Aposel 19:14-35

¹⁴Odocob Juda dana ihanec dana ben, ijan Siwa, uqa melahul 7-pela age odi odoloig.

¹⁵Euqa buga me qee jejenega hewi maaden, “Ija Jisasnu dugina, Polnu ha dugina, ge age an?” aden.

¹⁶Odimei dana buga me qeeca eu gagadic odocca age gami cadimeig wooladen. Eu age cunug uqana jonadec lotoc baladocca golanagaca bical busali belein.

¹⁷Odocob Juda danaca, Juda dana qee eundecca cunug Efesas biloloig je eu dah mimeig age cunug cucuiein. Odocob Jisas Tibud ijan meca bahic mudein.

¹⁸Odocob dana wawaga meleecca geh bahic humeig amemeg agena me qee odoc qasali madein.

¹⁹Odimeig mati bahic age ceeh jelec cas mecca odoloig eu cunugca buk eu haudumeig dana cajaca amagana jana manein. Age buk fajein uqana ameg qaig gadac eu sanijec 50,000 kina.

²⁰Eunu gagadic odoc jic euna Tibudna me je gagadic mimei hatuhatu cunug ihoc len.

²¹Hibna ceteteh eu hedocob Kis Gun odudeceb Pol uqa Masedonia Grikca hatuna limei hibna Jerusalem isec nuigiannu cisdon. Uqa odi maden, “Hibna ija ono limig Rom ha figen,” en.

²²Odocob uqa Timoti Erastasca uqana cesuldoc lecis eu ale Masedonia sulaleceb belesin. Odimei uqa saen nag cecelacca Esia hatuna ono bilen.

²³Saen euna bahic Efesas ono Tibudna jicnu cacadi utai madein.

²⁴Silwa mudec dana oso, ijan Demitrias, uqa Atemis caja tibudna cuha jo nag ihicon qoc silwana mudoloi. Odocob silwa mudec dana age cabi inu meen qaig ben bahic didoloig.

²⁵Eunu uqa silwa mudec dana cunugca leih age cabi eundec oloig ageca maadeceb cegulein. Odimei maaden, “O dana, age dogina, ege cehewanige eu cabi ina hona.

²⁶Agedodoc dudu fifi egina dana Pol i dana cajaca mati bahic qauaadi uqa kadan tibud dana ebenegana mudegina eu anut qee ec madena. Odocob dana mati bahic uqa je madennu wawaga meleeceb hibemgimeig uqaca lein. Efesas eneca odocob Esia hatu cunugnaca age hatuhatu cunugnuca odi eu odon.

²⁷Eunu egena meen qaig oc cabi jic cagocdainnu nijia. Eu himec qee, osoha eu Atemis caja tibud ben uqana cuha jo qee mecdainnu nijia. Odocob caja tibud i Esia age hatu cunugna binan sulegina eu uqa ijan ben eu me qee muduqagan!” aden.

²⁸Odocob dana cegulein eu je odi dah mimeig age gemanaga geh beceb utai madein, “Atemis Efesas egena eu uqa ben bahic!” ein.

²⁹Eunu taun ben eu cunugca je alalac ben. Dana am ben Gaias Aristakasca, dana lecis Masedoniadec Polca coboin, eu ale hewalimeig udoc jona diaali ehi lein.

³⁰Odocob Pol uqa cuhanuc dana am ben amagana ligia odocob malogom age cahacdoin.

³¹Esia dana meca leih age Polna danah ageha je suldutoin, hina udoc jo euna cain camasac magaun ec ninidoin.

³²Odocob dana leih age ceteh osonu utaeegin leih age fil utaiiein. Odimeig dana eundec mati bahic age cel gugnu cegulein eu qee doloin. Eunu dana age udoc jona cegulein age ucelduduein.

³³Odocob cegulec euna Juda dana age Aleksanda uqa agena je maadecnu madon. Eunu dana leih age Aleksanda madocobil uqa aqunecna ten. Odimei Aleksanda ebenna cahacaadi age amagana eetanu odi ceguleginanu je maadigia odon.

³⁴Euqa age uqa Judadec dana camasac fimeig age cunug je osol eu aua lecis odi utai mamadiein, “Atemis Efesas egena eu uqa ben bahic!” ein.

³⁵Odocob hibna taun benna kuskus limei dana am ben maadeceb tiliein. Odimei uqa maaden, “Efesas dana! Efesas taun ben eu Atemis Ben Bahicna cuha joca, meen gun sao ohisdec tonen euca alena cofalec age cunug dogina.