Aposel 14:6-22

⁶Arile, uru takalahei tanan tiri doh, ma eme uru atobwak au ala kon tinan Listra hawe Debi, udu kon tinan Likoniya, ma hawe uru ala loboho kon munyak doh ale.

⁷Eme uru atiye sahou mwasin ta nyala Kindrei ili tiri mwan ma badih udu loboho idoh.

⁸Eme udu Listra badeh, ndramak ari tinen atehei iy eme len badeh, katin imek. Iy badeh, badek bwe ma iy manyah udu le andri.

⁹Eme iy atehei ndranyen i ta Pol asehek sahou. Eme Pol anyolom amwenen i tan badeh, iy anyolom budon tan handru udu aliy ta iy winiyan asahan amwenen ja.

¹⁰Ya eme Pol aloh, “Ou ales na katim are loken!” Eme ma ndramak dah sandroh eme loke ma iy edek ja.

¹¹Eme iri lau anyolom sasah nane Pol amekes badeh, ma iri aloh i boho kon Likoniya anya, “Iri kindrei badeh, ndrasahan ndrame awas hawe taha!”

¹²Eme iri aloh Banabas badeh, Sus ya Pol badeh, iri aloh iy Hermes tasah iy ndramak tinan ta asehek sahou.

¹³Ya pris ari ta kindrei Sus, asiu tan ta atudun badeh, udu manan mirihik ta madasan ta kon tinan. Iy kuhi iri bulumakau hawe kanyeu ili madasan ta asiu ta atudun. Tasah, iy ma hawe iri lau anya kamekes salom kili ta Banabas uru Pol.

¹⁴Eme Banabas uru Pol anuhun le badeh, uru tarani awin ta la-u uru iu ma uru sakaliye ala bolo iri lau dah aloh anya,

¹⁵“Ado lau, ado anya kamekes lakou badeh, ta sasah? Aru dah badeh, ndramak laleyah i buku le ado badeh. Aru dah badeh, atiye nyala ado ta sahou mwasin ta ado badeh, katubuni ndrine ado ta lakou ndra-in laleyah i buku badeh, ki ta Kindrei kohan handru udu aliy. Iy le adeh mesekei munyak ma kandrah, ndras ma hawe lakou mari udu bolon.

¹⁶Bwena ndra-au mene iy alelei iri lau mara-ei badu kon munyak adek na seken tiri.

¹⁷Arile, iy badeh, leheya mwasin tan eme lewan ta sasah iy amekes: Iy badeh leheya laban tan i san ta iy edeu ur undruk udu kandrah eme andri ma iy badeh, isan len ta nyamon uni ma akohok; ma iy edeu nado nyamon solo-an solo-an ma iy mesekei ndrine ado idih na sekesek.”

¹⁸Buku, sahou doh uru asehek ai, arile boto-on labai, ta uru satobohei iri. Iri anya kasun salom i turu le ai.

¹⁹Ano iri Juwis rayah badu Antiyok, ma badu Ikoniyum ame andresei iri anuhun boho oro. Eme iri orowei Pol na bek, ma anya deh, iy ndramak, ma aluwi iy eme manan ta kon tinan.

²⁰Arile, udu hamon ta iri lau atehei budon tiri handru in ta Kindrei awudi iy, ano badeh, iy suri iy eme loken edek iu ili hamon ja ili kon tinan. Ano len ari ja badeh, Pol uru Banabas au ala kon Debi.

²¹Uru asehek sahou udu bolo kon tinan doh badeh, ma aluwi iri lau solo-an labai atehei budon tiri handru i ta Kindrei. Ano uru ala hamon ala Listra, ano ala Ikoniyum ma ala Antiyok.

²²Oro ala badeh, batanau iri lau ta budon handru badeh, kabadok ta tanan handru ta bolo budon handru tiri. Eme uru anya, “Taha kameh bwese maha-an solo-an solo-an, ano taha barala baha tondrok ta Kindrei.”