Aposel 2:24-39

²⁴Hapeko Ngindrai ihingini yiy pe itine paiwe, pe itali yiy isa mawen ngandran nopwaran para kimat. Paratesah, kimat ara kinwenei para kikaituwe yiy pwi.

²⁵Tepit iwong hape iyatan mamu, ipa, ‘Yo ngara kunime Yapan kiro pakeh kili yo lang masih. Kinlahiy para hapesah kipanohowani yo pe kulelen ara pwi. Paratesah, yiy ara iripo ndrahaso iyapwen te nimo mot.

²⁶Tehen tora ko, ndriyo ara ipwes, pe kalame ara irawuloh; nombuwe ara iripo mwoimwoi pe iripo hinehes iya sehe melit itapo isa.

²⁷Wou anlahi atali mwoiwo kiro ndrohonoku hu suw pe koyum kimayit to ara pwi yoh. Pe andre antali ndramat haiyan tam mepo antakiniman, para kipwala ara pwi yi.

²⁸Wou anpwaingani saya taleh pwen kinsa kili yo. Andre aiki pwesai kipep kisa kili yo; ndroiyin ara ko urupo mbulmaram.’

²⁹Wawu nali, nakuwong imwonen kisa kili wawu kiyata tumburou Tepit. Yiy ara kinimat pe hu kantoni yiy, pe ndrohonokun mepo huroni yiy iya aliy ara iripo mwalingarou, ipoo isa matne lang mahapo.

³⁰Hapeko Tepit ara yiy poropet hamou, pe yiy ipahasaniy tehe Ngindrai kintandrangan tehe ndrayen hamou kamulan andre kiwiri nokun tehe king.

³¹Tepit ara kinnimei pwen, koluw mamu kinna, sehe melit nakirayah kamulan; pe iwong iya kimat pe titine ta Kristus—tehe yiy kinto ndrohonoku hu suw pwi, pe nombuwen, ara kinpwala pwi.

³²Yowu ndramat masih aripo, yowu kannimei pwen, pe yowu ropo tiyaniy isa kili wawu, tehe Ngindrai ara kinhingini ndramat Yesu aro, pe kintine paiwe.

³³Pe Ngindrai kiniwiri yiy kinna paingan pe imirampwan niman mot. Pe yiy iwiri Mwoiwan Haiyan iro kili Taman mepo kintandrangan kinna aliy, pe itilingi sehe melit mepo wawu topo hilingiy, pe topo nimei kene.

³⁴Pe Tepit ara kinna kol paingan yang mapu, hapeko ipwai, ipa, ‘Yapan ipwai iya kili Yapan to, ipa, “Asampwan kapwen te nimo mot,

³⁵kipoo, kuiki hu hiyeh huhingasi wou, ara hu kaya pahandra ndrikam.” ’

³⁶Tehen tora ko, wawu payumwa wum masih kene para Yisrayel, akapahasaniy hiyan tehe Yesu mepo wawu rayi yiy imat iho kei tondrih, ara Ngindrai kintakiniman pe kintayah Yapan pe Kristus kene.”

³⁷Pwen yihu ndramat masih ara huhulingi Pita iwong pe nongnan ara iwiri lohongahu imwonen, pe husok yiy iyapolo hu aposel, hupa, “Wawu nali, yowu andre kambusiy tehen tapeh?”

³⁸Pe Pita isomwi hu, ipa, “Akarapaiwani ndriya wawu masih, pe akawiri paptais, kiya ngala Yesu Kristus; para Ngindrai kitali hu pakut mwomwan tawawu kayau. Pe wawu andre kawiri Mwoiwan Haiyan tehe yukyuk.

³⁹Koluw Ngindrai kinpwatisingiy tehe andre kiyki Mwoiwan Haiyan kisata wawu pe noru wawu hu, pe hu ndramat hutora mawen kili wawu, pe kisata hu mepo Yapan Ngindrai andre kiyoh hu.”