Aposel 1:3-18

³Udu hamon ta imek tan ja badeh, iy leheya iy amwenen i toro lau doh, ma leheya lahou solo-an i mada oro ta iy badeh, ndramak ndrame awas ja. Iy badeh, asahan hawe oro udu bolo len ma hanoh (40). Iy asehek sahou i toro ta nyala tondrok ta Kindrei.

⁴Ya udu bolo tukum toro ari ja, iy udu hawe oro aimon nyamon, ma iy batanau oro i buku doh: “Ado badeh, sa-au op, ado kado Jerusalem kado kabe-en ndramas tado Malawin Ndrabun. Tama mene tandrakan i tado mene, ado anuhun jo asehek nyala aliy.

⁵Tasah, Jon mene inyu ado na gwa, arile len rayah iu, ano kameh, ado anyu na Malawin Ndrabun.”

⁶Eme na len oro atukum badeh, oro ndremenya iy anya, “Laban ei, na len dah kameh, ou atudun tondrok ta Isra-el ja ai?”

⁷Eme iy tiye i toro i buku doh, “Len ma sasah asahan kameh, udu mine tama le ari. Idoh badeh, ta ado katanan ta aliy bwe.

⁸Arile, ado kameh akohok boto-on na len Malawin Ndrabun kameh ewek la-u ado; ma ado kameh atiye sahou tek ili Jerusalem, ili Judiya, ili Samariya, ano kili kon munyak mari.”

⁹Eme iy asehek sahou doh i toro ano le badeh, Kindrei kuhi iy udu mada oro iu i loken, ma asi jor turuki iy amai ta mada oro.

¹⁰Eme mada oro badeh, udu le tan, ma iy iu i kandrah. Ya eme suwi suwi badeh, uru lau la-uh asini awin belen mara-ei ales udu ka-u oro.

¹¹Eme uru anya, “Ado lau badu Galili. Ado ales ado kede-eh, anyolom i kandrah, ta sasah handru? Iy ndramak Jises le doh, kameh, ado anyolom, andrei iy ndra-au ndra kandrah; idah kameh, ado anyolom iy eme andri ja kameh i le buku none ado anyolom iy i loken doh.”

¹²Ano oro adek ado bwili ndrondro-ou Olip ala hamon ala Jerusalem. Ya ndrokowa bwili ndrondro-ou doh kilomita ari udu len ta kon tinan Jerusalem.

¹³Eme oro asos badeh, oro ala loken a bolo asiu mene oro areu aliy. Oro lau areu aliy badeh, Pita, Jon, Jemis hawe Enduru, Pilip, Tomas, Batolomiu, Metiu, Jemis nadu Alpeyus, Saimon Selot ma hawe Judas nadu Jemis.

¹⁴Oro mari atukum ame se ya oro atehei budon toro i randra le i ta salom. Ma hawe oro badih rayah hawe Mariya tine Jises hawe nadu tine Jises ale udu hawe oro.

¹⁵Eme na len doh badeh, Pita ales ere loken bolo iri lau ta Kindrei, kane iri ma rinek lunoh (120),

¹⁶ma iy tiye anya, “Ado nadu tine mwan ma badih, sahou ta Kindrei mwena mene Malawin Ndrabun mene ndratiye udu boho Debit tiye nyala Judas mene udu bwena tiri eme ateu Jises badeh, ndrasahan handru.

¹⁷Judas badeh, mene badu hawe to ta amekes lahou dah.

¹⁸Eme Judas badeh, sihinei munyak na luk, tasah ta kandriyen ndra-in tan; eme iy taku i andri ma imek ya ndrinen asikak ma ndrinen talou eme len.