Aposɨl 2:14-36

¹⁴Pen Pida bɨ Jisas manö ud arep bɨ unbö agɨp laŋ aip uraköm, meg mɨgan dap ranöm, nɨbi bɨ iru nöp mɨdeila gau kalɨp haga, “Kale Juda nɨbi bɨ hon abe, kale nɨbi bɨ Jerusalem aui hanmɨdim abe, aui nɨhön gajɨp u yad kalöp manö hagnɨg gabin i nɨŋ aij gɨmim.

¹⁵Kale rɨmnap hagpim, ‘Bɨ gai i ñɨg wain iru nöp ñɨŋöm, hauƚ alöp hagaböl,’ a gɨpim u, pen kale ñɨg wain ñɨŋlö hauƚ alagöp. Mɨñi sɨdö gɨsön nöp auöp magö u nöp me.

¹⁶Pen manö yabɨƚ ke ke hagaböl nɨŋabim anɨbi, bɨ God manö hagep Joel hadame nöp hagöm kalɨ kƚiñ rɨka rö nöp gab me u. Nɨpe manö anɨbu kalɨ kƚiñ rɨköm haga,

¹⁷‘God hagöp, “Ñɨn hain u, nɨbi bɨ magöŋhalö gau kalɨp Ana yad yunabin. Ñɨ pai kale gau God Manö nɨbi bɨ kalɨp hag ñɨnaböl. Bɨ praj kale gau naböŋ nɨŋnaböl. Bɨ majö kale gau hon nɨŋnaböl.

¹⁸Ñɨn anɨbu, nɨbi bɨ yɨp wög gɨ ñɨbal gau, nɨbi gau abe bɨ gau abe, kalɨp Ana yad yunö, manö aij yad u nɨbi bɨ gau kalɨp hag ñɨnaböl.

¹⁹Pen kumi kabö adö laŋ nan ke gagep rö rɨmnap gem, mɨnöŋ naböŋ adö iƚ i nan nɨŋeb nɨŋagep ke nɨbö rɨmnap gɨnabin. Hagape göm, mab inöm, hadu adpɨƚ kub göm gɨnab.

²⁰Sɨdö mailö gagnab; rakɨn hagape bö lɨnab. Anɨg geinab, hainö ñɨn unbö ke nɨbö waiö lɨnab. Bɨ Kub mailö aij unbö ke halö aunab.

²¹Pen nɨbi bɨ an an, Bɨ Kub yɨp ud kamɨŋ yuaŋ, a göm, hag nɨŋnaböl gau, kalɨp ud kamɨŋ yunab,” a ga.

²²Pida nɨpe Joel kalɨ kƚiñ rɨka manö anɨbu hag pɨs göm haga, “Kale Isrel nɨbi bɨ, manö hagnɨg gabin i nɨŋ aij gɨmim. Jisas bɨ Nasared nɨbö u bɨ yɨharɨŋ wasö; God nɨpe ke nɨp yuö aua. Ñɨ yad u yunö, nan gagep rö iru nöp göm, nan nɨŋeb nɨŋagep iru nöp göm gɨnab aŋ kalɨp au nɨŋöm, bɨ anɨbu God nɨpe ke hag yuö aua u nɨŋlaŋ, a göm, nɨp yuö aua. Jisas nɨpe nan gagep rö aŋ kale ga u, kale ke hadö nɨŋbim.

²³God kale gɨnabim rö nöd nɨŋöm, Jisas nɨp ud ñɨmagö adö kalöp u lö, kale dam nɨbi bɨ nan si nan naij gɨpal gau kalɨp ñɨbe, nɨp mab ba laŋ al pak lɨlö uma.

²⁴Nɨpe ilön kub yabɨƚ udöm uma u pen böŋ nöp wip rɨgöl au mɨdöm, hij gɨ lug lɨ arnɨm rö laga. God gö kauyaŋ uraka.

²⁵Depid pen hadame nöp Jisas nɨp manö kalɨ kƚiñ rɨköm haga, ‘Yad nɨŋbin, Bɨ Kub yad aip pör pör mɨdöp. Nɨpe ñɨmagö yɨjɨg yad lau adö mɨdöp u me, yad pɨñɨŋ gagnabin.

²⁶Anɨg göp u, hibur mɨdmagö yad pɨƚaiöp; yad ñɨñɨ lem hagabin. Hañ romaŋ yad umnɨg gab pen gasɨ halö mɨdem pɨñɨŋ gagnabin.

²⁷Ai gɨnɨg? Ne yɨp wip rɨgöl mɨgan arö gagnabön. Ne Bɨ Uɫ ne arö gö, hañ romaŋ nɨpe hij gɨ lug lɨ aragnab.

²⁸Ne yɨp kamɨŋ mɨdep adan u yamna. Yad ne aip mɨdem, mɨñ mɨñ yabɨƚ gɨnabin,’ a ga,” a ga.

²⁹Pida Depid haga manö anɨbu hag pɨs göm haga, “Añ mam bɨ, yad kalöp manö kabö göl hagnö, nɨŋ aij gɨnabim. Bac iƚaŋ Depid umö rɨgöl gɨla uƚöm mɨgan u mɨdöp; uƚöm mɨgan anɨbu mɨñi hon u rö nöp nɨŋbun.

³⁰Pen Depid nɨpe God manö hag ñeb bɨ mɨdmɨdöp u me, nɨpe nɨŋa, God hadame nöp manö hag löm haga, ‘Ne ñɨ rɨknabön rɨk damöm rɨk lɨnaböl ñɨ ap nɨpe ka ne udöm, kiŋ mɨdeinab,’ a ga.

³¹Depid nan hainö gɨnab u nɨŋöm, Mesaia u nɨpe umöm uraknab, a göm, haga, ‘Nɨp wip rɨgöl mɨgan arö gaga. Hañ romaŋ nɨpe hij gɨ lug lɨ araga,’ a ga.

³²“Mɨñi God gö, Jisas nɨpe uraköm kamɨŋ mɨdöp. Nɨpe kamɨŋ mɨdöp u hon magöŋhalö amgö magö hon ke nɨŋbun.

³³God Jisas nɨp dam ñɨmagö yɨjɨg adö nɨpe lau la. Löm nɨpe Ana Uɫ ñɨnabin a göm haga u, Jisas nɨp ñö, nɨpe pen hanɨp ñö, apöm gu kub hagö, hon manö ke ke hagabun i nɨŋabim.

³⁴Pen Depid manö haga anɨbu, nɨpe ke hagaga. Depid nɨpe mɨnöŋ naböŋ iƚ i mɨdöm, kumi kabö adö laŋ araga. Pen nɨpe haga, ‘Bɨ Kub nɨpe Bɨ Kub yad u nɨp haga, “Ñɨmagö yɨjɨg yad lau adö asɨk mɨdaimön me;

³⁵yad gɨnö kauaƚ mauaƚ ne gau, raƚa mɨgan ne gau mɨdeinaböl,” a ga,’ a ga.

³⁶“Anɨb u, kale Isrel nɨbi bɨ magöŋhalö nɨŋ aij gɨmim: Jisas bɨ mab ba laŋ al pak lɨbe uma bɨ anɨbu nöp, God gö Bɨ Kub yabɨƚ mɨdöp. Nɨpe nöp Mesaia pör abad mɨdmɨdun me u,” a ga.