Aposel 19:8-41

⁸Juda mo hokruw-a mon kokwe, Pol hiykwe hok lopa yeyn krompri sankaw nuw-yawriy mesor kow ihey wayr-wayr. Hiykwe uwrsa mo uron me me-weih-a-weih, God so Wayr-hre-yier ko weynpaweyn me nanpanan e.

⁹Sawk Juda har mo uron mokwe krai nuw-wak, seyr homkwe Hakamay so ok kokwe hyaw nuw-wak. Sa, uwr-sa mo nene mon kokwe homkwe yor Hakamay so meyki mon ley ey me ok-piap-ok nuw-me mon-ma-mon yay. Sawk Pol hiykwe hme lokriy hain nok, uwrsa Jisas se ma nanpanan kiykiy-ay me-aw huonokyaw nok nok, hiy-ey. Hiykwe hme nion kokwe eypok poya-poya mokwe, Tiranus so skul-a mon hiy-mesor kwawk. Hiykwe Juda mo hokruw-a mon pase ma-hiy-ey e.

¹⁰Pol hiykwe enekwei hokwe yia kreys, sankaw hiy-mon sorasor wayr. Wo, Juda uwrsa o, Grik uwrsa o, kipay Esia mon ma lwayr somokwe, sawk Hakamay so ok me seme nuw-onuayk.

¹¹Enekwei sohokwe God hiykwe, mey krai non ipey-ar mokwe, Pol so iha mon meio ousne.

¹²Hankisip o, laplap o, Pol hiy ma nak-anio somokwe, God so krai ipey-ar hokwe serey po wanohyay sowkriy. Sawk omeme somokwe peik uwr-me nakey neyney kow menkin, hmo peik mokwe sa seme mon sasowriy sow kow lowpway. Seyr nowawruw, hmo owh mon ma lwak sohom seyn, hmo owh me seme lokriy hain.

¹³Sawk Juda har, niohney piap-araw me ma lanio me-su ha wayr somokwe, homkwe niohney piap-araw uwrsa mo owh mon ma lwak mokwe Hakamay Jisas so uru se mowie nok, me-su ha lokruok. Homkwe senkin me, “Hromkwe hme Jisas so uru non kiy-me-su ha, uwr Jisas sohokwe, Pol hiy ma mesor hiy non.”

¹⁴Mey senkin ma meio somokwe Skeva so ney orhey iha sirom mu-nareysyar non hom meio. Skeva hiykwe Juda mo pris karmay prueyn hiy non.

¹⁵Eypok enekwei kamon hokwe, homkwe mo senkin lon, sawk niohney piap-araw prueyn hiykwe hme senkin makiy-sahre onuayk me, “Hakwe Jisas se nonkway, Pol se seyn. Hai, homkwe sawk posokwaw mo?”

¹⁶Sawk uwr niohney piap-araw non sohokwe, Skeva so ney mo owh mon kokwe aw ar-nak-krikri-ay ha nok, hme nuw-akre akre omniy mamniy say, opion opion nop-nop. Hmo omeme owh ko mokwe seyr-seyr. Homkwe a ko mokwe owh apaw-aw nak-hakan onsau onsau nok. Homkwe pase lon-saiar e.

¹⁷Juda lowpwarowp o, Grik Efesus mon ma lwak sohom o, homkwe weynpaweyn senkin ma lousne sokwe lonuayk menkin, sa seme nuw-hok krwepakrwe. Homkwe sawk Jisas so uru se-aw ayaw-ar sehe nuw-nakie.

¹⁸Uwrsa God se ma nanpanan kiykiy-ay homkwe seyr le nok, hmo yor piap-araw me uwrsa mo inour mon ma-mesor hrorsay kow lowpway.

¹⁹Seyr uwrsa poya-poya mein-hay ma meio somokwe, hmo mamey einon einon me nake-nene nok, uwrsa lowpwarowp mo inour mon nuw-yay sowkriy mu lowpway. Hmo mamey lowpwarowp sohom mo mein-owon ko meir mokwe sankaw sor, 50,000 silva.

²⁰Yerki sohiy non kokwe Hakamay so ok kokwe sawk sokwe nuw-mesor nakian nakian nok, seyr krai non sokwe nuw-wak.

²¹Yor lowpwarowp sohom mo meyki hokwe, sawk Pol hiykwe Jerusalem mon ley e nanpanan, yier Masedonia o, Akaia o, senkin ley hain ey. Pol hiykwe senkin me “Sohiy so meyki hokwe, hakwe Rom mon ley ey.”

²²Pol hiykwe sawk hyo puar-now Timoti, Erastus leys hoh peyrmawk non-ey naruok e me-ha, Masedonia mon. Wo, hiykiaw kokwe sawk peyr kipay Esia mon kor-wak popor hain.

²³Enekwei sohiy non-aw kokwe low aiopey hay hok sokwe lousne, uwrsa hom Hakamay so yerki se ma pyay me hokuaw.

²⁴Yier serey mon kokwe, uwr prueyn, Demitrius-ok ma me, omeme me silva non lopru meyamey uwr hiy lwak. Hiykwe a-ney, god-sa Artemis ko a pekneyweys se hieyn me kor-meio say. A-ney somokwe hiykwe sawk meinowon ma-sahre nakway, sawk hiy o, hyo mey-wayh, mey liyliy-aw ma meio o, mein-owon kraiar seme nak-wayr.

