Aposel 15:1-27

¹Oro lau rayah ado Judiya badeh, ame andri kon Antiyok, ma eme oro leheya iri lau ta budon handru anya, “Ado badeh, winiyan bado mwasin bwe, i buku none ado basan ku-i ado bwe. Idoh badeh, in hamon ta batanau ta Moses tiye.”

²Sahou doh le badeh, mesekei Pol uru Banabas andres boto-on boto-on ma hawe asehek sahou nyarahan labai i toro. Ya eme iri lebelei Pol uru Banabas ma hawe lau rayah ta budon handru ala hawe uru, ya oro ala Jerusalem, ala atou oro lau ta a-en hamon ta Jises, hawe iri batun tiri lau ta budon handru, ta lelen iri ta tanan doh.

³Ya eme iri lau ta Kindrei badeh, suni uru au. Ya udu bolo tekedek turu badeh, uru ala bolo kon Ponisiya ma bolo kon Samariya asehek nyala iri ta iri lau badu leheleh badeh, ndratubuni ndrine iri ta kandriyen ndra-in. Eme sahou mwasin doh badeh mesekei iri lau ta budon handru sekesek laba tinan labai.

⁴Eme, na len uru ame Jerusalem badeh, iri lau ta Kindrei ma hawe iri aposel ma hawe iri batun tiri lau ta Kindrei sekesek handru turu ame hawe iri. Eme uru asehek i tiri ta nyala iri lakou mari Kindrei ndramesekei na mine uru.

⁵Ano oro lau rayah ta budon handru, badu hawe oro lau Parasi ales are loken tiye anya, “Iri lau badu leheleh badeh, ka-en hamon ta batanau ta Moses, ya kasan ku-i iri.”

⁶Eme iri aposel hawe iri batun tiri lau ta Kindrei atukum ase badeh, anyolom bolo budon nane doh.

⁷Eme hamon ta oro andres luluwen badeh, Pita eme ales ere loken tiye anya, “Ado nadu tine, ado badeh, mene ndratanan ta jo dah mene ndra mwena ndra-au, Kindrei lebelei jo udu bolo ado eme len ta atiye sahou mwasin i tiri lau badu leheleh ta iri kanuhun ma katehei budon handru ki ta Kindrei.

⁸Eme ya Kindrei badeh, tanan ndrine iri ma leheyani iy aseken iri i san ta iy atehei Malawin Ndrabun i tiri, i buku none iy amekes eme tato mene.

⁹Iy badeh, bamesekei iri bala randrah ja tato bwe; iy badeh, sikine ndrine iri amwenen i san ta budon handru tiri le.

¹⁰Eme ya, i buku sah ado anya kanone Kindrei ma anya kadeu maha-an ki la-u iri lau ta budon handru? Idoh badeh, iri tubu taha hawe to winiyan babwese-ei bwe ale.

¹¹Bwe, handru en! Taha badeh, atehei budon handru bala san doh bwe. Idoh badeh, i san ta tikisiy ta Laban Jises le, ta koha taha kameh udu le buku doh, i le buku none oro.”

¹²Eme iri lau mari badeh, andru-uk ado le anuhun Banabas uru Pol asehek sahou ta nyala kalem ma lahou tinan mene Kindrei amekes udu ndrokowa iri lau badu leheleh na mine uru.

¹³Sahou turu ano le badeh, Jemis asehek sahou anya, “Ado nadu tine kanuhun jo.

¹⁴Saimon mene ndrasehek ndraleu ndrame ta taha, ta ma mwena Kindrei leheya tikisiy tan i tiri lau badu leheleh. Ma iy le kuhi oro lau badu bolo iri eme len, ma asahan lau tan amwenen.

¹⁵Eme ya sahou tiri propet amwenen le ta aliy, torowenei i buku doh:

¹⁶‘Laban anya, “Len hamon eme, jo kameh eme hamon ja ta atudun kandriyen ha-un udu bolo lundriye Debit oro. Oro badeh, ndrandra-i i buku ra-em asiu ndra malen ma irou udu andri. Arile, jo kameh tutuni asiu doh ja, ma asahan ha-un mara-ei ja.

¹⁷Idoh kameh asahan ta iri lau rayah ja kameh katakaleh jo, ma iri lau badu leheleh mari mene, jo aloh oro ame asahan lau tek.” Laban mene asehek i buku doh.

¹⁸Ya eme Laban amekes lakou mari dah, mene lau ndratanan ndra bwena ndra-au ndra-au.’”

¹⁹Eme Jemis asehek sahou ili le i buku doh, “Jo budon tek badeh, i buku doh: To badeh, samekes sabadok labai sala tiri lau badu leheleh, iri ala ndratubuni ndrine iri ndra ta Kindrei.

²⁰Arile, to atorou ki toro ma katandra-un toro saimon nyamon iri ndratehei ndra mine kindrei ta wendreya, iri amekes na sukumada kei; oro samekes kandriyen ndra-in ta karei; oro saimon oda iri lakou buku me ma bulumakau ndra udu ta aliy, ma sa-un ndraye iri ale.

²¹Tasah, ndra bwena labai eme taku len dah, iri atiye sahou ta Moses mene torowenei udu bolo buk tan, ma udu bolo kon mari iri kandriyen malen ta batanau doh, ndrabwena labai udu aliy, ma udu bolo len mari ta tukum badeh, iri asehek ma aloh udu bolo asiu ta atukum tiri Juwis mara-ei. Eme ma iri tanan, buku iri lakou mara-ei doh, ndrabun handru.”

²²Ano iri aposel hawe iri batun tiri lau ta budon handru hawe iri lau ta Kindrei mari amekes budon ta kaleben oro rayah badu bolo iri, ya kasuni oro kala Antiyok hawe Pol uru Banabas. Eme iri lebelei Judas aloh Barsabas ma hawe Sailas. Uru ma la-uh doh badeh, batun badu bolo iri lau ta Kindrei.

²³Eme iri atehei la-ukei dah i mine uru ili: “Ya eme aso aposel hawe aso batun ta lau ta budon handru tiye sahou sekesek taso ewek taha nadu tine aso badu leheleh ta budon handru badu Antiyok, Siriya ma hawe Silisiya.

²⁴“Aso ndranuhun lau rayah badu hawe aso ndrawek bolo aha. Aso badeu ari budon bala toro bwe, arile oro ndrawek ndrabwidi budon taha ndrandra-i na sahou oro asehek.

²⁵Ya eme aso badeh, ndra le se ja, ma aso ndralebelei oro nadu tine aso rayah, ma ndrasuni oro ndrawek hawe nadu tine aso, Banabas uru Pol.

²⁶Uru lau doh badeh, ndratehei koha uru ndra ta imek ta nyara Laban tataha Jises Krais.

²⁷Ya eme aso suni Judas uru Sailas awek, kasehek na boho uru amwenen, nyala aha ta sasah udu bolo la-ukei, aso atorou.