Aposel 18:1-19

¹Ra i sa rop a kum utna ri, o Pol i wan tagitong o Atens utong o Korin.

²Tiro iai der etorom pas nama ara te Juda, a risano o Akuila. I tagitong o Pontus, ma anun a ino, a risano o Prisila. Ke suano i kut ra der wanpat taru tagitong o Itali, uni a Sisa Klaudius i pitar tar a warkurai, sur a taro Juda rop det in nan gusun o Rom, i ra a labino tamon tong o Itali. Ra o Pol i wan torom der.

³I kis nisan der ma detul papam tomo, uni detul a tulu tene pam rumu na sel.

⁴Una kum Bung na Sabat i wasiso tomo nam det una rumu na lotu anun a taro Juda, sur in ukatutur a nuknukin a taro Juda, ma det kai ra awu sur a taro Juda, sur det in nurnur un o Iesu.

⁵Ra o Sailas ma o Timoti der wanpat tagitong una papor Masedonia, o Pol ke mana nama warawai nama wasiso anun o God, ma i upuaso i torom a taro Juda lena, o Iesu i a Karisito ra o God i tulu ru i urin.

⁶Ikut a taro Juda det wasiso batbat o Pol ma det watung a kum sakino wasiso uni. Ra o Pol i tutupu anun in namalu, a ukinalong lena, in rosumur gusun det. Ma i watungi tandet lena, “Ra mot in iru una warkurai anun o God, i kibino un mot ut, ma iau, a langolango. Turpasi uniri, an nan mukut torom det ra awu sur a taro Juda.”

⁷I pirso gusun a rumu na lotu, ra i ruk una rumu anun ara musano, a risano o Titius Jastus, i ara tene lotu torom o God. Anun a rumu i tur milau nisan a rumu na lotu.

⁸O Krispus, ara mugumugu tagun a rumu na lotu, ma det rop kai, ra det kis una nun a rumu, det nurnur una Labino. Ma a susut na taro Korin, ra det longoro a warawai anun o Pol, det nurnur, ma di baptaiso det.

⁹Ara bung na mirum a Labino i wasiso torom o Pol una tamtama lenri, “Gong u ngara. Ma gong u mana nama wasiso.

¹⁰Uni an kis tomo nam ui, ma kataio in ban laulau ui, uni anung a susut na taro kuri una tamon ri.”

¹¹Ra o Pol i kis tiro iai ara kilalo ma a wonom na kalang, ma i ususer det nama wasiso anun o God.

¹²Una kilalo ra o Galio i mugumugu tagun a gapman tong una papor Akaia, a taro Juda det tur tomo sur det in um o Pol, ma det beni sur in tur una warkurai.

¹³Ma det takuni lena, “A musano ri i lari sur in pukus a nuknukin a taro sur det in lotu torom o God nama ngasino ra ke elar nama kum warkurai anumet a taro Juda.”

¹⁴Ra o Pol i ling sur in wasiso, o Galio i watungi torom a taro Juda lena, “Mot a taro Juda, ra a utna ri i pami i laulau, ma ke mur a warkurai anun a gapman, in tokodos sur an longoro mot uni.

¹⁵Ikut, ra mot takuni kut una kum wasiso, ma una kum rising, ma una anumot a kum warkurai ut, i wakak sur mot ut mot in warkurai i. Iau kan warkurai i una kum ngas na utna ri.”

¹⁶Ra i lakro ru det gusun a kinkinis na warkurai.

¹⁷Ma det rop det pam ukai pas o Sostenes, a mugumugu tagun a rumu na lotu anun a taro Juda, ra det umi umatan a kinkinis na warkurai. Ikut o Galio ke nuk pas a utna ra.

¹⁸Ra o Pol i sa kis suano pasi tong o Korin, i wan gusun det ra det tar tistisino una nurnur, ma i wan utong o Senkria. Tiro iai, di kumur rop ru a iwu na lorino, sur in ese i lena, i sa pam sot pas anun a liliman torom o God. Ra detul nam o Prisila ma o Akuila detul kas una sip utong una papor Siria.

¹⁹Ra detul sot tong o Epeses, o Pol i wan pas gusun der tiro iai, ra i ruk una rumu na lotu, ma det wasiso tomo nama taro Juda.