Aposel 2:1-42

¹Una bung na Pentikos, a kum tene nurnur rop det kis tomo un ara rumu.

²Ra a wungu tagisapat una langit i elar nama wungu ina labino wuwu, i wanpat kisin torom det, ma i ubukus pas a rumu ra det kis uni.

³Ra det tama a kum utna i elar nama kum kunkunabor ina sungun, det wan sarara ma det kis netes un det taktakai.

⁴Det rop det bukus nama Tokodos na Nion, ma det turpas a wasiso nama kum wur ngas na wasiso ra a Tokodos na Nion i pitar tari torom det.

⁵Una kum bung ra, a susut na te Juda kai det kis tiro o Jerusalem. Det a kum tene lotu, tagun a kum tamon rop una rakrakon bual.

⁶Det longoro a wungu ri, ra det kalabor pat tomo, ma i toboroboro a nuknukin det, uni det ut taktakai, det longoro anundet a kum wasiso, ra a kum tene nurnur det wasiso nami.

⁷Det rop det kisin ma det nuknuk doko una utna ri, ra det watungi lena, “Tama i, det rop ri ra det wasiso, a taro Galili kut!

⁸Asau a kibino ra dat rop taktakai dat longoro det, det wasiso nam anundat a kum wasiso ut?

⁹Dat a kum te Patia, a kum te Midia, a kum te Elam, ma dat tagitong una kum papapor Mesopotemia, Judia, Kapadosia, Pontus, Asia,

¹⁰Pirigia ma o Pampilia, ma tagitong o Ijip. Dat tagitong una papor Libia ra i milau o Sairini, ma tagitong o Rom.

¹¹Dat a taro Juda ma ara taro tagun dat ra det ruk una lotu Juda. Ma dat tagitong o Krit ma o Arebia. Dat rop dat longoro det ra det wasiso una kum lamlabino pinapam anun o God nam anundat a kum wasiso.”

¹²Ra det rop det kisin, ma i toboroboro a nuknukin det, ra det ting etetalai det lena, “Asau a kukurai ina utna ri?”

¹³Ikut ara taro det urongon un det, ma det watungi lena, “Det inum a wain ra det sipak nami.”

¹⁴O Pita i tur tomo nama noino ma ra aposel, ma i wasiso namin labino walngano torom a taro lena, “Mot a taro Juda, ma mot rop ra mot kis nin o Jerusalem, an palos a utna ri torom mot, ma mot in longoro wakaki.

¹⁵Mot watungi lena det sipak. Ikut awu, uni i lisu na pakano bung utmakai una kobot.

¹⁶A utna ri mot tama i, a poropet Joel i sa wasiso mugu taru uni lena,

¹⁷‘O God i watungi lena: Una kum ururop na bung an pitar pirso a Niong torom a taro rop. A kum nutnutu mot, a kum musano ma a wardain, det in wasiso na poropet. Anumot a kum barman det in tama a kum tamtama, ma anumot a kum takano na musano det in ririon a kum ririon.

¹⁸Una kum bung ra, an pitar a Niong torom det kai ra anung a kum tultul na musano ma anung a kum tultul na wardain, ma det in wasiso na poropet.

¹⁹Ma an ese tar a kum utna na ukisin sapat una bakut, ma a kum ukinalong nin upiso una rakrakon bual, a kum utna ra, a gap, a sungun, ma a labino mis.

²⁰In matanas in dumirum, ma a kalang in merek elar nama gap, ra numur a bung anun a Labino in nanpat, a labino bung ra, a bung na minamar.

²¹Ra det rop ra det wararing torom a Labino, in ulaun det.’

²²“A taro Israel, mot in longoro iau. An inanos mot un o Iesu, a te Nasaret. Mot ut mot tasmani lena, una dekdekin o God i pam a kum utna na ukisin, ma a kum dekdek na pinapam ma a kum ukinalong. I pami epotor torom mot, sur o God in ese i torom mot lena, i ut i tulu ru i.

