Aposel 10:6-32

⁶Kaning i kes napire maurana e Saimon, i ning a tena toltol utna ana palaona inagoila. Anuna rumai i tur milau a tasi.”

⁷A angelo ning i warwara teteki i han, e Konilius i kabah pas naur tagun a anuna tena titolla, pa ning a tena lotu tagun anuna tarai a harum.

⁸I atai ditol ana ututnala rop ne, pa i sune ditol utumo e Jopa.

⁹Ana pukakiar lamur tana, ditol han, pa ana tnan kamis ning ditol han milau sur a hanua Jopa, e Pita i abit kas usaot na pukul a rumai, sur ir nunung.

¹⁰Ning i nunung, i kilang a munurak pa i mang sur ir hangan. Kaning ot di sang a utna na hangan, i oroi a tatatai.

¹¹I oroi a langit i sapang, pa ning a utna i arlar ana tnan kaen na polpol, di tong pas diat a ris ono pa di alorong purumi teteki.

¹²Tingui onoi a urmatana inagoi, pa la ning la kawar, pa manila otleng.

¹³A elngen takai i atai e Pita mange, “Pita, ur tur, ur umkol la, pa ur ien la.”

¹⁴Pa e Pita i kelesi mange, “Leklek, bel! Bel a ien tar ta utna ning di arsairas ono pa i dur na matam.”

¹⁵Pa elngen takai i keles ulaki mange, “A utna ning e God ka atotoh tari, gong u atongi mang a dur a utna.”

¹⁶A utna ne di toli munatol, pa di dat kas kakat a kaen usaot na langit.

¹⁷Kaning ot e Pita i nuknuk kol ana kamkama tatatai ne, natol a barsan, ning e Konilius i sune ditol, ditol ka seren pas a rumai ane Saimon, pa ditol tur ting na taman.

¹⁸Ditol arkabah kas mange, “E Saimon ning a risana otleng e Pita kaning ui?”

¹⁹Kaning ot e Pita i nuknuk ana tatatai, a Talngan Tabu i atai i mange, “Oroi! Natol a barsan kaning ditol tai sur u.

²⁰Ur tur, pa ur han purum. Gong u nuknuk kol, ur han pa mulor armuri, anasa iau ot a sune ditol ute.”

²¹E Pita i purum tetek ditol pa i atai la mange, “Iau kane ning mutol tai sur iau. Asa ning mutol tai sur iau suri?”

²²Ditol kelesi mang, “E Konilius, a ningnigo anuna ning a mar a tarai a harum i sune mitol. E Konilius i ning a tena tostos pa a tena hanrawai tetek e God, pa a tarai Juda rop la hanrawai i. A angelo ane God i atai tari mang ir arsune pas u utumo ana nuna rumai, sur ir longor anum ta warwara.”

²³E Pita i ben kas ditol sur ditol ar borbor pas. Ning i kabakiar ot, e Pita i tur pa la han, pa dingla na tarai ning la tas ana tortorot misaot e Jopa la armuri.

²⁴E Konilius i tasmani mang lar hanot, i ben taum pas na mainala, pa na halhalna, pa la kes nanan e Pita. Pa ning ka takai a pukakiar alar tar a tinan anune Pita la, la hanot tumo e Sisaria.

²⁵Ning e Pita i kas, e Konilius i han barati, pa i punga purum ana hanrawai ting na naur a hana.

²⁶Ika e Pita i dat atur pasi, pa i atai i mange, “Ur tur, iau otleng a barsan ka.”

²⁷Ning dia warwara amon, e Pita i kas tar ana kunum a tarai kaning la ka kes taum.

²⁸Pa i atai la mange, “Mulo tasmani mang di arsairas ting na warkurai mang mila na te Judala, milar lasan taum tik ning bel tagun a tarai Juda, pa milar gereni otleng. Ika e God ka asangan tar iau mang gong a atong tik mang i dur namatana e God, pa gong a nuki mang di arsairas tetek mila ning milar lasan taum onoi.

²⁹Pa bel a ngongoio ning di arsune sur iau ute. Pa ar deken mulo: Mulo arsune sur iau sura?”

³⁰Pa e Konilius i kelesi mange, “Ka diat a pukakiar alar tar anuka nunung ting na nuka rumai ana matana kamis larne, ona natola matana kamis ana rah. A oroi ning a barsan i mermer ana kaen ning i pilpil, i hanot kulkulan pa i tur salanigo tak,

³¹pa i mang, ‘Konilius, e God ka longor anum na nunung, pa ka tasman anum na artabarla tetek a kapan a taraila.

³²Ur arsune utumo e Jopa, sur e Saimon, ning a risana otleng e Pita. I wasira e Saimon, a tena toltol utna ana palaona inagoila, i kes milau a tasi.’