Aposel 16:1-33

¹Mo ekelesia mampointa antone bola debama Deabe bedewe wimone ene Lisitira bedewe antone waimoie. Sape sumanailala dea ebowa Timoti wandie. Me inawa ipa Ius iwa Iesu sumanaiwaleidie wandia, tane me mamba Girik apanawa.

²Sumanailala Lisitira ita Aikonium bedewe wanwanlala Timoti dewawa euda eweie nuau euleno ebowa euda os waie waimoie.

³Paul au bedewe menasadia Timoti banlepe do antopona, tane Iuswa uduudu sape wanwanlala atentoiena Timoti mamba mai Ius apanawa ita otopa etepa nosasia wandie. Paul Timoti diepio do leumpe Ius apanawa wawumopua sawa mo dewau asiasi Paul Timoti etepa non. Ema aupe Paul Timoti banlene do nola awa antoiena.

⁴Mo bola debama daitada bedeuwointa antoie dima aposel ita ekelesia apana eiau Ierusalem bedewe gagalontone ita leta bedewe girumantone sumanailala diamoiena ruawantopua baiwa.

⁵Ekelesia wasau gagalowa ema etane sumanaibu debamalen. Ita walama ruawantoie apana uara Iesu bedewe sumanaintoie ekelesia uaranton.

⁶Paul sosowa do antoio Aleu kakaiwa mo enabodamono Asia bolawa uduudu bedewe Gagalo euda mai amonantopona, dia. Sa baiwa mo ene Pirigia ita Galasia bedeuwointa antoiena.

⁷Mo antoie Misia ita Bitinia bolau sawanauwo wimone ita mo Bitiniawo odapua baiwantoio Iesu Aleupa kakaiwa diamona mo mai sape odapue antopu, dia.

⁸Dima Aleu kakaiwa menasana rua mo bola sa ene Misia bedewainta antone Tiroas bedewe wimoiena.

⁹Mo Tiroas bedewe ituntoio tadino Paul auwen rua ewedio Masedonia apanawa wisene enene iririsadie wadiase, “Wine owa waiwa dawo Masedonia tawowa bedewe, no saunea!”

¹⁰Paul auwen rua bedewe epe ewene no dianeno etate tauwadea os puraiwamba a baiwa imaamotana. Auwen sa mampe no atenten God no apanedia antate Gagalo euda Masedonia apanawa mampo amonantata.

¹¹No bola Tiroas ete waa asiasi nawate anten bola Samoteresiwa winene wainite itunten. Imonemba no bola Neapolisiwa antene

¹²bola sa ete bola Pilipai Masedonia bedewe winene wainite. Bola sa Rom apanawa wadane mubau wanasane anaanau asiasi apana sape wanwanlala oniamoie. No walama isiwa sape wainite

¹³ita Sabat walamawe Pilipai moawainta nonene esoo anten. No insetana esoo bola sa apanawa raupariu bolawa winede. Sa baiwa nonene antene esa tampe wante ioto auweia mampo Gagalo euda amonanteno eteiena.

¹⁴Mo bedeuwo i dea ebowa Lidia no asisunedie. Me bola Taiatira bedewe wisene Pilipai bedewe wandie. Me gara bumau eubu mampe wineio apana wimoie me mampe gimaramoia iwa. Me mapo God dauwa etene Iuswa sumanaibu bedewelene wandie. No ioto mampo gagalontitano Lidia asisuleidio Tatamba me sausano nuawa wadenaubeno Paul dima wana atendewalene Iesu bedewe sumanailen.

¹⁵Me ita duwa bedewe wanwanlala do babatutunton. Ema aupe Lidia no nisonene wanase, “E ne ewaneiana ne ulaipa sumanai iwa, ne menanena e winleno ane dunawo wainenta.” Me waidasadio baiwa no antene me do duwa bedewe wainitee.

¹⁶No Lidia do wainite walama dea nonene apana raupariu bolawe antite into nola dewalala iwa sanaa bedewe aleu kadiwa wandia donsatana. Aleu kadiwa i sanaa sa insaisa wanedia dima muriwa segalepia umanawa atenlempe benemalempe waimpa. Me dewa ema benemawaleidio apana mane debamawa waneie ita mane ipa wadedie mo mida onieia wanamodie.

