Aposel 19:17-36

¹⁷A wasiso una utna ri, i wanpat torom a taro Juda ma a taro kai ra awu sur a taro Juda ra det kis tong o Epeses, ra det ngara rop, ma det urur sakit una risan a Labino o Iesu.

¹⁸A susut tagun det ra det nurnur, det wanpat ma det watung puaso anundet a kum sakino petutna.

¹⁹Ma a susut kai tagun det ra det ser sangsagor, det los tomo pas anundet a kum buk na sangsagor, ra det tun ru det tiro umatan a taro rop. Ra det luk tomo pas a matan a kum buk rop, i elar ut nama limo na noino arip na mani.

²⁰Ra a wasiso anun a Labino i wan sarara, ra i lubung ma i dekdek.

²¹Ra a kum utna ri i sa rop, o Pol i nuki lena in nan potor una ru papor Masedonia ma o Akaia sur in nan usapat o Jerusalem. Ma i watungi lena, “Ra a sa wan pas sapat o Jerusalem, an nan bulung utong o Rom.”

²²I tulu mugu ru o Timoti ma o Erastus, aru tagun det ra det ser waruti, utong o Masedonia, ma i ut, i kis melet pas ut munung tong una papor Asia.

²³Una kum bung ra, a labino purpuruon i wanpat, uni a taro ka det nem a Kisapi anun a Labino.

²⁴Ara musano a risano o Dimitrius, a tene pam utna nama silwa. I ser pam a kum natnat na rumu na lotu anun a ino na god anundet, o Artemis, nama silwa. Ma a pinapam ri i pam pat a susut na mani torom o Dimitrius ma anun a taro na pinapam kai.

²⁵I ben tomo pas anun a taro na pinapam, ma a ramano taro gisen kai ra anundet a pinapam i elar, ma i watungi tandet lena, “A taro, mot tasmani lena, dat ser pam pat a susut na mani tagun a pinapam ri.

²⁶Nin o Epeses, ma una kum tamon rop nin una papor Asia, a musano ra, o Pol, i pukus a nuknukin a susut na taro, ma i ben raro det, ra i inanos det lena, a kum god ra dat ser pami nama lamandat, awu sur a kum god.

²⁷Ra a utna ri in nanpat torom dat, awu sur in ban laulau a wakak na risan anundat a pinapam kut, det in nuk unatino pasi kai a rumu na lotu anun a ino na god anundat, o Artemis, ma det in unatino pas a risano. Uniri a taro Asia rop ma a rakrakon bual kai det lotu torom anundat a ino na god, o Artemis.”

²⁸Ra det longoro a wasiso ri, det kankan doko, ma det kukukuk lena, “O Artemis anun a taro Epeses, i labo sakit!”

²⁹Ma a taro rop tagun a tamon ra det purpuruon. Det kalabor ma det pam ukai pas o Gaius ma o Aristakus, aru te Masedonia ra detul wan tomo nam o Pol, ma det ruk nam der una nundet a labino rumu na kiwung.

³⁰O Pol i nem na ruk torom a taro, ikut a taro na ususer det turbati.

³¹Ma a ramano kum mugumugu tagun a gapman una papor Asia, ra det tar pasano nam o Pol, det pitar ru a wasiso toromi lena, gong i ruk una rumu na kiwung.

³²A kunur na taro det purpuruon. A ramano taro det kukukuk nama ara wasiso ut, ma ara taro det kukukuk nama se wasiso kai. Ma a susut tagun det, ka det tasman asau ra det wanpat suri.

³³A taro Juda det sugut pat tar o Aleksanda usa numugu tan a kunur na taro. Ma det kukukuk nama wasiso sur in watung asau. Ra o Aleksanda i turbat det nama lamano, sur det in kis wowowon, sur in wasiso bati ut umatan a taro.

³⁴Ikut, ra a taro Epeses det sa tasmani lena, o Aleksanda i a te Juda, det kukukuk tomo elar nama ru aua lena, “O Artemis anun a taro Epeses, i labo sakit!”

³⁵Ra a tene tumtumus anun a tamon ra, i turbat a taro sur det in kis wowowon, ra i watungi lena, “Mot a taro Epeses, osi na tamon kuri ra ke tasmani lena, a taro Epeses det tamtamabat a rumu na lotu anun a labino god Artemis, ma a malalarino kai ra i puku pirso tagisapat una langit?

³⁶Katutaio in ipul gusun a kum utna ri, i mo ra i wakak sur mot in mana ma gong mot pam oros tar tu purpuruon.