Aposel 18:1-27

¹Ano Pol ruwani kon Atens ma iy iu ili Korin.

²Iy udu Korin udu gwek badeh, iy ndruni ndramak ari badu Juwis nyaran Akwila, ya tinen atehei iy eme len udu kon munyak tinan Pontus. Iy hawe udun Prisila uru barado Itali barame ai. Tasah, Sisa Klodiyas tiye sahou boto-on i tiri Juwis ado kon tinan Rom badeh, ka-au.

³Eme Pol edek ili selesen uru ma iy udu hawe uru amekes lahou ta asereh asiu balei, tasah lahou turu doh badeh i se buku lahou tan amwenen.

⁴Na len ta amunyau mari badeh, iy ili ndrahu tukum tiri Juwis badeh, anya kaliu budon tiri Juwis hawe iri lau badu Grik.

⁵Eme na len Timoti uru Sailas ado Masadoniya ame badeh, Pol eme ruwani lahou tan ta asereh asiu balei, ma atehei budon tan ihis labai ta atiye sahou i tiri Juwis ta Jises badeh, iy Krais handru, ndramak Kindrei atehei iy ta akohok iri lau tan ame hamon.

⁶Eme iri Juwis abolosen i tan ma bobose iy badeh, iy turuhi awin tan i mada iri ma asehek i tiri i buku doh, “I buku imek asahan tado, ado sato-en ai. Lahou tek ndrano. Kabwai, udu kabatana dah kameh, jo kameh iu ili bolo iri lau badu leheleh ai.”

⁷Ano Pol udu ndrahu tukum tiri Juwis eme len badeh, iy iu ili asiu ari udu mirihik le, ili hawe Titiyus Jastus. Iy badu Juwis bwe, arile iy badeh, ta atudun Kindrei.

⁸Eme ndramak ta mwena ta atondrok ndrahu tukum tiri Juwis nyaran Krisipus ma lau mari badu asiu tan badeh, atehei budon toro handru i ta Laban; ma hawe iri lau solo-an badu Korin anuhun sahou Pol asehek badeh, ma iri atehei budon tiri handru i ta Laban ma Pol alomwa iri.

⁹Eme na ben ari badeh, Laban asehek sahou i ta Pol i san ta ameh i buku doh: “Ou sanoh, ndri-iy, ma ou sandru-uk ta asehek sahou ale. Ou asehek sahou kili.

¹⁰Tasah, jo kameh udu hawem, ya ari ndramak winiyan batawi ou ma winiyan bamekes isi bawek badam bwe. Tasah, iri lau tek solo-an labai are bolo kon tinan dah.”

¹¹Ya eme Pol udu hawe iri andrei jaha ari ranah, leheya iri na sahou ta Kindrei.

¹²Na len iri lau atondrok Rom atehei Galiyo asahan kabin ta kon tinan Akaya, eme iri Juwis atukum ase tawi Pol ma aruwi iy ili ales ere mada sahou.

¹³Eme iri anya, “Iy ndramak dah badeh, ndraluwi budon tiri lau ta atudun Kindrei i san ta kandriyen randrah labai ja, ya idoh bamwenen ta kandriyen malen bwe.”

¹⁴Eme Pol anya kasehek sahou le badeh, Galiyo asehek sahou i tiri Juwis anya, “I buku none kandriyen ndra-in rayah iy mesekei badeh, mwasin ta jo kanuhun ado Juwis ai.

¹⁵Arile, idah badeh, andres ta ndremenya ado hawe nyara ado ma andres ta bolo kandriyen malen tado. Ya eme ado kasehek ta aliy kudu ndrokowa ado le. Jo winiyan banuhun hawe baleben ta aliy bwai.”

¹⁶Eme iy tiye oro au ta are mada sahou.

¹⁷Eme iri Korin tawi tinan ta atondrok ndrahu tukum tiri Juwis nyaran Sostenes ma adai iy udu mirihik ta mada sahou. Arile, Galiyo batehei budon bala ta aliy bwe.

¹⁸Eme Pol udu Korin udu gwek luwen sese. Ano iy ruwani nadu tinen oro ado gwek, ya iy ili kon Senkriya anya kalakak kala Siriya, ma Prisila uru Akwila a hawen ale. Iy ba-au bwe le badeh, iy udu Senkriya asiki batun iu tasah tandrakan tan mene ndrano.

¹⁹Oro ala asos Epesus, eme iy ruwani Prisila uru Akwila ado gwek. Iy le ari badeh, ili ndrahu tukum tiri Juwis andres ta sahou hawe iri.

²⁰Eme iri lelen iy ta iy kudu hawe iri luluwen sese kudu gwek, arile iy bwalen.

²¹Arile, iy anya ki-iu badeh, iy tandrakan i toro anya, “I buku none Kindrei aseken, badeh kameh, jo eme hamon ja.” Ano iy alakak udu Epesus iu ai.

²²Na len iy isos Sesariya badeh, iy i loke ili Jerusalem sekesek iri lau ta Kindrei. Ano iy iu ili andri ili Antiyok.

²³Ano, hamon ta iy udu Antiyok sese, Pol udu doh edek ili rakon ili rakon udu bolo kon munyak tinan Galesiya ma Prijiya batanau iri lau ta budon handru kabadok.

²⁴Udu bolo len doh, ndramak ari badu Juwis nyaran Apolos, ya atehei iy eme len udu Aleksandriya eme kon Epesus. Iy badeh, tanan tan ndrala labai, ma iy tanan bolo sahou ta Kindrei mwasin labai.

²⁵Iy badeh, tanan labai ta san ta Laban ma abe-ei iy asehek sahou ta nyala Jises ndra mwasin le. Arile, iy badeh, tanan le lahou ta Jon ta alomwa.

²⁶Eme iy asehek sahou nyarahan nyarahan udu ndrahu tukum tiri Juwis. Eme Prisila uru anuhun iy badeh, uru kuhi iy eme asiu turu ma leheya iy amwenen na bolo sahou ta Kindrei le gwek.

²⁷Na len Apolos anya kili Akaya badeh, nadu tinen oro ta Kindrei rayah amekes ndrinen abadok ta ili, ma oro atorou la-ukei ili toro lau ta hamon ta Jises kabe-en iy. Eme Apolos asahan badeh, ma iy ndramak mwasin ta aseben oro are mene asahan lau ta budon handru i san ta tikisiy ta Kindrei.