Aposel 2:11-32

¹¹syeꞌ poi lenge Juta, topoꞌme lenge haiten ŋaiye bunjenge ŋoihmbwaip tahar jande lotu lenge Juta, tinge yase Krit topoꞌe Arebia yat, kom poi lalme masande tinge yenge wusyep ŋimeser poi ilyeh ilyeh tongonose yanange wah embere ŋaiye Got ŋende.”

¹²Tinge ŋoihyeryembe wula wula pe, tinge plihe yisilih yale yat tititinge na, “Liki ŋaimune?”

¹³Kom lenge mitiŋ syeꞌ yende wi me lenge miyeꞌ uku yanange na, “Tinge yonoꞌe pinip wain ti, tinge yende kwite kwote kuli!”

¹⁴Miꞌe pe, Pita top lenge aposel 11 tahar jan hlaꞌ pe, kin yohe timbiya gahme lenge miyeꞌ tuweinge ŋaiye jahilyeh na, “Hei, yip Juta topoꞌe lahmende ŋaiye yarp ya yoto Jerusalem, mungwim gale si no, ma mini yip ŋai tehei kin!

¹⁵Poi yukur monoꞌe pinip kwote taꞌe ŋaiye yip ŋoihyeryembe. Leꞌe teter hondonge, ŋau nambaꞌe syepumbur hoye hoye.

¹⁶Kom leꞌe taꞌe wusyep tikin Joel, profet tikin Got ende, ŋaiye somohonme kin ŋanange.

¹⁷Kin ŋanange taꞌe leꞌe na, Mindemboi, ŋup yuwo pe, Got ka uruꞌe Yohe Yirise kin e guh me lenge miyeꞌ tuweinge lalme. Lenge lahmiyeꞌ yip topoꞌe lenge lahtuweinge yip, ka yininge wusyep tikin Got tuꞌe lenge profet. Pe Got ka asambe lenge lahyambe yip yipihinge supule, topoꞌe ka asambe lenge miyeꞌ bworenge yip yate tange.

¹⁸Dindiꞌ ŋup uku pe, Got ka uruꞌe Yohe Yirise kin e guhme lenge miyeꞌ wah kin topoꞌe tuweinge wah kin pe, tinge ka yininge wusyep Got tuꞌe lenge profet.

¹⁹Kin ka ende mirakel si e unuh ŋaitem, topoꞌe ka ende wutuꞌ ambaran si e guh kekep no, pa yetekeꞌe yoworme. Pa yetekeꞌe wim topoꞌe nih pe, nihnom ka ŋembere gumunge supule.

²⁰Na nah ŋaitem hlaꞌ pe, ŋau ka imbilme tuꞌe ŋaiye ŋup el yepelmbe supule. O wundehei ta wimbilme yaihe tuꞌe ŋaiye wim. Lahmborenge ka ember ŋaiꞌe ŋaiꞌe tuꞌe luku ot yer ti, ŋup uku ŋaiye ka ot pe, ŋup uku ka bongol yirise supule.

²¹Kom lahmende ŋaiye ka yuwor yilme Lahmborenge nange ka ungwisme tinge pe, Got se ka ende.”

²²Pita plihe ŋanange na, “Miyeꞌ tuweinge lenge Israel, yisyunde wusyep eꞌe! Jisas, miyeꞌ Nasaret uku, kin miyeꞌ ŋaiye Got nalaŋatme kin ŋaiye kin ŋende wah bongol supule, mirakel topoꞌe wutuꞌ supule taꞌe ŋaiye yip si yasande yetekeꞌe. Liki ki yasam yip nange Got naŋaꞌe bongol luku nal me Jisas topoꞌe kin nember kin nat.

²³Got nember Jisas nal syep yip ŋaiye yip yututusme lenge wachaih ŋaiye yukur jande wusyep erŋeme ŋaiye ka yuluwei kin yil loutungwarmbe. Got kin si sisyeme ŋaiꞌe ŋaiꞌe luku ŋaiye ka ot.

²⁴Kom Got plihe ŋahraꞌe kin pe, kin narp hlaininge. Yukur kin narp taꞌe miyeꞌ nule no, yukur tatame ŋaiye nule ka orpe kin, pakai.

²⁵O taꞌe Dewit somohonme ŋanange wusyep me Jisas. Kin ŋanange na, Ŋam sisyeme Lahmborenge gan siheime ŋam nyermbe nyermbe, yukur ma tumbe.

²⁶Ŋoihmbwaip ŋam hriphrip supule pe, ŋam miri musukwarme Got. Ŋam sisyeme nange nin se na plihe ahraꞌe wahriꞌ ŋam, ma tuhur musme nule.

²⁷Got, nin yukur na se osme ŋam ŋupe ŋaiye ma mule, topoꞌe yukur na se osme miyeꞌ wah bwore nin no, wahriꞌ kin ka nyeꞌ tihiꞌe guh ŋeheh, pakai.

²⁸Nin si pasam ŋahwikin ŋaiye ma murp nyermbe nyermbe pe, hriphrip nin na paparar me ŋam, detale, nin na orp siheime ŋam.”

²⁹Pita plihe ŋana lenge na, “Lenge toꞌ tatai ŋam, ŋam da mini yip wusyep moworme. Somohonme loumwah poi Dewit nule pe, tinge yinise kin. Tukwini ŋeheh kin eꞌe teter sai.

³⁰Kom kin profet tikin Got pe, kin sisyeme wusyep tupwaiꞌ tikin Got ŋaiye bwore mise. Got nupwaiꞌe wusyep ŋaiye mindemboi ka plihe aŋaꞌe luh tikin kiŋ Dewit el ŋambaih talah kin ende Krais.

³¹Dewit ŋetekeꞌe ŋaimune ŋaiye mindemboi Got ka ende. Taꞌe luku pe, kin ŋanange nange Got ka plihe ahraꞌe Miyeꞌ alaŋatme kin, Krais ŋupe ŋaiye ka ole. Kin yukur tatame ŋaiye ka osme Krais ka tihiꞌe guh ŋeheh, moi lenge miyeꞌ yule no, wahriꞌ kin ka si nyeꞌ, pakai.

³²Got si ŋahraꞌe Jisas pe, poi lalme manange wusyep me wah eꞌe ŋaiye Got ŋende. Detale, poi si metekeꞌe.