Aposel 12:9-21

⁹E Pita i mur purumi kusun a rumai a dodot. E Pita i nuki mang a utna ne a angelo i toli, bel a momolna, i nuki mang i oroi a tatatai ka.

¹⁰Dia bolos a ningnigo na tena tai alar, pa a munaur na otleng, lamur dia hanot ting na taman a aen, ning di purpurum onoi utumo a tnan hanua. Ning dia tur tingia, a taman i sapang oros ka, pa dia purum. Ning dia hanot uting na pukna ning a ngas i han sarara, a angelo i rorom kakat kusuni.

¹¹Ning a nuknukna e Pita i talapor, i atongi mange, “A tasman momoli mang a Leklek i sune anuna angelo, pa i alaun pas iau kusun a kuna e Herot, pa a ututnala ning a tarai Juda la mang sur lar toli hok.”

¹²Ning i tasman lalani mang ka langolango, i han sur a rumai ane Maria, tana e Jon ning a risana otleng e Mak. A galis a tarai la kes taum tingia, pa la nunung.

¹³E Pita i pinpindir ting na taman, pa ning a tena titol a basbas, a risana e Roda, i dun sur a taman.

¹⁴Ning i longor lalan pas a elngena e Pita, i gas. Pa ana nuna gasgas, bel i sapang pasi, i dun ulak, pa i atai la mange, “E Pita kanumo na taman i tur.”

¹⁵Pa la atai i mang, “U talar.” Pa i angongos la mang, “I momol ot, i ot ne lapiu.” Pa la atai i mang, “Ngandek anuna angelo ka.”

¹⁶Ika e Pita i pinpindir ngongos, pa ning la sapang pa la oroi i, la kulkulan onoi.

¹⁷Pa i sairas la ana kuna, sur lar kes longoroi, pa i atai la mang a Leklek i ben purum mangmangasa pasi kusun a rumai a dodot. Pa i atai la mang, “Mulor atai e Jems pa na tastasindala ana tortorot ana utna ne.” Pa i han kusun la sur ning a hanua masik.

¹⁸Ana kobot a tena harumla la tai sur e Pita pa a nuknukinla i loklokron mang kanaha i ma.

¹⁹Ning e Herot i longori mang bel ma i kes ting na rumai a dodot, i arsune sur lar tai suri. Ika bel la seren pasi. Lamur i warkurai a tena harumla ning la tai alar a rumai a dodot, pa i arsune onla sur dir umkol la. Lamur e Herot i han miting na papar Judia utumo e Sisaria, sur ir kes tumo.

²⁰E Herot i balakut tetek a tarai ana naur a hanua Tair pa e Saidon. Pa tarai miting na naur a hanua ning, la han taum sur lar oroi i. Pa lar nunungi sur a bal molmol, anasa anunla naur a hanua la laun ka ana utna na hangan miting na papar anuna king Herot. La bal taum nigo taum o e Blastus, a tnan tena tai alar anuna king, pa i nangan la sur lar oroi a king.

²¹Ana pukakiar ning e Herot i kubus tari tanla, i mermer pas ana kaenla anuna king, pa i kes tar ana keskes na king, pa i warwara tetek a tarai.