Aposel 13:30-48

³⁰Yay tonan teq God in hodhodab wazan ta eram ham.

³¹Eraqim in le mataw in nenaq Galiliy hulosim Jerusalem-ub boliyta na gigo hib tugwahtim ham. Gwahtiqim in kam kabemmo nenaq tuqos ham. An muran mataw naqmo in Yesus awagamun on mataw tigibilenay ham.

³²Kwaziqmo God i gisesan gidimun tonnan hel diqmo gibilanta ham. An muran i gamuk araq dimun diqta kazaq ne gimen a bol ham.

³³God i gisesan gibilanta na tuwol net bugim in mataw na gigo onmin kawa i osauqta kaqmo in ago amun tiqig ham. In nazaq emnan haqad Yesus wazan hodhodab eram ham. Buk Song-ib bar gigerta nab gamuk nazaqmo mar tonan usaqta ham. Gamuk nab God bilam, Ni ya atatin haqad in bilam ham. Muran ya ni tiniqulal tonaiq haqad in bilam ham.

³⁴God in Yesus waz eraqid in asan hodhodab usad a hi lilihdaqta na ago in kwaziqmo bilamta ham. In bilam, Teq yaqgo nagah tawon diqta ya tinegdaiq haqad in bilam ham. Hel diqtaqmo ham. Kwaziqmo ya Devit asesan gidimun tongo bilayta nazaqmo diq ya tiqem negdaiq haqad in bilam ham.

³⁵Nazaq iyan Buk Song-ib gamuk ta araqab in kazaq bilammo ham. Ni ningo mat tawonta na hulosid in asan hodhodab usad a hi lilihdaq haqad in bilam ham.

³⁶Ari Devit in ago on mataw gilikmanib gwahtiqim osad in God anad muz bugad osim tumom ham. Moqan mataw sorim a le asesan gigerab tiyay toniy ham. Yay tonan in asan tililih ham.

³⁷Teq God mat wazan hodhodab eramta amatin na a hi lilih ham.

³⁸Nazaq iyan ya imaqbaban ham, ya Iyahta ago gamuk kazaq diq tigibilennan ham. Ne mat moqim ta eramta na anan helmo haqid teq God ne gigo daq meqinta walemad anadin a ta hi emdaq ham. God ago maror Moses bilamta na in ne gigo daq meqinta a hi walemad in ne giqeman ne God ameb mataw titnonta a hi iyayta ham. Ari muran on mataw Yesus anan helmo haqsa God in gigo daq meqinta na bunmo giwalemad in ginan mataw titnonta haqaqta ham.

⁴⁰Nazaq iyan ne gihol waz naqmo hiqiyiy ham. Luweq God ago nantut kwaziqmo bilamta nazaq ne gigo hib tugwahtiqdaq ham. Nantut na bilam,

⁴¹Ne mataw ya ibilawunayta ham ya daq emsa ne ahol waqiy haqad in bilam ham. Ahol waqad ne ginadnad emad gihol riten lamsa ne moqiy haqad in bilam ham. Ya ne gigo kamub daq araq diq tiqemaiq haqad in bilam ham. Emsa mat araq in daq na ago ne gibilenid ne anan helmo a hi haq daqay haqad in bilam ham.

⁴²Ari Pol ago gamuk tihiqiyan in ayow Barnabas inaq asanib le gwahtiqsa on mataw dedibmo kazaq gibilen yaqay, Lotu akaman araq kob teq ne giger gamuk na a i ta gibilen ton daqay haq yaqay.

⁴³Sa humab na tihiqiyan mataw hares tiqiysa Juda mataw kabemmo teq mataw en ta asor Juda a haiqta nagan gigo asor God diq anadin emad Juda gigo lotu adan muzin yaqayta na in Pol ayow Barnabas inaq gimuzim nenaq tilehiy. Lehsa Pol ayow Barnabas inaq in mataw na ginad wazan eraqsa gibilen yaqay, God agem dimunta tinegaq haq yaqay. Negsa ne hulosad dante ta araq hi muziniy haq yaqay.

⁴⁴Ari lotu akaman araq na tubolan on mataw uliq nabta na kuluw diqmo Iyahta ago gamuk huritnan haqad tuboliy.

⁴⁵Sa Juda mataw ta asor in mataw kabemmo Pol ayow Barnabas inaq gigo gamuk huritnan bolsa gibiyad in giger na ginan gigem timeqniyiy. Gigem meqniysa in Pol ago gamuk walebolad teq in Pol tibilawun yaqay.

⁴⁶Nazaq iyan Pol ayow Barnabas inaq in gamuk awaz meqinta kazaq gibileniy, Helmo haqiy, i God anad muzinim iturimmo i in ago gamuk ne Juda gigo hib bilawta haqiy. Teq ne gamuk na gileh tuqugay haqiy. Ne bilaqne negmo gihol tuqulum kemim bilaqay, I os kayeqmo kuluwa-kuluwmo osayta na waqgo i mataw dimun a haiq haq nog iyay haqiy. Nazaq iyan ne huritiy haqiy. Muran i ne gihuloseq mataw en ta asor Juda a haiqta nagan gigo hib tilehnan haqiy.

⁴⁷Na ezaqgo Iyahta in i kazaq gibilanta haqiy. Ni lam anuwan nog iyeq mataw en ta asor Juda a haiqta nagan yaqgo daq dimunta tigiqisihundaq haqad in bilam haqiy. Ni og saw bunmo leheq ya mataw gilumsihim gimen dante tuwastitayta na agamukan ni tigibilendaq haqad in bilam haqiy. Kabiy naqmo ni emdaq haqad ya ni niqeman ni osaqta haqad in bilam haqiy.

⁴⁸Ari on mataw en ta asor Juda a haiqta nagan in gamuk na huritim ginad tidimniy naqmo hiqiy yaqay. Ad in Iyahta ago gamuk abin tiqiluw yaqaymo. Sa on mataw God in ago os kayeqmo kuluwa-kuluwmo osayta na negnan anad mebmebmo tiqamta na bunmo in God ago gamuk anan helmo tihaqiy.