Aposel 2:1-35

¹Sain Pentikos naa isi di, idi ganan modoũ tekelei bun, guru de dibodon.

²Idi an dibod mog, kaisã bagai, ait yau totol ado gugu redig gen, saa ilun tamal isi fen, fõ aab ino yalen.

³Idi ereb yã bale gen isi di, dile mog, fara furu feid, idi mugu mugu tetedin ibodon.

⁴Age fe di, idi ganan Awa Uur Fateulem aura fiyẽdi di, gariya dino, od fire fire bunem wogõ den, Awa Uurem fiyẽdi di, age difen.

⁵Sain anĩ bun, Juda tamo Negur nigin momoi den idi, teneub ganan bun temeleid disi, Jerusalem dibodon.

⁶Sain idi ait anĩ karĩ de fen, tamo kayau musei idi nene de fen, guru difen, ere nigin, idi mugu mugu dogo neid od bun wogõ den anĩ karĩ den.

⁷Idi fatuk bagai terẽ de fen, diron, “Tamo od wogõ def eneidi ganan, Galili temeleid sã de?

⁸Naig fe di, ada mugu mugu, idi neda od bunem wogõ de di, karĩ tauf?

⁹Ada fire firen temelada, Patia, Media, Elam kantri, Mesopotamia, Judia distrik, Kapadosia, Pontus, Asia provins,

¹⁰Frigia, Pamfilia distrik, Isip kantri ado Libia distrik tunĩ Sairini taun non. Amã tunĩ Rom kantri temelamã, Juda temeleid ado haiden Juda neid momoiya bun falei maun,

¹¹Krit nuyo ado Arabia distrik. Ada mugu mugu neda od bun, Negur kabĩ odug age fen anĩ wogõ de di, karĩ tauf.”

¹²Idi terẽ de nene de fen, abob toti difen, “Eĩ ere gariya nigin?”

¹³Anĩ ere, tunĩ idi weli difiyeĩd diron, “Idi wain fatuk domõ.”

¹⁴Pita aposel ilewen geid difar fen, ait odugem tamo kayau wogõ fiyẽdin, “Juda tamo kayau ado ã ganan Jerusalem ubodõgef, utorõg len, aya ã enei faded ayeĩf, kee releg fen, aya wogõ auf anĩ karĩg.

¹⁵Ã kisi gef, tamo eneidi wain domõ gef, age fiya sã, gama eĩ nain kilok bonimei!

¹⁶Anĩ ere, eĩ are Profet Joel eig ye wogõ yen:

¹⁷“‘Negur irok, idikeleya naa bun, aya neu Awa Uur, tamo kayau ganan bun gõ afalauf. Age afe di, ãgenei kesu, kayau momoul ado, profet od wogõ douf, ãgenei tamo gaũ meleid bun seleulã kurã fouf, ãgenei tamo tubau dimĩdiyouf.

¹⁸Neu ferfer tamo ado kayau geid buneg, aya neu Awa Uur naa anĩ bun gõ afalaisi di, idi profet od wogõ douf.

¹⁹Aya saa ilun, memelik fire fire afelnẽdiyouf, tenebur ein uris anodiyouf. Naud, yã ado, kaau tubutubuya wõ youf.

²⁰Odug nẽ Naa odug fula fiya medeĩya ado, fau to isi mog, gaa gugum kele fen, ogõ naud gen wõ youf.

²¹Age fe di, aib taka ĩ, Odug yana yale iweignẽf are, Odug ĩ kel yalouf.’

²²“Israel tamo kayau, od enei karĩg, ã aug keleĩ, Negur ã atun, Jesus Nasaret tamal bunem memelik, ereb urug bagai ado, uris inodin, anĩ bunem Jesus ĩ Negurem sur fiyen anĩ, Negur ã ifelnein.

²³Tamo enei nigin, Negurem ereb ereb wõya sã mog, yogon keleĩ ado kisi bunem, ĩ ã imeĩ bun inon, age fe di, ã tamo sesenem disenneĩ di, ĩ laa fouf nigin, aa tetek bun tuti nem ũgen.

²⁴Anĩ ere, Negur ĩ laa bun tamal turĩ fe di, mata kel fã yen, laa nẽ darau bun tamal yalelnen, ere nigin, laa anim ĩ irounẽya kisi feleya sã.

²⁵Are Dawid ĩ nigin iron: “‘Odug sain faimud malau bun ifar mog, ailedig. Ĩ aya imau biyalem ibodok nigin, aya to kumĩ au fen, terẽ auf.

²⁶Anĩ nigin, neu wau seref fen, sigorou seli abidig, aya, ereb Negur aya bun biya age fouf anĩ tari afedig,

²⁷ere nigin, õ neu malaukanon to utornẽ di, bouwau laa neid modoũ bun ibodõf, õ ogon Fateuleg to utorõ di, bura lauf.

²⁸Õ mata bun ileya nẽ naab ufelna fen, õ malã bun kulĩya barikã wiyauf.’

²⁹“Turau tar, aya ã yaor arokeneik, tubuda Dawid ĩ laa fe di, mũ difen. Yogon matmat, ada atun naa enei bun fau ibodok.

³⁰Anĩ ere, ĩ profet taka, anĩ nigin, ĩ keleĩ, Negur wau kuturol fen, Dawid yogon ibor nẽ tubu tar bun tamal taka, yogon king nẽ sia bun inenẽf nigin irokenen.

³¹Dawid ĩ ereb fau wõya sã mog, anĩ tetunem ile fen, Kristus mata kel fã youf nigin eig ye wogõ yen, ‘Ĩ laa neid modoũ bun to ibodõf, ĩ bouwag to bura lauf,’ yen.

³²Negur Jesus enei turĩ fe di, ĩ mata kel fã yen anĩ, amã ganan mailen.

³³Negur ĩ ima biyalem yalesnẽ di, Jesus ĩ, Tama bun Awa Uur Fateul Negur afeneĩf yen anĩ yale fen, fi felen, are ã gama ulegef ado karĩ gef anĩ.

³⁴Dawid saa ilun to iselen, anĩ ere, ĩ iron, “‘Negur neu Odug irokenen: “Imau biya melem ubod mog,

³⁵ogon kiwai tar ogon ye inoya nẽ sawa anodiyouf.” ’