Aposel 19:16-41

¹⁶Aleu kadiwa Sikiwa obampa epe diamodio apana sa bedewe aleu kadiwa wanwanlala mo onauida enene badowaida onalene apana sa 7 epaepabobomone mo garau wadapuiamontue etepu maukeialeno osina do etepuida me duwa ene nomone antoiena.

¹⁷Iuswa ita Girik apanawa Epesus bedewe waimoia uduudu ema umanawa etane saidantone Tatamba Iesu wadaposisane ebowa ionosaiena.

¹⁸Tane sumanailala sape waimoia uara ema umanawa etane wimone dewau kadiu apana danauwo sabamo wawiamoiena.

¹⁹Apana wene dewawa daitada dewasaie waimoia mo bukau bedewe wene gagalowa daitada girumamoia otamone wimone apana mampo sabamo sumoiena. Buka sa mo sumoiena malesau wisiantoieno debamaidalen.

²⁰Mo epe dewantoio apana uara Tatamba aiawa mukamukaua ewane atentoiena ita me aiawa apana bedeuwo inilene debamalen.

²¹Dewa ema uduudu segaleno aupe Paul nuawa bedewe insedia me Masedonia ita Akaia bolau bedewainta alepie Ierusalemwa wisepi. Me epe insene meba wane wanase, “Ne Ierusalemwa anteape wainepino walama ambi rua dialepio Rom bedewe anteapa!”

²²Me meba epe insaisalene wane sau sosowa Timoti Erasitus nata waaubamono bauta Masedonia bedewainta antoiena. Tane me Asia bedewe wankasalen, mai tauwadea wauwo alepona, dia.

²³Walama sawo Paul Epesus bedewe nolaleidio Tatamba Iesu waeuwa intawa osowe kadi rebareba debama segalen.

²⁴Apana dea ebowa Demetirius Epesus bedewe wandie. Me ipa silwa iwasalala apanawa. Me silwa mampe mo godiu iwoa ebowa Atemis duwa kakaila aleupa kerakera dewamodie. Me ita me nola sosowa do dewa ema dewasaie mampe mane debamaia donsaie.

²⁵Sa baiwa me nola sosowa ita apana isiwa me nolawa rua dewasaia apamono auweieno diamone wanase, “Sosona, e ateiten no silwa nolawa ema bedewe mane debamaia wadeite wainitana.

²⁶Tane e uduudu apana ebowa waia Paul nolaleidie gagaloleidio eteilana. Me wadi wadiase, ‘God daitada kokoitaubu apana witapo dewamoie teia mai Godida, god sa ipusiawaia.’ Me epe waeuwaleidie apana uaraia Epesus ita Asia bola uduudu bedeuwo wanwanlala insaisau leusadie banlakadisamode.

²⁷No tauma dewa ema enabodasata, manemba nolawa intawa kadisapia sawa. Tane mai sa os, waeuwa ema no godimba Atemis duwa kakaila ipasiasade ita do me ebowa debama kadisade. No mai menaneipona epe segalepi, dia! No godimba Atemis Asia apanawa ita tawo uduudu sawantoie wadaposisai.”

²⁸Demetirius sosowa mampo epe gagaloleno etane nuau kadiidaleno mo godiu ebowa wabadosane ka wane waienase, “No Epesusiwa godimba Atemis ipa debamawaida!”

²⁹Rasa rebareba ema bola Epesus uduudu bedewe debamalene alen. Apana rasalala sa Masedonia apanawa Gaias Arisitakas nata, mo Paul do alala, kotu baiwa otamone awodea weuwane auweia bolawa debama bedewe antoiena.

³⁰Paul meba menasana alepe apana uduudu danauwo enape gagalolepona, tane me sumanai sosowa enane waitusaiena.

³¹Ita do Asia gabemaniwa debamau isiwa, mo ipa Paul sosowa, gagalo wanaaubene wane waienase, “E mai auweia bolawe aitee etea sabamosaa, dia!”

³²Tane apana uduudu auweia bolawe rasa di warebasantoie, ipawa apana uara mai atentopona dima baiwa sape auweiena, di ka wamoie.

³³Tauma Iuswa isiwa Alekisanda wadanaaubeieno sawano nosene enen mo baibu gagalolepia baiwa. Sa baiwa apana inseiena me dewa da kadisan. Tane Alekisanda witapa wadenposie epadomon ambi gagalolepie meba inalepia baiwa.

³⁴Me gagaloleidio apana atensaiena me apa Ius apanawa, mai mo sumanaibu bedewelepe odapona, dia. Sa baiwa mo omo nata rua bedewe awodea rasantone ka wane waienase, “No godimba Atemis ipa debamawaida!”

³⁵Ita bola Epesus onionialala nolau dewasadia apanawa enene apana uduudu dewamono dainantono diamone wanase, “Sosona Epesusiwa, tawo uduudu atentoiena no Epesus bedewe wanwanlala godimba Atemis debamawa, ita aleupa me inainamba rua uboe iene nosena do kakaisaite gonaantitana.

³⁶Dewa ema uduudu ipa sabamoido, mai apana da wakoasapia rua, dia. Sa baiwa rasa bedewe mai dima dewasana, dainaitana!

³⁷Apana ema nata mai kadiwa da dewasapona, dia. Mo mai no godimba dubu kakaila bedewe nitu uwatauwa da pointope wadapona, dia. Do no godimba iwoa Atemis mo mai wakadisasapona. Tane e di otamole mape wilen.

³⁸Sa baiwa naita Demetirius ita me nola sosowa do apana da wawumompa, mo apana sa kotu walamawa ituia rua kotu bedewe banlamopie antopuo ita kotu apanawa mo kadiu dodomanasapi.

³⁹Tane e manlawo insaisa da winompa, sa ipa no apanamba eiau borubu bedewe gagalowantata.

⁴⁰Rasa debama ande segalena baiwa wawu no mainimbo wisepia sawa dewa ema uduudu ena. Rasa rebareba ema ipasia. Sa baiwa no mai intamba da wineipona ita Rom gabemaniwa mampe gagalontata, dia.”

⁴¹Me gagalo ema wane diasane apana uduudu waaubamono antoiena.