Aposel 16:16-35

¹⁶Na len ari aso anya kala ndrahune kon ta salom badeh, badih lohowan ari malawin ndra-in udu la-un eme bada aso. Iy winiyan tiye sasah kameh asahan udu bwena eme. Iy badeh, ndrakohok luk solo-an solo-an ndra-au ndra tiri lau ta atondrok iy i san ta sehek sasah asahan udu bwena.

¹⁷Iy doh badeh, edek in hamon ta Pol hawe aso marakon, ma iy aloh anya, “Oro lau dah ala tiye sahou ta koha ado kameh udu le buku doh, badeh, oro lohowan ta Kindrei ere bwele-e kindrei mari badu loken.”

¹⁸Eme iy amekes lahou tan doh badeh, len solo-an labai. Ya eme Pol eme ndrinen isi ta aliy, eme iy tubuni iy ma tiye sahou i ta malawin ndra-in anya, “I san ta boto-on ta nyara Jises, jo tiye ou ame len ta la-u badih badeh!” Eme na le liliy, malawin ndra-in udu bwele-en eme len.

¹⁹Eme oro lau tan nane atanan ta san ta akohok toro luk badeh, ndrano, oro ame tawi Pol uru Sailas, ya seheyani uru ame lohalak ndrahu kon ta anuhun sahou, ame mada iri lau ta atondrok kon.

²⁰Eme oro kuhi uru ame mada iri lau ta anuhun sahou ma tiye anya, “Uru lau dah badeh, badu Juwis, ya uru amekes nono-ou udu bolo kon tinan tataha.

²¹Uru badeh, leheya kandriyen bamwenen ta kandriyen tataha bwe; taha badeh, lau badu Rom, ya kandriyen doh taha banone ma winiyan bamekes bwe.”

²²Eme iri lau arou ala la-u Pol uru Sailas ala adai uru, ya eme iri lau ta anuhun ame tiye iri tarani awin ta la-u uru ma a-um uru na malou sakabuk i bek.

²³Iri ubwi uru andra-i labai, ano iri akahei uru ala bolo kou. Eme iri tiye ndramak ta ndrokei ta bolo kou katehei ndrabek kihis ma katondrok uru kamwenen.

²⁴Iy anuhun sahou iri tandra-un i tan ano badeh, iy atehei uru ala bolo asiu udu bolon handru, ma sawei kati uru ma totowaniy i bolo sabar.

²⁵Eme i ndrukulu ben alih badeh, uru asolom ma ayah wari ta atudun Kindrei. Ya eme iri lau rayah are bolo kou i buku uru badeh, anuhun uru ayah wari.

²⁶Eme nawin bwe, kon totoreh ma sali asiu nane dah nyukunyok. Eme madasan mari ta bolo kou dah asak, ma kati iri lau mari udu bolo sabar dah asoh.

²⁷Ya eme ndramak ta ndrokei atondrok iri, amak anyolom kou mari asak badeh, iy anya iri are bolo kou ndratobwak. Eme iy andrei samen ta anya kidi iy le badeh,

²⁸Pol aloh anya, “Ou sadai ou! Aso ba-au bwe, aso mari ado kada-ah!”

²⁹Eme ndramak ta ndrokei dah tanyarei ta sun ma sakaliye ili taku ma totoreh udu mada Pol uru Sailas.

³⁰Ano iy kuhi uru ame manan, ma eme iy lelen uru anya, “Ah ma la-uh, jo kamekes sasah handru ya jo kakohok kohak handru ta udu le buku doh?”

³¹Eme uru anya, “Ou atehei budon tam handru ki ta Laban, idah kameh koham udu le buku doh ma hawe lowam oro.”

³²Ano, uru asehek sahou ta nyala Laban i tan ma i tiri lau nane are bolo asiu tan doh.

³³Eme na le liliy na ben doh, ndramak ta ndrokei doh kuhi uru ma sikine ndrana turu; ano na le liliy, iy ma hawe lowan oro alomwa oro a gwa.

³⁴Ano iy andrei uru ala asiu tan mesekei nyamon i nuru. Ma oro lowan mari badeh, sekesek tinan handru, tasah oro badeh, ndratehei budon toro handru ndra-en ta Kindrei.

³⁵Eme kon aleu, iri lau ta anuhun sahou tiye sahou i toro lau ta mwena tiri lulik ala tiye ta ndramak ta atondrok, katiye iri lau doh ka-au ai.