Aposel 21:28-36

²⁸Ma det kukukuk lena, “A taro Israel, mot in warut met. A musano ri, i ususer a taro rop una rakrakon bual sur det in nget dat, ma a Warkurai anun o Moses, ma a rumu na etabor. Ma i sa ben ruk pasi kai a taro ra awu sur a taro Juda urin una rumu na etabor, ma i sa udur ru a rumu ri anun o God.”

²⁹Det watungi lenri, uni numugu ut munung, det sa tama tar der nam o Tropimus, a te Epeses, tiro una tamon, ma det nuki lena o Pol i ben ruk pasi una rumu na etabor.

³⁰Ma a taro rop det purpuruon ra det kalabor tomo, ma det pam ukai pas o Pol, ra det dat pirso pasi tagun in noworo ina rumu na etabor. Uniutra det tagar ru i mut a kum matansako.

³¹Milau mukut det in um doko o Pol, a wasiso i wan sur a labino mugumugu anun a taro na inaim tagitong o Rom, lena a taro Jerusalem rop det sa purpuruon.

³²Uniutra i ben tomo pas a taro na inaim ma anundet a kum mugumugu kai, ma det kalabor pirso torom det. Ra a taro det tama a labino mugumugu ma a taro na inaim, det mana nama inaim gusun o Pol.

³³A labino mugumugu i wan torom o Pol, ma i dat pasi, ra i itula sur din ker ukai i nama ru sen. Ma i iting lena, “Osi na musano ri? Asau ra i pam raro tari?”

³⁴A ramano taro tagun a kunur na taro det watung ara wasiso, ma ara taro kai det watung ara wasiso gisen. Ra a labino mugumugu i itula sur din ben pas o Pol utiro una rumu anun a taro na inaim, uni, ke talapor lar pas una kibin a labino purpuruon ra.

³⁵Ra o Pol i wanpat nisan a leta ina rumu, a taro na inaim det los pasi, uni a kunur na taro det balano sungun doko.

³⁶Ma a kunur na taro ra det mur det, ka det mana nama kukukuk lena, “Sak doko i!”