Aposel 5:11-23

¹¹Odocob tamanec cunugca dana caja leihca je eu dah mimeig ben bahic cucuiein.

¹²Odocob aposel age kobolkobol odocca, gaga odocca mati bahic dana cajaca gemona odoin. Odocob tamanec cunug age Solomonna hamolna ono ceguloig.

¹³Leih maha gemo coboin eu cucuiimeig age li gabanadecnu qee cisdoloin, qa dana cajaca cunug tamanec binanaga sulein.

¹⁴Euqa dana cajaca mati bahic age Tibudnu wawaga meleen uqana tamanec euna lein.

¹⁵Eunu aposel age odi oodogin dana age Pita hu woolaadeb uqa hahun aqeceb me madigiannu age hagca gahiadi jicna agena cabalna agena taegna cedi ehi li madoloig.

¹⁶Odocob mati bahic dana caja hagca eundec jobon nagnag Jerusalem alildoc onodec buga me qeeca eundec cedi ahocobil age cunug me madein.

¹⁷Odocobil ihanec dana iloca, Sadjusi dana age uqaca tawein eundecca age heel mec je madein. Eunu age aposelnu age ceteh oso odadecnu cisdoin.

¹⁸Age aposel hewadimeig dana cunug agena gihacdoc jo euna madein.

¹⁹Euqa witic euna Tibudna ensel oso nimei gihacdoc jo cebec hudimei aposel ehadi ehi limei maaden,

²⁰“Belimeig tempel hamol li taweiga. Odimeig cebac bilec haun inu dana cajaca cunug maadeiga,” aden.

²¹Aposel je toodumeig cocojagen age tempel jo hamol lein. Odimeig me je iwaladein. Ihanec dana iloca dana age uqaca tawein eundecca age Juda agena cegulec cegulecnu maadecebil hu cegulein. Odimeig age aposel cedadi ahocobil cegulec euna age amagana madoqagannu je suldocobil gihacdoc jona len.

²²Saen tempelnadec cabi dana lein eu aposel ono qee gulucadelein. Eunu age cegulecca limeig maadein,

²³“Saen ege gihacdoc jona limeb jic cebec eu gagadic bahic menec tatawen foqa. Gihacdoc jo jic cebec cofdoc dana ha tatawegin meciadoqa qa saen ege jic cebec hudimeb dunuh loqa eu ono danaca qee!” adein.