Aposel 13:30-47

³⁰Ba ye gogl pamara God ere-ikor endungo anduglkwa.

³¹Ana yomba ye bogl akiye Galili kamun yei ende Jerusalem kamun eingwa ikra ye mina enge merkinde wu nongugl pi tongo kanigwa. Yomba ikra erme ye pre kamo boglo kugl waidi Israel yomba teingwa.

³²“Ana no kamambuno wakai ene ditomga, i okuwo taragl ipre God ka dipandigl nono kowano awano wagle tongwa.

³³I erme Yesus gogl anduglmara i ana nono kowano ye nangro pre ye ka dipandigl tongwa i kaima paiyungwa. Kamo i kamambuno Buk Song numa 2 mina pangwa: “‘Na Wana ene motnga, te erme ene Nen na moglka.’

³⁴Ana God eremogl Yesus goglmara ere-ikor endungwa. Ye okuwo aglketa gogl ende maugl mina pi buglkrambuka ipre God ka yegl dungwa: “‘Na wakai ere ene tendre te taragl holi prapra tenaglka i okuna Devit ka dipandigl teinga ikra mongo kaima panambuka.’

³⁵Te kamambuno pepa mina ka ta yegl pangwa, “‘Ene kongun yomba ta kinde kondimin ye maugl mina ta bugl sungum dikrambuka.’

³⁶“Ana Devit ye God prumere ere yene yombama ditendre ana goglkwa. Ye yagl awama wagle pandiglmara dumo i ye pandiglko ana nangiye bugl sungum dungwa.

³⁷Ba God eremogl goglmara ikor endungo ye ta bugl sungum dikrukwa.

³⁸“Yeglpre angrima wagle, piryo. Ene tandaglmeno Yesus mina koko ende tenambuka pre no kamo i ene di tomga.

³⁹Ana Yesus wedi pirngi dingwa yomba tandaglmeno koko ende tendre yomba du-wakai we dinambuka ba Moses lomo i mina yomba du-wakai we ta dikraglkwa.

⁴⁰Ipre propet wagle ka yegl dingwa i ene mina plaudi dinambedi erme kanpoglsi molo:

⁴¹“‘Kaniyo, ene kamambuno dikinde yengwa yomba nomano kanekane yei ana goraglkwa. Sraglpre, na erme ene meglmara kongun ta eraglka, i ene ta pirngi dikraglkwa te yomba ta ombugl na konguna i dipoglsi tenan ene ama pirngi dikraglkwa.’”

⁴²Ana Pol ya Barnabas makai yungu kondo ende menda wimbriko yomba eremogl ye Sabat ta mina aglke ikine undre ka i keme ditenambre dingwa.

⁴³Ana yomba makai yungu makaisi meglkwa wu perepere eingo, ana Juda yomba ya te yomba menda ye Juda yomba kamambuno pirmara pirkwa merkinde Pol ya Barnabas embirara mokonomugl eingwa. Ana God wakaimo tongwa i mina wanmoraglmedi ye ka giglendi ditembrika.

⁴⁴Ana Sabat ta yongo siti yomba prapra God kamo piramnedi umakaisi meglkwa.

⁴⁵Ana enge igle yomba merkinde makaisi meglko Juda wagle kandre, ye deno kumbro Pol ka dungwa i di ikine ende ana nangiye ka-si teingwa.

⁴⁶Ba Pol ya Barnabas kundugl goglkre ka mongo di ikine endimbrika, “No komnaiye kana God kamo ene ditombuglka, kamo i ene pirakrikura ipre ene kor aimande meglkwa i inakune dingwa. Yeglpre no erme ene kondo endpi Yomba Bina meglmara i kamambuno ditombuglka.

⁴⁷Ana Yaglkande kamo yegl di nono norkwa: “‘Yomba Bina mina ene ambuglange mereyegl moraglkwa pre na i-pene endiga, ipre yomba makan uglo koglkoglo meglkwa ere-inaglka.’”