Aposel 15:14-29

¹⁴Saimon baxanga nakira ba muga Urana hatanga murunganoa bungina xap Yuda Teguam teladi muli bila ing sibung iniadi.

¹⁵Axa ba su mana Urana lipuxing suxunguxunguamdi haruangadinga, namua na Xuanoa harua ba:

¹⁶“ ‘Debit yonggaxinoa bila xahi tela galaina mari lo. Kimuya bagula ngagoxoya saing bagula ngaiti muli. Yabanoa doa ba bagula ngatongtongia muli, bagula ngahamaringia,

¹⁷bu lipu teladi sanga ba disai mana Toxoratamona, xaung bu Yuda Teguamdi daxap yagua ba sanga ba disai mana xauna, Toxoratamona harua bila li’

¹⁸ina libu lipudi daxabia axadi li mugau sibuna ba.

¹⁹“Binabu hatumingagua bing Yuda Teguamdi dibo ba duxugia mala rangua Urana, labu tasina makasangua nadiu tai.

²⁰Tegu. Bagula tabung mala ranguadi, tabaladi ba labu daxang anginga lipudi dahanania na babudiu tai, namua na axa ba sigixinga Urana maxania te. Tabaladi ba labu dilibu kubolu miaxuamau tai, saing daxang asaxa dimumudi mati xaung daxang asaxa sibinamgu tai.

²¹Haruanga li sanga ba. Moses haruanganoa daxabia masup. Namua na lipudi dititi dibaxanga haruanganoa mana Yudadi sabungading numandi Xaidap Yaguangam taining tainina, saing kubolua ba dilibu mana long sabanga longgalo waleu ma hatata.”

²²Baing ina naga, aposeldi xaung sabunga yanamindi, digabu sabungam longgalo, ding dahau haruangua ba dimogu dingia teladi saing disoxidi xaung Pol Banabas tang mala Antiok. Dimogu lipuxiding haringindi luwa, Yudas (duxu ba Barsabas) xaung Sailas.

²³Baing dibung xailong tela ba tang dirai mala, harua ba, Am aposeldi xaung am lipu sabunga yanamindi, am riaimdi, Am gabung xailongga li nang Yuda Teguam hatuminga haringinamdi awa long sabangga Antiok xaung probinsiadi Siria xaung Silisia. Am gaharua xaidap xai nang.

²⁴Am galungu ba amia teladi dima ranguang, disina mauxanganoa nang mana haruangadinga, dahanggalangia gamoimdi. Am gasoxi lipuadi ba mala ranguang te.

²⁵Binabu am longgalo am gagugunia hatumingamamdi bu am gamogu lipu teladi saing am gasoxidi mala ranguang xaung am riamam xai luwa Banabas Pol tang.

²⁶Heku tang walingadingdi disup, tang dimaxuwa te ba dibaxanga Yesu Kristo yanoa, Toxoratamona kiria.

²⁷Binabu am gasoxi Yudas Sailas tang xauna bu daharingia haruanga wa mana xailongimamga li.

²⁸Urana Aningonoa xaung am hatumingamam taininau ba am sanga ba am gasina mauxangang xumana nang te. Binabu ang gasu mana kuboluadi bagudi li ding ganiding:

²⁹Labu axang anginga lipudi dahanania na babudiu tai. Axang asaxa dimumudi mati xaung axang asaxa sibinamgu tai. Alibu kubolu miaxuamau tai. Awasa xai bu awa hasoya mana axadi ba, baing bagula alibu kubolu xai. Ina naga. Xai sibuna.