Aposel 2:3-22

³Eme oro anyolom jih anya eme andri, ma weleyaniy i la-u oro ari ari.

⁴Eme Malawin Ndrabun anyuhi ndrine oro, ma mesekei oro badeh, asehek boho kon randra doh, randra doh.

⁵Ya udu Jerusalem badeh, iri Juwis ta atudun Kindrei badu kon mari manyah ado aliy.

⁶Eme iri anuhun kurutuwe lakou doh badeh, iri arou ame. Tasah, iri ari ari badeh, boho iri asak ta anuhun oro badeh, asehek sahou na boho kon tiri mari.

⁷Eme mani iri atur labai, ya iri lomondra ma anya, “Oro lau asehek sahou kede-eh badu Galili o?

⁸Arile, i buku sah ja to anuhun oro asehek sahou na boho kon ta to mari?

⁹To badeh, badu kon munyak tinan Partiya, Midiya, ma Elam. To ale badu kon munyak tinan Mesopotemiya, Judiya, Kapadosiya, Pontus hawe Esiya.

¹⁰Ma to badeh, badu kon munyak tinan Prijiya, Pampiliya, Ijip, hawe kon rayah badu Libiya udu mirihik ta kon Sairini. Ma udu ndrokowa to badeh, iri lau badu Rom adek ame dah ale.

¹¹Ma to badeh, Juwis hawe oro lau badu leheleh ala a-en hamon ta leheya tiri Juwis; ma hawe to lau rayah badu busu Krit hawe badu kon munyak tinan Arabiya; badeh, to mari anuhun sahou nyarahan ta lahou tinan ta Kindrei oro asehek i boho kon ta to amwenen.”

¹²Eme ya mani iri atur ma budon tiri bameles bwe, ma eme iri ndremenya anya, “Lakou dah, asahan i buku sah handru?”

¹³Arile iri rayah badeh, bobose oro anya, “Oro kede-eh, a-un waen solo-an labai.”

¹⁴Ano Pita suri iy ere loken hawe oro ma ronoh ari dah, aloh i tinan ma asehek sahou i tiri anya: “Ado nadu tine badu Juwis ma hawe ado lau mari areu Jerusalem dah, ndranye ado kasak, ya jo kasehek kaleu kewek tado.

¹⁵Oro lau dah badeh, ba-un gwa boto-on bwe. I buku bale ado badeh, bwe. Kon mandraben kahis le oh, mada an barala ndro ari adeh!

¹⁶Arile, idoh lakou mene propet Jowel asehek nyala aliy:

¹⁷“Kindrei anya, ‘Suniya len anya kano kameh, jo kameh solowei Malawik i la-u lau mari badu kon munyak. Ya iri nadu ado mwan ma badih kameh asehek sahou i buku iri propet, ma iri lau loweu tado kameh amekes lele, ma hawe oro lau tado ndrala bada ndramak kameh ameh solo-an.

¹⁸Ma hawe oro lohowan tek mwan ma badih na len eme kameh, jo kameh solowei Malawik i la-u oro, ya oro kameh winiyan asehek sahou i buku iri propet.

¹⁹Jo kameh leheya kalem udu bada kandrah loken, ma udu bada munyak andri ale. Idah kameh, ndra ma hawe jih ma hawe kasu-er hutuwen kameh asahan.

²⁰Ya an kameh amak ma kon ilik, ma bun kameh asaram i buku ndra. Ya lakou doh kameh asahan bwena op. Ano len tinan ta lomadan ta Laban asahan.

²¹Ya lau amekes salom na nyara Laban ma ndremenya iy ta seben kameh, iy winiyan sebenei iri.’

²²“Ado lau badu Isra-el kanuhun sahou doh. Jises Krais badu Nasaret mene, Kindrei suni iy ewek hawe ado. Ya iy mene amekes lahou tinan ma amekes kalem tinan na boto-on ta Kindrei edeu i tan udu ndrokowa ado. Ya ado tanan iy.