Aposel 15:8-25

⁸God Kegemama Iban na ibal kobe tongwa mere, Yuda milekungwa ibal tongwa God nomanin kanungwa kobaan milere, ‘Para paimua,’ dimua.

⁹‘Ibal ke kuunin milemua,’ dungure ibal kobe pire gi dungure, God nomanin kule parin ere tomua.

¹⁰Tongwa, tameran God ka dungwa sua i kanine? I iru dinga kal obin dongwa pire gi dungwa ibal kine tenga, na sanamoi gilekume te na ibal kobe para kine warebinga, i kuunin erekimua.

¹¹Na ibal kobe iru pirebinga, Yesu Singaba aa te wai ere ibal tongwa pire God aa ki dungure yalin kobe sigare kule u wai nangwa mere, na ibal para iru u wai nabinwa.”

¹²U ku bilungwa ibal sime mile pire milungure, God yal sui man mile tongwa, Pol te Banabas kal guman kwi dungwa erungwa, te kal erungwa ibal buul kunungure erungwa mere ka pore di tongure, ibal kobe pire milungwa.

¹³Dungure pare Yemis maan iru di tongwa, “Enan kobe, ka dirala piro.

¹⁴God kol bala di Yuda milekungwa ibal tongwa, yalin kobe taw pi yalini gawlima kobe omua. Goma God kawn kule iru erungwa mere, Saimon di na tomua.

¹⁵Iru erungwa mere, ka kebe yal ka dungwa iru kuunin paimua. Ka main minin ganin iru bilungwa paamua.

¹⁶‘God Singaba iru dungwa, Na kwi sinaa dire ure Debiti ogu guru di yaangwa kwi kiiralwa. Ogu suule u sutaw ongwa mere, Debiti gawlin kobe iru omba, na kwi aa tekun eralwa.

¹⁷Aa tekun erabinga, yal imo milungwa te Yuda milekungwa ibal na paale suna ere igire, na kaanan gale yebe erala dire, na gala dire waa duunamua.

¹⁸God Singaba goma ka iray di maribe erere malia kwi dimua.’”

¹⁹Yemis kwi ainere di tongwa, “Ka kebe yal iru dungwa mere, na nomanin pire kwi iru diralwa. Yuda milekungwa ibal nomanin suna si kiruul sire God pire gi dungwa, konagi nega wen di ta tekerabinwa.

²⁰Tekerabinba gi abal kunibe nekenama dire, te kobile galbale kabe si ki tongwa, te kabe naan aa di dire si gulungwa te mayan para nekenama dire, ka minin ganin iru bile terabinwa.

²¹Ka i manaa di tobinga iwe. Mose kile kaman ka goma bilungwa, kere sanamoi gilekume tere, kere yuungwa malia Sare kaun kaun Yuda ka main ogu ala kere tongwa pirebinwa. Ogu i dungwa mere mere Mose ka dungwa kere di ibal kobe tomua,” dungwa.

²²Dungure nusi erungwa ongwa yal kobe, Aposel, te ka main goma yongwa yal kobe, te ka main ibal taminin muru, “Yal taw na suna milungwa Pol te Banabas bole Antioko ai nangwa nusi erabinwa,” dire nomanin taran si pirungwa. Ka main yal singaba sutan paale ire, yal ta kaan Yudas Basabas te yal ta kaan Sailas paale suna ere ingwa.

²³Ka minin ganin iru bile tongure, yal sui i ongwa. “Aposel kobe te ka main goma yongwa yal kobe, na yal kobe i enin kobe milebinwa. Yuda milekungwa ibal enin kobe Antioko ai te Siria gariba te Silisia gariba milinga, aya maya, di tere ka minin ganin bile tobinwa.

²⁴Na ibalan kobe taw i milinga gul ongure, ka dungwa i nigi de pire nomanin sutan sinwa. Na ibalin kobi kaman tekere, nusi erekibinwa.

²⁵Ibalin kobi ka dungwa pirebinga ena na yal kobe u ku bilere yal taw kobe paale suna ere irere, nusi ere i milinga gul erala dire, nomanin taran sibinwa. Yal taw kobi na ye nega yal sui Banabas te Pol bole namua.