an solo-an ndra-au, ya amekes iri lau mari badu loboho Samariya, boho iri asak ta aliy. Iy badeh, atudun iy anya, iy le kabwai.

¹⁰Ya eme iri lau mari ma tinan ma bwisik badeh, atehei budon tiri i tan anya, “Iy ndramak dah badeh, iy Kindrei, ma boto-on tan ili labai.”

¹¹Iri lau badeh, an hamon tan, tasah iy badeh, bwidi boho iri asak san solo-an labai, ma amekes kalem luluwen labai.

¹²Arile, na len Pilip tiye tiri ta sahou mwasin ta nyala tondrok ta Kindrei ma hawe nyara Jises Krais, iri mwan hawe iri badih badeh, atehei budon tiri in ta sahou ta Pilip, ma alomwa iri.

¹³Ma Saimon ale atehei budon tan handru in tiri sahou doh, ya eme alomwa iy ale. Eme ma iy in hamon ta Pilip ili kon rakon, rakon, ma anyolom iri kalem tinan Pilip amekes ma bohon asak.

¹⁴Eme na len oro aposel ado Jerusalem anuhun iri lau badu Samariya badeh, ndrandrei sahou ta Kindrei, eme oro suni Pita uru Jon ala anyolom oro.

¹⁵Eme uru ala asahan hawe oro lau mwan ma badih nane, uru asolom oro ta oro kakohok Malawin Ndrabun,

¹⁶tasah Malawin Ndrabun badeh, bala la-u oro ari bwe le; oro badeh, alomwa oro na nyara Laban Jises le.

¹⁷Ano Pita uru Jon atehei mine uru i la-u oro, ma oro adah na Malawin Ndrabun.

¹⁸Eme na len doh Saimon anyolom oro akohok Malawin Ndrabun i san ta oro aposel adeu lim i la-u oro badeh, iy anya kedeu luk ki ta Pita uru Jon ta asih boto-on turu nane doh.

¹⁹Eme ma iy tiye turu i buku doh, “Ah katehei boto-on badeh, keme tek ale, ya i buku none jo kedeu minek ki la-u are ki la-u are, iri kakohok Malawin Ndrabun ale.”

²⁰Eme Pita anya, “Ou ndrandra-i kede-eh, ou abudon anya, ou winiyan sihinei ndramas ta Kindrei dah na luk tam badeh? Arile, bwe! Ou ma luk tam badeh, kameh amak.

²¹Ou badeh, balem bahas ta lahou dah bwe, tasah ndrinem badeh, bamwenen ta mada Kindrei bwe.

²²Ou tubuni ndrinem ta kandriyen ndra-in badeh, ya ou amekes salom ki ta Laban. Sebwe iy winiyan mani budon ndra-in marakon udu ndrinem badeh ano iu.

²³Tasah, jo anyolom ou badeh, ndradah na iri madalakis hawe kandriyen ndra-in ndrasebete-ei ou.”

²⁴Ano Saimon anya, “Ndri-iy! Ah kamekes salom kili ta Laban ta aseben jo, ya eme sasah nane ah ndrasehek badeh, kameh sasahan tek.”

²⁵Ya uru asehek sasah uru tanan ma ndranyolom udu bada Jises amekes ma asehek sahou ta nyala Laban ano badeh, Pita uru Jon au a hamon ja ala Jerusalem. Ya udu bolo tekedek turu au a hamon badeh, uru atiye sahou mwasin ili kon solo-an badu loboho Samariya.

²⁶Eme angelo ari ta Laban eme tiye Pilip anya, “Ou ala san ili loboho kum, kon lomale an ala udu Jerusalem i andri ili kon tinan Gasa.”

²⁷Eme iy edek ili badeh, ndruni ndramak ari badu Itiyopiya. Iy badeh, ndramak ari tinan ta atondrok lakou mwasin mwasin ta kabin badih badu Itiyopiya nyaran Kandasi. Iy badeh, mene ili Jerusalem ta atudun Kindrei.

²⁸Ano, iy udu san ta ki-iu ki kon ja ai. Ya iy badeh, udu bwele-e sau, ya iri hos aliu iy. Eme iy manyah udu bwele-en badeh, anyolom sahou propet Aisaya mene atorou.

²⁹Eme Malawin Ndrabun tiye Pilip anya, “Ou ala mirihik ta sau ale iri hos aliu kodo-on.”

³⁰Ano, Pilip sakaliye ili mirihik ta bada sau nane anuhun ndramak dah aloh sahou badu bolo tarou ta propet Aisaya. Eme Pilip ndremenya iy anya, “Batum aleu ta sahou ou aloh badeh, deh bwe?”

³¹Eme iy anya, “Batuk kaleu ta aliy ki buku sah? Ki buku none ari ndramak keme kaleheya keme tek.” Ya eme iy tiye Pilip anya, “Ou ame loke manyah ado hawek, ma aseben jo.”

³²Eme ma, Pilip ili loke hawe ndramak doh, anyolom tarou ta buk ndrabun ranah nane, atorou i buku doh, “Iy badeh, i buku none ari sipsip andrei iy eme len ta adai iy; Iy badeh, i buku none ari sipsip nadu bwisik se balohou bwe na len anya kasan lamin; Iy badeh, randra sahou bwe.

³³Iri atehei iy i andri labai, ma iri atehei iy i ta mada sahou, arile iri balelei iy, ta mada sahou tan bwe, Are lau handru barasihidi saren barala ta lundriyen oro? Tasah iri ndradai iy ndramak.”