Aposel 10:12-29

¹²Tiro ubalano, a kum wur ngas na wewegua rop, det ra det wanan netes una piso ma det ra det kaukawar, ma a kum piko kai.

¹³In nalngan ara i watungi tan o Pita lena, “Pita, un tur. Un um doko det, ma un nan det.”

¹⁴Ra o Pita i watungi lena, “Labino, awu ut! Ka wan tar tu utna ra i dur umatam, ra i tabu torom met a taro Juda.”

¹⁵Ra in nalngan ara i balu meleti lena, “A utna ra o God i sa utalapor tari, gong u watungi lena i dur.”

¹⁶A utna ri di pami elar nama tulu dino, ra uniutra di dat toto melet pasi usapat una langit.

¹⁷Ra a nuknukin o Pita i toboroboro utmakai una kukurai ina tamtama ri, a tulu musano ra o Konelias i tulu ru detul, detul sa sio pas a rumu anun o Saimon, ra uniri detul tur una matansako.

¹⁸Numur detul kakabo ruk, detul iting lena, “O Saimon ara risano kai o Pita kura i tiro?”

¹⁹Ra o Pita i nuknuk utmakai una tamtama ra, a Tokodos na Nion i watungi tano lena, “Tama i! A tulu musano detul sisio sur ui.

²⁰Un katutur, ma un nan pirso. Gong u nuknuk larlar sur un nan tomo nam detul, uni iau ut a tulu ru detul urin.”

²¹Ra o Pita i pirso torom detul ma i watungi lena, “Iau kut ri, ra motul sisio sur iau. Motul wan urin sur asau?”

²²Detul balu i lena, “O Konelias, a mugumugu anun ara mar na taro na inaim i tulu ru metul. O Konelias i ara tene tokodos ma a tene urur un o God, ma a taro Juda rop det ru i. A ensel anun o God i inanos tari lena, in itula pas ui utong una nun a rumu, sur in longoro anum tu wasiso.”

²³Ra o Pita i ben ruk pas detul sur detul in inep pas. Ra i sa waspi, o Pita i turpas a inawan, ma a ramano kum musano ra det tar tistisino una nurnur tagitiro o Jopa, det wan tomo nam det.

²⁴Una bung numur, det wanpat tong o Sisaria. O Konelias i sa tasmani lena det na wanpat, ra i sa kabo tomo pas a kum kukunu, ma a kum paspasano, ra det kis langlang sur o Pita.

²⁵Ra o Pita i ruk, o Konelias i wan barato i, ma i kis butkeke taru nama urur nisano, ra i lotu toromi.

²⁶Ra o Pita i dat utur pasi, ma i watungi lena, “Un tur, iau kai a musano kut.”

²⁷Ra der wasiso nanan, o Pita i ruk ma i tama a susut na taro kura det sa kis tomo.

²⁸Ra i watungi tandet lena, “Mot tasmani lena i tabu una numet a warkurai sur met a kum te Juda met in lason tomo nam taio ra awu sur a te Juda, ma met in lumu i kai. Ikut uniri o God i sa ese tar iau lena, gong a watungi un taio lena i dur umatan o God, ma gong a nuki lena i tabu torom met sur met in lason tomo nami.

²⁹I mo ra ka putut ra di itula sur iau urin. Ra uniri an ting mot lena: Asau ra mot itula pas iau suri?”