Aposel 19:24-34

²⁴Eme udu loboho doh ale, ndramak ari ta amekes iri lakou na hayen hawe silba nyaran Demitiriyus. Iy amekes silba nyolom tan badeh, i buku asiu ta atudun kindrei badih ari nyaran Atemis. Iy ma hawe lau solo-an akohok luk solo-an labai tiri lau ta lahou doh.

²⁵Eme iy luhi iri lau ta lahou tan ma hawe iri lau amekes lahou i le buku iy, ame, ma iy tiye i tiri i buku doh, “Ado lau mari ado ndratou ai, to mari badeh, akohok luk solo-an eme tato, ta lakou to amekes dah.

²⁶Iy lau Pol kede-eh, iy ndraluwi iri mwan ma badih solo-an. Iy ndrabolowani budon tiri, i buku ado ndranyolom ma ndranuhun. Ma iy bamekes kandriyen doh bado kon tinan Epesus dah le, bwe. Mirihik andrei loboho kon tinan Esiya ale. Iy asehek buku iri kindrei, lau amekes na lim, idoh kindrei handru bwe.

²⁷Ya idoh kameh atehei bohosak eme ta lahou tato ta aliu luk nyaran kameh andra-i. Ya idoh le bwe, idah kameh, ma atehei bohosak i ta asiu ta atudun kindrei Atemis ari moson bwe. Ma idah kameh, lomada kindrei badih tiri lau mari badu Esiya ma hawe munyak mari ta atudun kameh atokos.”

²⁸Eme iri anuhun sahou doh badeh, ma bwidi ndrine iri ibolosen ma iri sarakau anya, “Atemis kindrei badu Epesus badeh, iy le ai!”

²⁹Eme se nawin bwe, lau mari badu bolo kon tinan mari sarakau. Eme iri tawi uru lau ta Pol ma la-uh. Gayus uru Aristakus, uru badu Masadoniya, ya iri seheyani uru ala lohalak ndrahu tukum ta lau mari.

³⁰Pol badeh, anya kili mada iri lau mari, arile iri lau ta Kindrei badeh, balelei iy bwe.

³¹Ma hawe iri batun rayah badu kon doh, hawe iri kawas tan suni sahou i tan, ta iy badeh, sala ndrahu tukum ta mada lau mari.

³²Iri lau mari badeh, anyon. Iri rayah badeh, sarakau i randrah labai, ya iri rayah i randrah labai. Ya iri lau solo-an bala tanan ta katin ta iri ala doh bwe.

³³Eme iri Juwis andrekei Aleksandra ili udu mwena tiri ma iri rayah sarakau, ta iy ki-in hamon ta boho iri. Eme ma iy tiye iri mari kandru-uk, ya iy kamekes sahou ta aseben iri lau.

³⁴Arile, udu ja iri atanan iy badeh, badu Juwis, eme iri sarakau i le buku bwena nane anya, “Atemis kindrei badu Epesus badeh, iy le ai.” Iri sarakau ili winiya awa la-uh.