²³Di pitar tar o Iesu torom mot, elar nami ra o God i sa tasman mugu tari, una nuknukino. Ra mot tomo nama kum sakino taro, mot sak wati unin nanai kutus.

²⁴Ikut, o God i ukatutur melet pasi, ma i los ru a minat gusuni, uni a minat ke pam ukai lar pasi.

²⁵O Dewid i sa watung tari un o Iesu lena, ‘A tasmani lena a Labino i kis bolbolos tomo nam iau. Kan neder, uni kuri i una sot na lamang, i udekdek iau.

²⁶I mo ra in balang i gas doko, ra a wasiso nama gasgas, a nurnur lena un ulaun melet a pining.

²⁷Uni kon madek tar iau unin nutung na minat, ma kon madek tar anum a Tene Tasur sur in mereseng.

²⁸U sa ese tar iau una kum kisapi sur an los a nilaun. An kis tomo nam ui, ma un ubukus iau nama gasgas.’

²⁹“A kum tistising, an wasiso talapor torom mot un o Dewid, a tubundat tagun numugu. I sa mat ma di sa por ru i, ma anun a kulam na minat kuri ut nisan dat tuk uniri.

³⁰Ikut o Dewid a poropet, ra i tasmani lena, o God i sa liliman dekdek taru toromi lena, i ut in ukis tar taio tagun a kabotaro anunu sur in kelesi una nun a kiskis na king.

³¹O Dewid i sa tasman mugu tar a utna ra in nanpat, ma i watung a wasiso ri una nilaun melet anun o Karisito, lena ka din madek tari unin nutung na minat ma a pinino ken mereseng.

³²O Iesu ut ra, o God i ukatutur pasi gusun a minat, ma met rop met tama i, ra met wasiso talapor uni.

³³Di ulabo pasi ma di ukis tari una sot na laman o God, ma o God o Tamano i pitar a Tokodos na Nion toromi, elar nami ra i uliliman tari nami. Ra uniri o Iesu i sa pitar pirso a utna ri, ra mot tama i, ma mot longoro i.

³⁴O Dewid ke wan usapat una langit, ikut i watungi lenri, ‘A Labino i watungi torom anung a Labino lena, “Un kis una papor sot na lamang,

³⁵tuk ra an winim pas anum a kum ebar sur det in kis utuntudu in anum a warkurai.”’

³⁶“I mo ra mot a taro Israel rop mot in tasman wakaki: O Iesu ra mot sak wat tari unin nanai kutus, o God i sa ukis tari sur i a Labino ma a Karisito.”

³⁷Det longoro a wasiso ri, ra i so a balandet, ma det ting o Pita ma a kum aposel lena, “A kum tistisi met, asau met in pami?”

³⁸O Pita i balu det lena, “Mot rop taktakai mot in nukpukus, ma din baptaiso mot nama risan o Iesu Karisito, sur din unus ru anumot a kum sakino petutna, ra din tabor mot nama Tokodos na Nion.

³⁹Uni a etabor ri ra o God i sa uliliman taru uni, in nan torom mot, ma torom a kum nutnutu mot, ma det utkai ra det kis bakbak. In nan torom det rop, ra a Labino anundat a God in kabo pas det toromi.”

⁴⁰Ma i utumarong det nama susut na wasiso kai, ma i udekdek det lena, “Mot in tumarong, ma mot in nan gisen gusun a sakino petutna anun a taro tagun uniri, sur gong mot los a warkurai na minabalu.”

⁴¹Det ra det mur a wasiso anun o Pita, di baptaiso det. Det elar nama tulu arip det, ra di luk tomo det nama kum tene nurnur.

⁴²Ma det pitar tar anundet a nilaun una etowo anun a kum aposel, una kinkinis tomo nama marmaris, ma una inangon tomo, ma una niaring.