Aposel 26:3-19

³Arile, ou ndratanam kandriyen tahi Juwis marakon, ma ou ale tanam iri rayah a-en hamon ta budon ari labai, ya iri rayah ja tebelese na sahou, ma iri a-en hamon ta budon ari ja. Sebwe, ou kameh winiyan anuhun sahou tek dah.

⁴“Ya, i buku doh, iri tinan ta atondrok kandriyen tiri Juwis marakon badeh, ndratanan manyah tek, mene jo ma loweu manyah udu kati kon amwenen, ma jo eme akohok tanan udu Jerusalem.

⁵Iri ndratanan jo ndra bwena labai. Ya, buku oro aso-ok, oro winiyan asehek nyala iri lahou jo ndramekes udu bolo tukum tiri. Bwena mene jo Parasi ari ai; kandriyen tiri badeh boto-on labai, ma jo amekes lahou in hamon ta kandriyen tiri.

⁶Eme ma, jo ales ere mada sahou dah, tasah jo atondrok ma atehei budon tek mara-ei in ta sahou tandrakan ta Kindrei, iy atehei ndra bwena i ta tubu ahi iri.

⁷Iri boho kamen tahi ma ronoh la-uh atondrok ta akohok tandrakan badeh, asahan. Iri atudun Kindrei na len ma ben mari, ma iri atehei budon tiri mara-ei handru ta iy winiyan mete-ei iri lau ndramak ame loken ame awas ja. O, kabin tek, jo ale atehei budon tek mara-ei in ta atondrok lakou doh. Ta kati sahou le doh, bwidi iri Juwis orowei sahou eme tek.

⁸Buku sah handru, aha rayah abudon buku, taha satehei budon tataha sala ta Kindrei, ta iy kameh mete-ei iri lau ndramak, kameh amak ame awas ja?

⁹“Aha kanyolom! Bwena mene jo amwenen badeh, ales boto-on labai ta amekes iri gok solo-an, solo-an ta sa-en hamon ta sahou ta Jises badu Nasaret doh.

¹⁰Jo amekes iri gok doh udu Jerusalem. Jo akohok sahou ta ateu lau badeh, badu mine tinan tiri pris badu Juwis, ma jo bawei iri lau nane a-en hamon ta Jises badeh, solo-an labai ala bolo asiu lulik. Buku iri Juwis atehei iri rayah ala ta mada sahou ta adai iri ta amak badeh, jo amwenen ale udu aliy edeu minek ta adai iri amak.

¹¹Ma len solo-an badeh, jo iu ili bolo asiu ta atukum tiri Juwis, ma jo abwiyeh iri lau ta Jises doh. Ma jo atehei sahou ili ta lau rayah ta a-um iri, ma nohowa iri ta iri kabobose Kindrei. Eme ma ndrinek ibolosen labai, ma jo in hamon tiri ili, ili bolo iri kon udu len labai ta Jerusalem.

¹²“Ma jo mene amekes gok i buku doh, ma iri tinan tiri pris badu Juwis badeh, atehei la-ukei ramen eme minek ta atiye kili kon tinan Damaskus ta ateu iri lau ta Kindrei kala bolo asiu lulik.

¹³Ndramak tinan, an ndrame loken ndrare le alih. Jo badeh, edek san, se nawin bwe jo anyolom lomada sun ari udu kandrah eme andri. Sun doh lomadan boto-on ma tinan labai ja ta an. Sun doh anya eme bwele-ek, ma hawe oro lau rayah nane adek hawek.

¹⁴Aso mari atarah ala bada munyak, ma jo anuhun boho ndramak ari aloh jo i boho iri Hiburu i buku doh, ‘Sol, Sol, tasah handru, ou anya adai jo kimek? Ou badeh, bwese maha-an ma sisi-in ta kandriyen, buku ou le amwenen morohani katim i ta lakou madan labai.’

¹⁵“Eme ma jo asumon bohon i buku doh, ‘Laban, ou are badeh?’ Eme Laban asehek i buku doh, ‘Jo Jises, ou nane abo gok ta adai jo kede-eh.

¹⁶Arile, ou suri ou, ma ou ales. Nadah, jo ewek hawem, atehei ou ta amekes gok tek. Ma ou kameh atiye sahou ta iri lakou nane ou ndranyolom, ma ta iri lakou jo kameh leheya ou ta aliy.

¹⁷Jo kameh sebenei ou, buku ou ala ado bolo iri lau tam amwenen, ma iri lau leheleh. Jo kameh suni ou ala bolo iri,

¹⁸ta aseh mada iri ilik kanyolom kon ja, ma iri katubuni kona iri kili ta boto-on ta balik, kili hamon ta Kindrei. Kindrei kameh mani kandriyen ndra-in tiri mara-ei, ma iri kameh winiyan akohok kon hawe iri lau nane asahan ndrabun, i san ta iri atehei budon tiri in tek.’”

¹⁹Pol asehek ili le i buku doh, “O kabin Agripa, jo bala bwalek ta lakou badu kandrah mene jo anyolom ma anuhun bwe.