²⁵Sa Demitrius hiykwe hyo mey-wayh me o, uwr, mey liyliy-aw eyn ma meio o, seme me-hokruw nok, hme senkin mekow, “Ama, homkwe nonkway, hrom mein-owon ipey-ar ma lonok omokwe, mey hromkiaw ma kiy-meio ohok ko yerki mon lousne.

²⁶Sawk uwr Pol sohokwe, hyo mey mokwe homkwe lira, seyr lonuayk. Hiykwe senkin lanio mesor wayr, god, iwar mo iha non ma meio hre somokwe, god-ar korey. Sawk hiykwe uwrsa kraiar mo uron me papo weih-a-weih kreik. Uwrsa Efesus ko me-aw korey, seyr uwrsa yier lowpwarowp kipay Esia mon ma lwak me liy-liy-aw po me-weih-a-weih prosue.

²⁷Pol so ok sokukwe hromo mey ke-aw mon piapay ey korey. Seyr god-sa Artemis ko a pekney-weys so uru se nak-mon-piapay lak. Sa uwrsa lowpwarowp Esia ko o, kipay serey serey suko o, enkin hromo god-sa Artemis ke ma me-ihey wayr somokwe, hoke lorionay ha lak, seyr hoko sa-u seirpey ke lour swasei yay ha lak.”

²⁸Uwrsa homkwe ok seme lonuayk menkin, homkwe sawk senkin seme nuw-hohuaw okre me, “Efesus mo god-sa Artemis hokwe seirpey-ar.”

²⁹Uwrsa poya-poya yier Efesus ko homkwe sa seme nuw-saw warkuw-warkuw okre me. Homkwe sa Gaius, Aristarkus leys se kiy-nuw-nekie sakawk nok, hehe suhway suhway-aw saw-owk nakey, Efesus mo hokruw-a aiopey hay mon. Uwr prueysyar sohokwe Masedonia ko, Pol se nion ma non-anio hoh non.

³⁰Pol hiykwe seyr, Efesus mo hokruw-yier mon lyawriy e mon lokruok, uwrsa popua hay mo ompok mon. Sawk kristen homkiaw me-sous.

³¹Provins sohiy so gavman makwey-uwr har, Pol so wayh ma lwak somokwe, hom seyn, Pol hiy taun so hokruw-a aiopey hay mon lyawriy lopa lwak e, me-kupaku ha.

³²Uwrsa kraiar ma nuw-hokruw konpakon somokwe, uron imnok-amnok nanpanan. Har homkwe ok kamon ke lokre me, har homkwe ok irweyk ke lokre me. Hmo kraiar homkwe, hom ma hokruw sohok ko meyk-ar mokwe nonkway nuw-wak pa.

³³Wo, Juda homkwe Aleksander se uwrsa mo inour mon me-sasay iarok. Sawk uwrsa har homkwe sa seme nanpanan, Aleksander so heyn ke hokruw pak. Sawk hiykwe uwrsa hom kumays lwak e iha nonaw nakray nakray sous lokruok, uwrsa mo inour mon hiykiaw-ayay hiy-orok-ok ke mesor e.

³⁴Sa uwrsa popua hay homkwe hye senkin lira saiarokay popriy, hiykwe Juda-uwr. Homkwe sa suhway-aw senkin arnuw-okre me, “Efesus mo god-sa Artemis hokwe seirpey-ar.” Enekwei hokwe 2 aua, homkwe ok kamon-aw-aw sokwe-aw nuw-okre me kok.

³⁵Wo, sawk kuskus taun Efesus ko hiy uwrsa me mon kueyn-yay nok, senkin me, “Efesus-uwr om, uwrsa lowpwarowp yier lowpwarowp ko homkwe mo po nuw-nonkway, taun Efesus hokwe mo god-sa seirpey-ar Artemis ko a pekney-weys o, hoko mein nonkumey ko se ma makuayk o, seme hiy-wayr.

³⁶Ok senkin somokwe unsaney prueyn okrei-ok liy me ley. Hai, senkin lwak ankin, homkwe panoke mon moryak moryak o? Homkwe kumays-aw kiy-wak e, hom yor piap-araw me nakyas ame.

³⁷Homkwe uwr omokwe erey papo kiy-hiy-e. Sawk homkwe omeme Artemis ko a pekney-weys ko me yokun lopri pa, seyr hromo god-sa ke ok-piap-ok me pa.

³⁸Sa Demitrius o, hyo mey-wayh o, homkwe uwr har me kasaw lon hohuaw lwak ankin, hromo gavman homkwe yerki non. Payhokuaw, hromkwe kot me lonuayk uwr non, seyr kot enekwei non.

³⁹Homkwe ok har non ma-lwak ankin, hokruw enekwei-ar, gavman hom ma meir sohiy non liy lohruw-a.

⁴⁰Rom mo peyrmawk liarok uwr homkwe hromo taun se kot mon hiy-ey lak. Payhokuaw, arakwon hrom weyon eyn-aw ma kiy-wakeyn wakeyn omokwe, Rom mo gavman homkwe yaprue lira pey. Kot lousne ankin, hai, hromkwe penkin me a, payhokuaw, hrom ma mon moryak moryak mokwe meyk lopa.”

⁴¹Kuskus yier Efesus ko hiykwe ok seme senkin lohruw-a kow lowpway nok, uwrsa me ma-me-ok-sanion ha.