Aposel 10:6-29

⁶Lobu rangua Saimon, lipu asaxa sanggang oxatanam, numanoa wa tek rubinia.”

⁷Urana uleginama harua saing ila sup, baing Konilias wagi lipuxing haulingam luwa xaung lipuxing haungingam tela hauli xauna, xaung iti Urana yanoa. Wagi dingtung dima rangua.

⁸Naxuya na dingtung mana axadi disok mana, saing soxi dingtung mala Yopa.

⁹Buragina bila xaidap lia baing tung dahaxa mala dima haxek mana long sabangga Yopa. Mana bungina baguba Pita haing numa urongang gomania bu sabu.

¹⁰Wa laing gesagina saing bo ba xang. Lipudi daxauxau angianauyu saing Urana hamati Pita sangganoa.

¹¹Pita bagu long xaiya xaxaina saing axamang tela bila imang xabubungam sabanga, diyungia mari titia mana yoyoang luwadi luwadi.

¹²Asaxa maxang longgalo dahaxa kiding luwadi luwadi xaung asaxadi disaga mua titia xaung mang otingamdi duwa maluxu mana imangga ba.

¹³Baing waxutu tela bala ba, “Pita, umesa. Ung saing oxong.”

¹⁴Pita haxuya ba, “Toxoratamona, tegu sibuna! Disigixinga maxamia te. Suxungugua xabiadi te.”

¹⁵Waxutua harua muli ba, “Baraxing baraxinta Urana libu sok sigixinga, bing labu uxu ba musunau tai.”

¹⁶Axa ba sok bunging tuwa, saing hata sibuna li daxai imanga mahaing long xaiya muli.

¹⁷Tauna, Pita hatum xumana mana axa menau bagu namuxinoa. Hatumguyu baing hata sibuna li lipuadi Konilias soxidi ma ba disai mana Saimon numanoa, dibagu saing disok dili mua gamgamingang xaluxinia.

¹⁸Duwagi duxusunga ba Saimon duxu ba Pita wa la ba, kimbo tegu.

¹⁹Pita hatumguyu mana axa menau bagu ba, baing Urana Aningonoa harua na ba, “Bagu lipu tuwa disai maung.

²⁰Binabu umesa uri mala rangua dingtung. Uhatum xumana manau tai, namua na ngasoxi dingtung ma.”

²¹Pita ri saing harua na dingtung ba, “Lipua angtung gasai mana, nga baing. Baruta angtung gama?”

²²Dingtung dahaxuya ba, “Amtum gama rangua Konilias, lipu haungingam 100 yanamidinga. Lipu maringing sibuna saing wa hawa mana Urana. Yuda longgalo diyaha mana. Urana uleginam tela bala ba xusungaung ba uma numania, bu lungu haruangama.”

²³Saking Pita xap dingtung diluxu numia ba duwa lobu rangua. Buragina baing Pita ila rangua dingtung. Ding digabu lipu hatuminga haringinam Yopam teladi dilauba.

²⁴Xaidap tela muli baing disok long sabangga Sisaria. Konilias ragu mua manadi. Wagi bakbaginoa xaung riandi ma digugunia.

²⁵Pita luxu numia baing Konilias ila rangua saing gung king tuxundi kinia bu iti yanoa.

²⁶Ne Pita iti mesa, harua ba, “Umesa. Nga xauna nga lipu ing ganina.”

²⁷Tang dahangixaya tang diluxu numia, saing Pita bagu lipu xumana digugunia mua.

²⁸Harua nadi ba, “Ang gaxabia xai ba am Yudadi hanaunaungamama biliam ba labu am gawa rangua lipu Yuda Teguamdiu tai, labu am gala lobu ranguadiu tai. Ning Urana hatanga nanga ba labu ngauxu dianoa mana lipu telau tai, kimbo ngauxu ba sigixinga tegu tai, labu ngatatuadiu tai.

²⁹Binabu bungina tung duxusunga nga ba ngama rangua dingtung, nga haruanga te, ngama baing. Tauna, hatata ngaxusungang ba, baruta awagi nga ma?”