Aposel 12:2-17

²Iy badeh, tiye ndramak tan ari ta bahun ili mwetehei Jemis, nadu tine Jon, imek na samen gwak iri aloh bainat.

³Eme iy anyolom, buku iri Juwis badeh, sekesek ta aliy, iy ili abwiyeh ta aseu Pita ale. Idoh badeh, udu bolo len ta nyamon tinan ta jabi ramen yis bala bolon bwe.

⁴Iy tawi iy ano badeh, iy atehei Pita i bolo kou, i mine oro lau ma hahuw, badu bolo oro lau ma habuk ta bahun badeh, tondrokei iy. Oro ndrokei ta Pita badeh hahuw, hahuw ta bolo awa onoh onoh, ben ma len. Budon ta Herot badeh, anya iy keme lewan mada lau mari ta sahou, kudu hamon ta len ta Pasoba.

⁵Ya eme iri atehei Pita udu bolo kou udu gwek, arile iri lau atehei budon tiri handru i ta Kindrei badeh, amekes salom boto-on tan, ili ta Kindrei.

⁶Na ben ano kon kaleu doh badeh, Herot kameh edeu iy i ta sahou. Ya Pita badeh, amadin ndrokowa uru lau ta bahun ma la-uh. Sawei iy badeh, na sen ma la-uh. Ya, oro lau ta bahun rayah ja badeh, ado ta ndrokei ado madasan tinan, loboho manan.

⁷Eme nawin bwe badeh, angelo ta Laban ari asahan, ma lomadan lomatani bolo kou dah. Iy tukuhi kabede Pita ma mete-ei iy amak anya, “Ou suri ou suwi!” Eme badeh, sen asoh laleyah bada bobwan tan.

⁸Ano angelo tiye i tan anya, “Ou asini awin tam hawe ku-i katim kili.” Eme Pita mesekei i le buku aliy. Ano iy anya, “Ou atehei kolau tam ta bwele-em kili, ya ou an hamon tek.”

⁹Ya eme Pita in hamon ta angelo dah eme manan ta bolo kou. Arile, iy badeh, bala tanan sasah angelo amekes doh bwe. Iy anya badeh, iy amekes lele.

¹⁰Uru adek ame sakalawi ndramak ari ta ndrokei i hamon, ano uru ame sakalawi iy ari ja, ma uru ame asahan madasan amekes na hayen, madan i kon tinan. Eme madasan dah asak laleyah turu, ma uru ame manan. Uru adek san kakan lawe-en sese, ma se nawin bwe angelo doh amai iu laleyah.

¹¹Ano Pita baraseleyani ai, ta sasah nane asahan ma eme iy anya, “Jo ndratanan ndramwenen handru ai. Laban badeh, suni angelo tan eme sebenei jo ta bolo mine Herot boto-on, ma hawe ta mine iri Juwis mari anya kamekes keme badak.”

¹²Eme iy anyolom tanan doh badeh, ma iy iu ili asiu ta Mariya tine Jon Mak. Iri lau solo-an badeh, atukum ala aliy asolom.

¹³Eme Pita udu manan atukoh kou, ya eme lohowan badih ari nyaran Roda ili madasan anya katou are lau handru.

¹⁴Eme iy anuhun nyaro bale Pita badeh, iy abasa, ma iy basulu-i kou bwe, ma iy sakaliye i hamon ja tiye anya, “Pita asah udu madasan kodo-oh!”

¹⁵Eme iri anya, “Ou kede-eh budon tam ndra-au oh!” Bwai, iy asehek le ili anya, “Ado kanuhun jo. Ndrakan en! Iy asah udu manan kodo-oh.” Eme iri anya, “Sebwe, malawin eme ales nadeh.”

¹⁶Arile, bwai, Pita atukoh kou udu le gwek, ya eme iri anya kasulu-i kou, oro atou iy. Eme mani iri atur handru.

¹⁷Eme Pita atehei minen i loken amunum le ma iy tiye i toro kandru-uk, ma iy asehek i toro ta nyala Laban kuhi iy udu bolo kou eme len. Ano iy anya, “Ado badeh, kasehek nyala Jemis ma hawe oro nadu tine to oro rayah ja ta aliy. Ano ma iy ruwani oro, ya iy iu ili kon rakon ja.”