Aposel 13:40-47

⁴⁰Aha badeh, katondrok aha kudu mwasin, ta sasah iri propet mene ndrasehek, sasahan bada aha. Iri asehek i buku doh:

⁴¹‘Aha kanyolom, aha lau ta tebelese! Lahou laba tinan tek doh, jo kameh amekes udu bolo ndrokowa aha, arile sebwe aha baso-ok ta anuhun sahou doh bwe, ma aha winiyan batehei budon taha ba-en ta aliy bwe. Aha badeh, anya kasondrokonya, eme ma lakou tado le kameh mani ado atur, ma ado akohok maha-an laba tinan ta aliy.’”

⁴²Ya eme Pol uru Banabas anya kame len ta ndrahu tukum tiri Juwis badeh, iri lau ndremenya uru badeh, kame hamon ja na len ta amunyau ari ja, kasehek nyala iri ma sola.

⁴³Eme ma, iri lau au, arile iri Juwis hawe iri lau badu leheleh mene ndra-en hamon ta kandriyen tiri Juwis badeh, a-en hamon ta Pol uru Banabas. Uru aposel ame batanau iri i buku doh, “Aha badeh, kabadok ta bolo manyah mwasin ma tikisiy nane Kindrei ndratehei ndrame tataha.”

⁴⁴Ano, na len ta amunyau ari ja badeh, mirihik iri lau mari badu bolo kon tinan mari ame anuhun sahou ta Laban.

⁴⁵Eme iri Juwis anyolom iri lau solo-an labai ame badeh, ma mada iri alikis ma bwidi iri asehek sahou ndra-in labai i bada sahou ta Pol nane asehek.

⁴⁶Arile, Pol uru Banabas asehek sahou nyarahan labai i tiri anya, “Aru badeh, kasehek sahou ta Kindrei ki taha Juwis bwena op. Arile, aha badeh, baseken bwe, ma sahou taha badeh, leheya i buku, aha kameh winiyan bakohok manyah mwasin ta Kindrei ta udu le buku doh bwai. Eme ma aru kameh ruwani aha kon dah areu, ya, aru kameh ala aseben iri lau badu kon leheleh ai.

⁴⁷Tasah, idoh badeh, sahou ta Kindrei batanau aru ta aliy, i buku doh: ‘Jo badeh, atehei ou i buku sun anya lomada iri lau badu leheleh, ma ou ki nyara bohok kaseben iri lau badu bolo munyak mari.’”