Aposel 13:29-47

²⁹Ning la ka tolsot rop tar a warwarala ning la ka tumus tari onoi, la pak purumi kusun a rakai kutus, pa la aborbori ting na kulam a minat.

³⁰Ika e God i akamtur ulaki kusun a minat.

³¹Pa galis a pukakiar, la ning nating la armuri taum onoi mitimo e Galili usaot e Jerusalem la oroi. Pa onone la warwara talapor onoi tetek a tarai Israel.

³²“Pa mila atai mulo ana Wakak a Warwara mange: A lele ning e God ka saran tari tetek na tumtubundala tagun nating,

³³onone ka tolsot pasi tetek dala, na tumtubunla, ning i akamtur ulak pas e Iesu. Larning di ka tumus tari ana areur a Saksak mange, ‘U a Natuklik, onone iau e Tamam.’

³⁴E God ka akamtur pas e Iesu kusun a minat, pa bel ir marase. Larning e God ka atongi mange, ‘A wakak a ututna ning a lele tar onoi tetek e Dewit, ar angisngis mulo onoi. A ngisngis ne i toh pa ir hanot momol ot.’

³⁵Pa ka atong tari otleng ting na ning a Saksak mange, ‘Bel ur noren tar anuma Totoh na Barsan sur ir marase.’

³⁶“E Dewit i tolsot rop pas a nuknuk anune God ana nuna pukakiarla na lalaun. Lamur i mat, pa di pori taum dingla na tumtubunala, pa a palaona i marase.

³⁷Ika, esaning e God i akamtur pasi kusun a minat bel i marase.

³⁸“Manglarning, na tastasikla, mila warawai tetek mulo mange: Mulor tasmani mang e Iesu i hanot sur ir kepsen a laulau a ginimulo.

³⁹A Warkuraila ane Moses bel i tolsot pasi sur ir kepsen a laulau a ginimulo, sur dir atong mulo mang a tena tostosla. Ika, la rop ning la tortorot o e Iesu, dir atong la mang a tena tostosla.

⁴⁰Mulor tai alar mulo sur gong a ututnala ning a propetla ka warwara tar onoi i sot o mulo. La atongi larne,

⁴¹‘Oroi, mulo a tena morot laulaula, mulor kulkulan pa mulor hirua, anasa ar tol ta utna ana numulo na pukakiar a lalaun. Ning tik ir atai mulo ana utna ning ar toli, bel mulor tortorot onoi.’”

⁴²Ning e Pol pa e Barnabas dia purum miting na rumai lotu, a tarai la nunung diau sur diar warwara ulak ana ututnala ne ana Pukakiar Sabat lamur.

⁴³Ning a tarai la han sarara kusun a rumai lotu, a galis a te Juda pa dingla na tarai masik ning la kas ana lotu Juda pa la lotu ana momolna, la mur e Pol pa e Barnabas. Dia warwara tetek la, pa dia arakrakai la, sur lar tur rakrakai ana marmaris ane God.

⁴⁴Ana Pukakiar Sabat ning la ka kubus tari, milau sur la rop miting na hanua ning la hanot taum, sur lar longor a warwara anuna Leklek.

⁴⁵Ning a te Judala la oroi a kunum a tarai, a balanla i laulau tetek e Pol pa e Barnabas, pa la lingir ka a warwarala ning e Pol i warwara ono, pa la atong saksakani.

⁴⁶Ika bel dia matmataut pa dia keles la mange, “Wakak mia ka atalapor nigon tar a warwara ane God ta mulo. Ika ning bel mulo kibasi pa mulo san alar pas mulo sur gong mulo los a lalaun tikin, onone, miar han tetek a tarai ning bel a tarai Juda.

⁴⁷Anasa a Leklek, i sune miau mange, ‘A suah tar u sur u a talapor tetek a tarai ning bel a tarai Juda, sur ur los a harlaun tetek a taraila ana rakrakan hanua rop.’”