Apasoro 2:10-44

¹⁰Prigia apa, Pampiria apa, Ejipt ge Sairin megiyave Ribia apa vinetewa, sira Romu apa amdau onamiyawa,

¹¹Ju igiyawa ge iyayapan mu anotumat mumawa yankweg Ju anotumat mumawa gumbe anotumat ayawa gaibu wakeya. Sira Kurete ge Arab igiyawa mu gae numa gumbe God yusipamit aiviwa gaiyawa veme anoete. Mame aninin!”

¹²Mu yaug terag anopipanum eme, sira mu garawano aya, “Mame natawa divi?”

¹³Megara upeba mu gumbo iyagau ake waya, “Mu wain kokavit naya.”

¹⁴Meve Pita apasoro 11 gaibu wan yoik noiwa gae yabdapam iyayapan dirumne. “Ne iyayapan neuma Ju igiyawa ge Jerusarem apa wakeemewa undag, mame yaimoyai guniyap watna naunewa ne gunap.

¹⁵Ye meib anovene. Megara iyayapan mame mu wain den naya, kuiyawa kum gare 9 mumbevit.

¹⁶Mame propeta Joeru wanewa.

¹⁷‘Kum oieba God wape, ne Guwawa neuma iyayapan undag gumbo egampna. Ye usitainewa ge gwaiteaiwa God gaiyawa wape. Ud mataiwa irakoniwa uyavi minawa yaupe, sira iyai tayawa mu uyavi gumbe yaupe.

¹⁸Me kumive, nau neuma eme igiyawa, apan ge vesin gaibu, mu gumbo Guwawa neuma egampna, sira mu God gaiyawa wape.

¹⁹Ne opa kwimin danave anopipanumowa toyau muntna, sira epa piyu egave irakoniwa toyau muntna. Mu ganigani ge iyam ge aup dog aipewa.

²⁰Kum me tobiyape sisip uwape, sira dud me tobiyape ganigani ape, meve Ayapan eyawa kokawa kumiwa uwape.

²¹Megara me apa undag me Ayapan iviwa gumbe auwapewa matai waita waita aupe.

²²Isuraeru igiyawa ye mame anoya. God me Nasaret apan Iesu wagomiyane ye guniyap irayauyau, anopipanumowa ge at irakoniwa ane. God apan mame yenan taibe ane. Ye yembovit mame yaug anoya.

²³God yumateba ge ano meuma me matai dimbae matatpewa yaug anopewa gumbe apan mame God barau yenne. Sira ye apan mame kukaeba igiyawa nanuwo gumbo barauyana korosi egave toya boane.

²⁴God me bo dawaeba gumbe warinamne sira inaig yoine. Kuiyawa me gumbe mina den ane, me bo aug yumnatpe.

²⁵Devid me oya wane: ‘Evedni ne Ayapan namunap yaveni. Me ne nanin yutanwa apa wakene, meoya ne ipunapun den atna.

²⁶Meoya ne nonenwa me degadega ane, sira ne pednanwa degadega noiwa uwane. Ne kwapunwa gaibu owanowan gumbe wakepe.

²⁷Kuiyawa ge ne guwanwa ades danave den wakepe. Apan iyakaisi geuma den kweya putaipe.

²⁸Inaiinai ebuwawa toyau negana, sira ge namugap degadega neuma noidauwape.’

²⁹Tatangwanen, ne natawa di diruitna. Isimuranewa Devid boane siya, me yampotawa gare mapa gunup.

³⁰Me propeta, meoya me anone wagoba da matai kin arawa aupe God agi gumbe wane.

³¹Me yavivi ivi anin ape, Iesu sira inainewa gaiyawa wane, ‘Me ades danave evedni den kwepe kwapiwa den puwaipe.’

³²God me Iesu mame sira inaine, sira nu undag me yangunup yautu.

³³Sira God Iesu aug nanin yutanwa apa baraune. Iesu Mamawa gumbe Guwawa Iyakaisiyapama aune me Mamawa me gumbe wait agi wanewa. Iesu Guwawa Iyakaisiyapama egamne gare ye mame yavene sira anoenewa.

³⁴Devid kwimin den dog aine. Me wane, ‘Ayapan me Ayapan neuma wane. Nanin yutanwa apa wakeya.

³⁵Ivi ne anavi geuma ne atna amag ankwatave barautna.’

³⁶Meoya, Isuraeru igiyawa undag, mame yai yaug anotanit di. God me Iesu mame Ayapan ge Keriso anewa, ye korosi gumbe toyana.”

³⁷Meve iyayapan mame anoyawa, mu nonomagowa mut mina yuwamiya, mu Pita ge apasoro upeba gumbo waya, “Tatangwanen, nu anin aton?”

³⁸Pita gara wane, “Ye undag desirom desirom nonemagewa biroriyape kukaeba yeuma yankweya, sira Iesu Keriso iviwa gumbe babataito auya, me kukaeba yeuma anog yankwepe. Sira puyo meuma me Guwawa Iyakaisiyapama auya.

³⁹Agi mame yenan ge ye usitainewa ge iyayapan undag painau wakeyawa oya munne. Natawa me iyayapan undag Ayapan God numawa wagomiya munnewa mu munan munne.”

⁴⁰Pita gae upeba gaibu taibe dirumwane, “Kukaeba kum garewa apa yaimoyai ayun wariya.”

⁴¹Iyayapan gae meumawa auyawa mu babataito auya. Me kumive iyayapan 3,000 mina agoniyag aigowawa aya.

⁴²Mu apasoro toewanewan mumawa yaimoyai yumateme, baigan amuneme, bredi warensieme sira nun veme.

⁴³Iyayapan undag teraya. Apasoro anopipanumawa ge irakoniwa obiren aya.

⁴⁴Anotumat igiyawa agoniyake dividivi undag divi da den wane me nekut neuma.