¹⁷I sanaa sa Paul ita no mida me do alala waroronene iedie mukaleidie wadiase, “Apana ema God ionoidoa nolawa dewalala e inaitana gagalowa waie lai.”

¹⁸Walama uara me epe dewaleidio Paul nuawa kadileno leulene i sa ewene aleu kadiwa me bedewe wandia diene wanase, “Iesu Keriso ebowe ne dieedina me ee noe aitaa!” Ita tauwadea os aleu kadiwa i ene nosene alen.

¹⁹Tane aleu kadiwa i sa eniena mampe me onieia apanawa atentoiena mo mane wadeia intawa Paul boden, tauma i sa mampe mane mai wadapua rua. Sa baiwa mo nuau kadiidaleno Paul Sailas nata wadaitumone teinamone maket bolawe antone bola sa apanawa eiau danauwo kotu baiwa eneiena.

²⁰Mo gabeman debamau danauwo eneieno i sanaa onioniala apanawa Paul Sailas nata wawumone waienase, “Mo nata Ius apanawa no mainimbo wimone bolamba kadisai.

²¹Mo dewa daitada apanamba waeuwakadisamoie lai. No ipa Rom apanawa, no anaanamba wadia mai mo waeuwau nambea waia etate ruawantate dewasata, dia.”

²²Bola sa apanawa uara sape kotu asisusaie eneia mo i onieia apanawa adiwentone Paul Sailas nata wawumoie. Ita kotumoia apanawa wawu gagalowa sa etane sorodiau diamoiena mo matangelamopue garau ampo otawiamopue epamopu.

²³Ita mo tai badowa mampe Paul Sailas nata mukantone epamoieno poka etaidasaiena. Mo epamoieno dialeno aupe dibura bedewe teamoiena. Ita sorodia dibura onionia apanawa dieiena mo nata deaitopa oniamopi nomopue antopua sawa.

²⁴Dibura onionialala badowa dieieno etene mo nata du pouweido teamon. Mo wau ia saibusaibua mampe apisadomone seni mampe taudomone gudusamone emoiena.

²⁵Tadina pouwe Paul Sailas nata God mampe rauparintoie ita wadapos sasawa waio dibura sosou mo etamone asisumoie.

²⁶Mo nata epe dewantoio bedewe wanatata debamaia wisene dibura duwa badowa wadawadala uweno tauwadea os dibura duwa moawa uduudu wadaaubaleno diburalala uduudu ampo seni tauia pumpu wane ampo nomoiena.

²⁷Tane dibura oniamodia apanawa ituleidia enenwisene dibura duwa moawa wadaaubalala ewamone insenase diburalala nomonatue antoiena ita me isimawa teinenaubene meba enenbobolepona baiwaleidie.

²⁸Tane Paul me ewene mukalene wane wanase, “Mai eba kadikaditaa, no uduudu ema, mai dibura epe antepona, dia!”

²⁹Dibura onionia apanawa nolawa dewalala diamona siwa otamopue wimopu. Ita mo otamone wimoieno me sapainta du pouwe saidaleidie etepa uwauwaleidio do weuwane alene Paul Sailas nata danauwo imimpa emmisilene itulen.

³⁰Ita me mo nata banlamone dibura duwa ene nomone me waitaramone wanase, “Sosona dianeana, ne dima dewasape inanteapa?”

³¹Mo sipoasane waienase, “E Tatamba Iesu bedewe sumanaite ita inaitaa, e eba ita e apanaa duawo waimoia do inaitana.”

³²Tane Paul Sailas nata dibura onionialala ita me apanawa duwa bedewe do waimoia mampo Tatamba Gagalowa euda amonantono eteiena.

³³Tadina pouwe dibura onionia apanawa mo epamoia benewa etepu osowe wineia mitamone bunamamon. Ema aupe me ita duwe waimoia apanawa do babatutunton.