Aposel 20:15-38

¹⁵Ano i bada len ari ja badeh, aso alakak ala asos Kiyos. Ano na len ari ja badeh, aso alakak ala bilisiu ala Samos, ma na len ari ja badeh, aso asos Miletus.

¹⁶Eme Pol atehei budon ta aso kasakalawi Epesus ta teleya aso badeh, sare loboho munyak tinan badu Esiya sado luluwen. Tasah, iy ibotatahan ta ili isos Jerusalem na len tinan ta Pentikos.

¹⁷Eme Pol udu Miletus badeh, suni sahou i tiri batun tiri lau ta budon handru in ta Kindrei badu Epesus kame katou iy.

¹⁸Eme iri asahan badeh, iy tiye i toro i buku doh, “Ado badeh, ndratanan bolo manyah tek ma mwena handru kabatana jo eme udu hawe ado eme eme taku len dah, udu loboho kon tinan badu Esiya.

¹⁹San solo-an iri Juwis atilik sahou ta anya kanone jo ta bolo lahou jo amekes, eme ma, kandriyen tiri doh bwidi ndrinek maha-an labai, ma jo eden ta aliy san solo-an. Arile, i buku iri atehei nyarak i andri, jo babudon ta aliy bwe, jo amekes le lahou ta Laban.

²⁰Ado badeh, tanan jo babisiniy ta atiye sahou ta aseben ado se bwe. Arile, jo badeh, asehek udu mada ado mari ma hawe jo ili asiu ra-em i ra-em.

²¹Jo badeh, asehek i ndranye iri Juwis hawe iri lau badu Grik katubuni ndrine iri ta kandriyen ta karei ma lomondra ndra-in tiri, ya katehei budon tiri handru ki ta Laban tataha Jises.

²²“Ya na dah jo in hamon ta boho Malawin Ndrabun, jo kameh ili Jerusalem. Ya jo bala tanan ta sasah katok badak udu doh bwe.

²³Jo le badeh, tanan ta Malawin Ndrabun ndrabatanau jo ta i buku jo ili bolo kon tinan mari, idah kameh, maha-an hawe a bolo kou udu aliy abe-en jo.

²⁴Arile, jo badeh, balek basin ta kohak bwe. Jo le badeh aseken ta jo kisos bilisiu ta bolo sakaliye tek, ma kamesekei kano lahou Laban Jises ndratehei kanik. Lahou doh ta atiye sahou mwasin ta nyala tikisiy ta Kindrei, ma ta leheya eme lewan.

²⁵“Ya, jo mene edek ewek bolo ado atiye sahou ta nyala tondrok ta Kindrei. Arile, na dah jo tanan idah kameh, ado winiyan banyolom jo ja bwe.

²⁶Ya eme na dah jo katiye tado kamwenen, ki buku none ado ari kamak, jo winiyan babwese maha-an ta aliy bwe.

²⁷Tasah, jo badeh, babisiniy ta tiye seken mari ta Kindrei ewek tado bwe.

²⁸Ado badeh, katondrok ado kamwenen, ma hawe katondrok lau ta Kindrei mene Malawin Ndrabun atehei iri ado baha tondrok tado. Ado badeh, a buku lau ta atondrok sipsip, ado katondrok iri lau ta budon handru ta Kindrei, ala iy mene konohei iri na ndraye nadun amwenen.

²⁹Ya aha katondrok iri kamwenen, tasah hamon kameh jo ruwani aha, idah kameh lau solo-an ndra-in ame bolo aha ta tobolowe budon hawe manyah taha. Ya kandriyen tiri kameh i buku iri mwi badu lokei ame atikah iri nadu sipsip.

³⁰Ma na len eme kameh, lau rayah badu bolo ado badeh, kameh tebeya wasai ta aliu iri mwan ma badih ame len ta budon handru, ma ta iri ka-en hamon toro.

³¹Ya eme mada ado badeh, kaleu! Ado badeh, ndratanan, na jaha taloh mene jo ndrabatanau ado na ben na len ta aliy. Jo batanau ado ma wa-i madak amou ta tikisiy.

³²“Ya eme ta sendrehendreh ta aliy, na dah jo edeu ado ala baha tondrok ta Kindrei, ma jo aseken ado abudon sahou ta nyala tikisiy tan. Ya sahou doh kameh winiyan mesekei ado abadok, ma winiyan amekes kandriyen tado ki mwasin winiya ado akohok manyah mwasin, Kindrei ndralebelei ndra ta lau tan.

³³Jo badeh, bawasai ta akohok ra-ei kolau tado ma hawe bakohok ari silba hawe bek nyikilikin bwe.

³⁴Aha amwenen ndratanan jo badeh, ibo gok ma asilah luk ta atondrok jo hawe oro lau are hawek.

³⁵Ma udu bolo lahou tek mari, jo ndraleheya aha ta san ta kandriyen ta amekes gok boto-on, aha kaseben iri lau nyamu iri bwe. Ma taha kabudon sahou mene Jises asehek i buku doh, ‘Are ndramak, iy edeu lakou ili tare lau, iy badeh, sekesek tinan handru. Ma sekesek ta iy ndramak nane akohok lakou winiyan basakalawi sekesek ta iy ndramak nane aseben iy bwe.’”

³⁶Sahou ta Pol ano le badeh, iy atehei bwili ndru-un i andri hawe iri mari, ta adeu salom ma wurah i ta Kindrei.

³⁷Iri marakon tawi iy, ma iri aden, iri tikisi iy tinan labai, ma iri bwale iri iy iu.

³⁸Iri badeh, tikisiy tinan labai ta iri sahou nane iy asehek tiri anya, iri kameh winiyan banyolom madan ja bwe. Eme ma iri tiyani iy ili isos bolo ndron.