Aposel 13:29-41

²⁹Yihu mbusi melit masih iya kili yiy ihipwen, tehe pwayan kinpwai, pwen huwiri yiy isa pwan kei tondrih, pe huyaiki yiy iya ngat sou.

³⁰Hapeko Ngindrai ihingini yiy pe itine paiwe.

³¹Pwen yihu mepo hurikai iyapolo yiy iro Kaliliy ipoo iya Yerusalem, ara hunime yiy lang soyon. Pe mahapo hurayah ndramat para pohoweya nongnan isa kili ndramira yowu Yutah.

³²Pe yowu topo pohowe nongan hiyan isa kili wawu ipa toro: Sehe melit mepo Ngindrai kinpwatisingiy kinna kili tumburou hu,

³³ara kintayah mannan kinsa kili worou mepo ndrayehu, tandrohonga ihingini Yesu itine paiwe. Nongan ara hu kanratuluwi pwen ita waliy luwoh ita nondriya Puk Waliy, ipa toro: ‘Wou ara noru, lang nepo ara kuntayah tamam.’

³⁴Ngindrai ihingini Yesu itine pe kinlahiy para nombuwen kimui pe kipwala pwi. Pe ndrokonan para aliy, tehe pwayan kinpwai, ipa toro: ‘Yo andre kuiki lomwes haiyan tehe kuntandrangan kinna kili Tepit pe andre kirayah ndrokonan tehe kunpwai.’

³⁵Pe nongan sahin i, ara pwayan ipwai, ipa: ‘Wou anlahiy para apiyani Ndramiram Haiyan para kipwala, ara pwi!’

³⁶Tanarou tehe tandrohonga Tepit iro kol pwan, lang ara, ara ngara kipo mbulen ndruwa namiliwa Ngindrai. Pe Tepit imat pe huroni yiy iyasura tumbun hu, pe nombuwen ara kinpwala.

³⁷Hapeko yiy mepo Ngindrai ihingini yiy iyau kimat isa mawen, ara sangin kinpwala pwi.

³⁸Pwen pe wawu nali, yowu topo pohowe nongan aro isa kili wawu, para wawu kapahasaniy, tehe Yesu ko andre kitali hu pakut mwomwan masih ta wawu.

³⁹Nongan para pwahanou ta Mose ara kinlahiy para kisopwat wawu pe kimwaniyani wawu pwi. Hapeko wawu mepo wawu pwotisingi lohonga wawu iya kili Yesu, ara yiy opu ilahiy para kisopwat wawu pe kimwaniyani wawu koro mwonen.

⁴⁰Mara wawu kiro; matisan sehe melit mepo hu poropet hu kanpwai mamu kinna, ara kirayah kili wawu.

⁴¹‘Akanimei! Wawu ndramat para haisani nongan, ara andre wawu kateleh mwomwan pe wawu kamat; paratesah, yo andre kumbusi melit handra kisarahaihai kiro mwonen lenge wawu, pe konan kapa hamou kiwong kisata wawu, hapeko andre wawu kanpwotisingi lohonga wawu pwi.’ ”