Aposel 19:7-19

⁷Oro lau doh badeh, ma ronoh la-uh.

⁸Udu bolo bun taloh badeh, Pol ili ndrahu tukum tiri Juwis asehek sahou nyarahan labai, ma andres boto-on ta aliu budon tiri ta nyala bolo tondrok ta Kindrei.

⁹Arile, iri rayah badeh, ndrine iri boto-on labai, ma batehei budon tiri bala ta Kindrei bwe, ma iri asehek sahou ndra-in i bada bolo San ta Laban udu ndranye iri lau mari. Ya eme Pol ruwani iri ado gwek ai. Eme iy kuhi oro lau ta budon handru nane dah ala bolo asiu ta leheya ta Tiranus, ma iy udu hawe oro na len mari, ta leheya oro.

¹⁰Pol amekes gok doh winiya jaha la-uh buruwen. Eme ma iri mwan ma badih solo-an labai badu loboho kon tinan Esiya doh anuhun sahou mwasin ta Laban, iri badu Juwis, ma iri badu iri kon leheleh ale.

¹¹Eme Kindrei leheya kalem randrah labai edek bada Pol.

¹²Eme ma nyandroh ta Pol, buku iri andrei ili hawe iri lau ta sik, eme sik tiri ano ma iri malawin ndra-in atobwak tiri.

¹³Eme iri Juwis rayah adek ala anya katikah iri malawin ndra-in ado la-u iri lau ka-au na boto-on ta nyara Laban Jises. Eme iri badeh, tiye i buku doh, “I san ta nyara Jises i buku none Pol asehek, jo tiye ou ame len.”

¹⁴Oro lau nane amekes lakou doh badeh, oro ma ndro taloh, oro badeh, nadu tinan tiri pris ari badu Juwis nyaran Skeba.

¹⁵Arile, na len ari, iri amekes lahou toro badeh, ma malawin ndra-in tiye i toro anya, “Jises hawe Pol badeh, jo tanan uru ai, ya ado, are lau bah?”

¹⁶Eme ndramak nane malawin ndra-in udu la-un dah sandroh i la-u oro ribidi oro ma tarani awin toro ma ubwi oro andra-i labai. Eme oro atobwak ado asiu ame len, ma ndraye oro, hawe awin toro atarah iu.

¹⁷Eme na len iri Juwis ma hawe iri lau badu Grik manyah ado Epesus anuhun badeh, iri anoh. Ma eme nyara Laban Jises badeh, bare andri bwai, nyaran i loke le gwek ai.

¹⁸Eme iri lau ta budon handru mene ame tiye sahou ta tikisiy udu mada lau mari ta sasah ndra-in iri ndramekes.

¹⁹Eme oro lau rayah boto-on ta balik mene udu toro ta amekes balahak, atukum iri buk ma lakou toro i se udu mada lau mari ma atehei jih i ta aliy. Oro andromwei sowan nane asahan buku (K150,000) iri winiyan bandromwei bwe.